18°C , Mostly cloudy with thunderstorms | Kigali-Rwanda
Minisitiri w'Abakozi ba Leta n'Umurimo, Kayirangwa Rwanyindo Fanfan ibumoso na Uwizeye Judith mu Nteko Ishinga Amategeko ubwo hasobanurwaga ibijyanye na pansiyo (Foto James R.)

Igihe cyo kujya muri pansiyo gishobora kuba imyaka 55

Yanditswe na TWAGIRA WILSON

Ku ya 06-03-2018 saa 07:48:53

Minisitiri w’Abakozi ba Leta n’Umurimo (MIFOTRA), Rwanyindo Kayirangwa Fanfan yabwiye Abadepite mu Nteko Ishinga Amategeko ko ikemezo cyo kugabanya imyaka y’abajyaga mu kiruhuko k’izabukuru ikaba imyaka 55 ivuye kuri 65 ari ingingo igiye kuganirwaho.

Minisitiri w’Abakozi ba Leta n’Umurimo, Kayirangwa Rwanyindo Fanfan ibumoso na Uwizeye Judith mu Nteko Ishinga Amategeko ubwo hasobanurwaga ibijyanye na pansiyo (Foto James R.)

Ibyo Minisitiri Rwanyindo yabivugiye mu Nteko rusange y’Umutwe w’Abadepite ejo hashize ku wa Mbere tariki 5 Werurwe 2018, ubwo yagezaga ku badepite ibirebana n’umushinga w’Itegeko ngenga  rigenga umurimo mu Rwanda.

Yavuze ko kugabanya iyi myaka ikaba 55 ivuye ku myaka 65, ari ingingo MIFOTRA igiye kuganiraho na Minisiteri y’Imari n’Igenamigambi (MINECOFIN) n’izindi nzego nka RSSB ifite mu nshingano guteganyiriza abakozi ba Leta bajya mu kiruhuko k’izabukuru.

Akaba yarasubizaga ibibazo bya bamwe mu badepite  barimo Hon. Mporanyi Theobald, watanze ibitekerezo bye kuri uwo mushinga w’itegeko.

Hon. Mporanyi yasabye ko imyaka y’abajya mu zabukuru yatekerezwaho ikagabanywa, ikaba 55 aho kuba 65, cyane ko byazaha amahirwe urubyiruko rurangiza kwiga kare  rufite imyaka 20, no munsi yayo.

Ati:“Imyaka igabanutse ikaba 55 byatuma n’umukozi wa Leta ajya mu kiruhuko kare, agifite n’imbaraga zo kwikorera ibye, adakomeje kuba umuzigo kuri Leta.”

Asubiza abadepite kuri iki kibazo cyo kugabanya imyaka ya pansiyo, Minisitiri w’Abakozi ba Leta n’Umurimo, Rwanyindo Kayirangwa, yemera ko ari byo, ari ikibazo  kimaze igihe kinini  kibazwaho cyane  n’abantu barimo n’abakozi ba Leta, uretse ko ngo MIFOTRA isanga hagomba kubaho ibiganiro n’izindi nzego zifite mu nshingano ubwitegenyirize bw’abakozi.

Abadepite bagejejweho na Minisitiri w’Abakozi ba Leta n’Umurimo, Rwanyindo Kayirangwa Fanfan ko ikemezo cyo kugabanya imyaka y’abajyaga mu kiruhuko k’izabukuru

Ati: “Ni byo nk’uko mubivuga ni bimwe mu byagira uruhare mu kugabanya umubare munini w’abashomeri. Ndemeranya namwe uwo mwanzuro, kandi turabizi ko hari benshi bamaze igihe kinini babyibazaho ku birebana no kugabanya imyaka y’abajya mu kiruhuko k’izabukuru, ikaba 55 aho kuba 65, ubu ngiye kugishyikiriza MINECOFIN na RSSB ishinzwe ubwiteganyirize bw’abakozi ba Leta tukiganireho hafatwe umwanzuro ukwiye, kuko MIFOTRA itafata ikemezo yonyine’’.

Ku byerekeranye n’ikibazo cy’umushahara fatizo (SMIG: Salaire Minimum, Interproffessionel Guarantee),   ubu bimaze imyaka myinshi itarajyaho, nk’uko byagarutsweho na bamwe mu badepite bari mu nteko.

Minisitiri Rwanyindo Kayirangwa yasubije ko ari byo koko umushahara fatizo ari ngombwa, kandi ko hari ibyatangiye gukorwa mu myaka ya 2015, birimo kwiga umushinga ushyiraho SMIG, ubu hakaba harakozwe inyigo zikenewe.

Ati Ubu twatangiye guhuza amakuru twafashe icyo gihe mu 2015, kugira ngo dutangire ibiganiro n’inzego z’abikorera mu gihugu, ku buryo ikibazo cyo gushyiraho umushahara fatizo cyakemuka, cyabanje kuganirwaho n’inzego zitandukanye.”

 

TANGA IGITEKEREZO

Leave a Reply

1 Comment on "Igihe cyo kujya muri pansiyo gishobora kuba imyaka 55"

avatar
Sort by:   newest | oldest | most voted
uwiragiye
Guest

nibyiza cyane bizatuma nabanyeshuri biga cyane