18°C , Partly cloudy | Kigali-Rwanda
Umukuru w'Igihugu Paul Kagame (ibumoso) ubwo yari mu kiganiro na mugenzi we w'u Burusiya Vladimir Putin mu biro bye

Igikombe k’Isi 2018: Kagame yahuye na Perezida w’u Burusiya

Yanditswe na BUGINGO FIDELE

Ku ya 14-06-2018 saa 07:01:50

Kuva uyu munsi tariki 14 Kamena 2018 i Moscow mu Burusiya haratangira imikino ya nyuma y’igikombe k’Isi “FIFA World Cup 2018”. Ejo hashize Perezida  Paul Kagame uza kwitabira ibirori bifungura iyi mikino yahuye na Perezida w’u Burusiya, Vladimir Putin.

Umukuru w’Igihugu Paul Kagame (ibumoso) ubwo yari mu kiganiro na mugenzi we w’u Burusiya Vladimir Putin mu biro bye

Perezida Paul Kagame uretse kwitabira ibirori byo gufungura imikino y’igikombe k’Isi itangira uyu munsi, agomba no kureba umukino ufungura iri rushanwa. Ku munsi w’ejo hashize, ni bwo yahuye na Perezida w’u Burusiya Vladimir Putin, bagirana ibiganiro mu biro bye “Kremlin”.

Uyu munsi, umukino ufungura imikino y’igikombe k’Isi 2018 urahuza ikipe y’igihugu cy’u Burusiya na Saudi Arabia. Uyu mukino urabera kuri Sitade ya Luzhniki kuva saa kumi n’ebyiri (18h00) mu Burusiya, akaba ari saa kumi n’imwe mu Rwanda (17h00).

Umukino w’u Burusiya urayoborwa n’umusifuzi witwa Néstor Pitana ukomoka muri Argentina. Ikipe y’igihugu y’u Burusiya iri mu itsinda rya mbere (A) hamwe na Misiri, Saudi Arabia na Uruguay. Muri iri tsinda uyu mukino w’u Burusiya na Saudi Arabia ni wo uri bube  gusa undi mukino uzaba ejo tariki 15 Kamena 2018 uzahuza Misiri na Uruguay kuva saa kumi n’imwe (17h00) mu Burusiya akaba saa kumi  (16h00) mu Rwanda. Umukino uzabera kuri “Central Stadium” mu mujyi wa Yekaterinburg.

Imikino ya nyuma y’igikombe k’Isi 2018 izakomeza no mu matsinda atandukanye ikaba izasozwa tariki 15 Nyakanga 2018. Iyi mikino isanzwe iba buri myaka 4, ubuheruka muri 2014 yabereye muri Brazil, ikipe y’igihugu y’u Budage yegukana iki gikombe.

 

 

 

 

TANGA IGITEKEREZO

One Comment on “Igikombe k’Isi 2018: Kagame yahuye na Perezida w’u Burusiya”

Leave a Reply

Your email address will not be published. Required fields are marked *