18°C , Showers | Kigali-Rwanda
Minisitiri w'Ububanyi n'Amahanga akaba n'Umuvugizi wa Leta, Dr. Sezibera Richard, asanga amateka y'Afurika akwiye kuvugwa n'Abanyafurika

Igihe kirageze ngo amateka y’Afurika avugwe n’Abanyafurika – Dr. Sezibera

Yanditswe na Mutungirehe Samuel

Ku ya 15-05-2019 saa 07:09:37

Minisitiri w’Ububanyi n’Amahanga akaba n’Umuvugizi wa Guverinoma, Dr. Sezibera Richard, yatangaje ko igihe kigeze cyo kugira ngo amakuru y’Umugabane w’Afurika avugwe neza n’Abanyafurika ubwabo.

Minisitiri Sezibera asanga Abanyafurika bakwiye kuba ari bo bagaragaza iterambere umugabane ugezeho no kwishyira hamwe kugerwaho aho kugira ngo abandi bavuge ibitari byo kuri Afurika, usanga bigaragaza umugabane nk’uri inyuma bigatanga amakuru mabi.

Yabitangaje kuwa 14 Gicurasi 2019, ubwo yafunguraga inama Nyafurika ya 31 y’iminsi ine irimo kubera i Kigali, yateguwe n’Ishyirahamwe ry’Abakora akazi ko guhuza ibigo n’ababigana “African Public Relation Association”, igamije gukangurira Abanyafurika kugira uburyo batangaza ibiri ku mugabane wabo.

Minisitiri Sezibera yabanje kubahamiriza ko mu binyacumi bine by’imyaka bishize, Umugabane w’Afurika ari umwanya mwiza w’iterambere n’ubuhahirane, ariko hakiri byinshi abatuye uyu mugabane bagihura na byo mu gutangaza urugendo uwo mugabane ugifite.

Ati “Iyi ni yo mpamvu iri shyirahamwe ari ingenzi mu kudufasha gukomeza gukorera hamwe kuvuga ayo mateka, no kugira inama nk’iyi ngarukamwaka nk’ihuriro ry’abakora akazi ko guhuza ibigo n’abantu, inzobere mu itumanaho, abayobozi mu nzego nkuru za Leta n’abakora mu itangazamakuru, tukaganira, tukungurana ibitekerezo ku buryo bwiza bwo kuvuga amateka y’Afurika.

Kuva na kera amateka yacu yamye avugwa na ba kavamahanga, mu bitangazamakuru bya kera no muri ino minsi y’ikoranabuhanga. Kwigarurira uburyo bwo kwivugira amateka yacu, bizadufasha kuvuguruza ibibi bituvugwaho rimwe na rimwe bitagaragaza iterambere ryacu.”

Bamwe mu bitabiriye iki kiganiro cyatanzwe na Minisitiri Sezibera

Amb. Sezibera yatanze urugero, ko usanga mu makuru y’abo mu burengerazuba bw’Isi avuga ku mitwe y’iterabwoba nka Boko Haram, ruswa, ubukene, imyivumbagatanyo mu matora, guhunga ibihugu, iterabwoba.

Ati “Mfite amakuru y’urugero ko muri Amerika ubwaho, 8% gusa by’ibivugwa kuri Afurika bigaragara mu bitangazamakuru by’imbere mu gihugu n’ibiri mpuzamahanga usanga bivuga ku bucuruzi, ikoranabuhanga n’ubukungu muri Afurika mu gihe ibyaha usanga bikubye kabiri icyo kigero.

Ibi bitwereka ko hakiri icyuho hagati y’uko Afurika ivugwa mu bitangazamakuru bikomeye n’uko biri nyako kandi ntibitunguranye ko abayobozi bamwe usanga bavuga ibitandukanye n’uko umugabane wacu uri. Birigaragaza ko tutari aho tugomba kuba turi; Afurika iri kwigaragaza, ubukungu bwacu burimo kuzamuka neza, dufite umugabane utekanye kurusha imyaka icumi ishize, kandi dukomeje gushyira hamwe binyuze mu masezerano dushyiraho umukono ariko nk’ay’isoko rusange ku mugabane (CFTA).”

Dr. Sezibera yasobanuye ko nubwo bimeze bityo, Afurika ikigaragazwa nk’umugabane w’umwijima mu ruhando rw’itangazamakuru. Ati “Niba mu by’ukuri dushaka guhindura ibivugwa ku mugabane wacu, dukwiye gutangira kuvuga amateka y’Afurika bihereye kuri twe Abanyafurika, ku banyafurika, kandi muri Afurika.”

Minisitiri Sezibera asanga amateka y’Afurika adakwiye kuvuga n’abanyamahanga, ahubwo Abanyafurika ubwabo bakwiye gufata iya mbere mu kugaragaza ibibera muri Afurika n’iterambere rigenda rigerwaho

Yunzemo ko bidahagije gusa kuvuga amakuru y’Afurika, ahubwo ko bikenewe ko anavugwa neza, herekanwa ibyagezweho, ibiriho bitandukanye, amahirwe ahari, ikoranabuhanga no guhanga udushya, uko ubukungu buzamuka na demukarasi, n’ibindi bijyanye n’impano zitandukanye mu bijyanye n’ubugeni n’imyidagaduro.

Uwahoze ari Perezida wa Ghana kuva mu 2013 kugeza 2017, John Dramani Mahama, yavuze ko ikibazo Afurika ikunze kugira ari ukumenya ngo amakuru ni ayahe, ni nde ukwiye kuvuga; ibyo byatumye abandi ari bo bafata iya mbere mu kuvuga Afurika uko bishakiye.

Yanzuye ko nk’Abanyafurika, bakwiye kumenya ko bafite ururimi rwo kuvuga n’akanwa bikwiye gukoreshwa no mu kuvuga amateka yabo.

Uhagarariye ishyirahamwe ry’Abahuza ibigo n’ababigana mu Rwanda, Muhire Hubert, yavuze ko nk’Abanyarwanda by’umwuhariko abakiri urubyiruko, bafashe ingamba zo kugaragariza ukuri ku Rwanda, bakoresheje ukuri, imibare n’ibimenyetso bifatika.

Minisitiri w’Ububanyi n’Amahanga akaba n’Umuvugizi wa Leta, Dr. Sezibera Richard, asanga amateka y’Afurika akwiye kuvugwa n’Abanyafurika

TANGA IGITEKEREZO

Leave a Reply

Your email address will not be published. Required fields are marked *