19°C , Mostly cloudy | Kigali-Rwanda
Perezida Kagame yaraye agiranye ibiganiro na Minisitiri w'Intebe wa Quebec, i Erevan muri Armenia, aho bombi bashyigikiye kandidatire ya Mushikiwabo

Icyo Mushikiwabo avuga nyuma ya video yagaragayemo abyina

Yanditswe na Imvaho Nshya

Ku ya 11-10-2018 saa 07:38:23

Minisitiri Louise Mushikiwabo uri muri Armenia aho uyu munsi yitezwe gutorerwa aza kuyobora Umuryango wa Francophonie, yagize icyo avuga kuri video yakwirakwiye agaragaramo abyina.

Ni imbyino nyarwanda yabyinnyemo mu ijoro ryakeye i Erevan muri Armenia, aho ategerejwe gutorerwa kuyobora uyu muryango ubumbatiye ibihugu 84 bikoresha Igifaransa.

Mushikiwabo yanditse kuri Twitter ati, “Ibyerekeye imbyino nyarwanda, ndagerageza”. Yasubizaga Berize Kariza ushinzwe ubukerarugendo mu Kigo cy’Igihugu cy’Iterambere (RDB) wari wasangije iyo video abamukurikira kuri Twitter.

Gusa nubwo abyita kugerageza, benshi mu bagize icyo bavuga ku mibyiniro ye, bagaragaje ko bayikunze ndetse ko batari bazi ko abyina neza kuriya.

Uwitwa Pasteur Byabeza ahamya ko Mushikiwabo ari “umugore ufite impano nyinshi”

Karangwa Gaston we ubanza yabuze amagambo yasobanura uko yishimye, ubundi ashyiraho akavideo k’umugabo wishimye ukoma amashyi.

Uwitwa Ruzindana Rugasaguhunga we yakoze igisa n’umuvugo kigira kiti, “Ndumva intsinzi irimo inkomanga”, ubundi yomekaho video ya Mushikiwabo abyina.

Mushikiwabo ahanganye na Michaelle Jean wo muri Canada usanzwe ayobora uyu muryango, ariko udashyigikiwe n’igihugu cye cya Canada.

Perezida Kagame yaraye muri Armenia aho yagiye gushyigikira Mushikiwabo.

Perezida Kagame ubwo yageraga i Erevan ahabera inama nkuru ya 17 y’ibihugu bikoresha Igifaransa, kuri uyu wa Gatatu

Ibiro bya Perezida Kagame muri iki gitondo byatangaje ko ageze ahagomba kubera iyi nama ya 17 y’ibihugu bikoresha Igifaransa, ari na yo iza kuberamo amatora y’Umunyamabanga Mukuru w’uyu muryango.

Mushikiwabo natorwa, araba abaye Umunyafurikakazi wa mbere utorewe kuyobora Francophonie.

Michaelle Jean yagiye ku buyobozi bwa Francophonie kuwa 20 Ugushyingo 2014 mu nama nkuru ya 15 y’uyu muryango.

Michaelle Jean yavukiye muri Haiti mu 1957, agera i Quebec muri Canada mu 1968 ari hamwe n’ababyeyi be bahunze ubutegetsi bwa François Duvalier.

Guverinona ya Canada n’iya Quebec zamaze gutangaza ko zitamushyigikiye, ahubwo ko zishyigikiye Mushikiwabo ushyigikiwe n’Umuryango wa Afurika yunze Ubumwe na Perezida w’u Bufaransa, Emmanuel Macro.

Mushikiwabo anezerewe hamwe n’abaminisitiri batandukanye bo muri Afurika bashinzwe ububanyi n’amahanga, bamushyigikiye i Erevan

TANGA IGITEKEREZO

One Comment on “Icyo Mushikiwabo avuga nyuma ya video yagaragayemo abyina”

  1. Twizeye intsinzi ya Louise Mushikiwabo mu ruhando mpuzamigabane icyi nicyo gihe why not impossible for Rwandan. We can

Leave a Reply

Your email address will not be published. Required fields are marked *