27°C , Partly sunny | Kigali-Rwanda

Ibyavuye mu Bushakashatsi ku Mibereho Rusange y’ingo mu Rwanda (2016/17) byaratangajwe

Yanditswe na Ntawitonda Jean Claude

Ku ya Dec 19, 2018 saa 11:28

Ku itariki ya 06 Ukuboza 2018, Ikigo cy’Igihugu cy’Ibarurishamibare mu Rwanda (NISR) cyatangaje ibyavuye mu Bushakashatsi ku Mibereho Rusange y’ingo mu Rwanda ku nshuro ya gatanu buzwi ku izina rya (EICV5) bwakozwe kuva mu Kwakira 2016 kugeza mu Kwakira 2017.

Impamvu nyamukuru y’ubu bushakashatsi ni ugutanga amakuru agezweho ku ntambwe imaze guterwa mu gukurikirana no kugenzura igabanuka ry’ubukene no gutanga andi makuru ku bukungu n’imibereho y’ingo mu Rwanda, ndetse n’ibindi bipimo bigaragaza uko imibereho y’abaturage ihagaze.

Ubu bushakashatsi ku mibereho rusange y’ Ingo ku nshuro ya gatanu (EICV5) bukorwa n’ Ikigo cy’ Igihugu cy’ Ibarurishamibare mu Rwanda, gifatanyije n’ abafatanyabikorwa batandukanye. Bwatangiye gukorwa mu mwaka wa 2000/01. Bukorwa buri myaka itatu, ariko mbere ya EICV4 (Ukwakira 2013 – Ukwakira 2014), bwakorwaga buri myaka itanu.

AMWE MU MAKURU YAVUYE MURI UBU BUSHAKASHATSI:

Hagendewe ku byagaragajwe n’ubushakashatsi bwa gatanu ku mibereho rusange y’ingo, biragaragara ko hari intambwe yatewe mu mibereho myiza y’Abanyarwanda. Ijanisha ry’Abanyarwanda bakennye ryavuye kuri 39.1% muri 2013/14 rigera kuri 38.2% muri 2016/17.

AHO BYAVUYE: UBUSHAKASHATSI KU MIBEREHO Y’INGO MU RWANDA

Muri icyo gihe kandi, Abanyarwanda bari mu bukene bukabije bavuye ku ijanisha rya 16.3% muri 2013/14 bagera kuri 16% muri 2016/17. Naho Ubusumbane mu bukungu bwo bwaragabanutse buva kuri 0.447 muri 2013/14 bugera kuri 0.429 muri 2016/17 nk’uko bigaragazwa n’igipimo cyitwa “Gini”.

Imibereho myiza ishobora kureberwa mu bindi bipimo bitandukanye bitari ukureba ubukene mu ndorerwamu y’amafaranga gusa.

Ikigereranyo cy’abaturage bafite ubwishingizi mu kwivuza cyazamutseho kane ku ijana kivuye kuri 70% mu mwaka wa 2013/14 kigera kuri 73.9% mu mwaka wa 2016/17;

Umubare w’ingo zikoresha amashanyarazi mu gucana yaba akomoka ku miyoboro rusange cyangwa ku mirasire y’izuba, wariyongereye uva ku kigereranyo cya 21.5% mu mwaka wa 2013/14 ugera kuri 34.4% mu mwaka wa 2016/17;

Umubare w’ingo zitunze telefoni zigendanwa na wo wakomeje kwiyongera uva kuri 63.6% mu mwaka wa 2013/14 ugera kuri 66.9% muri 2016/17;

Ikigereranyo cy’ingo zitunze radiyo cyazamutse ku buryo bugaragara mu mwaka wa 2017 ugereranyije na 2014 (kiva kuri 59.8% kigera kuri 73.8%);

Ingo zikoresha murandasi (Internet), zavuye ku kigereranyo cya 9.3% mu mwaka wa 2014 zigera kuri 17.2% muri 2017;

Ikigereranyo cy’ingo ziba mu nzu zikurungiye (zishashemo) hasi hakoreshejwe sima cyarazamutse kiva kuri 21.1% mu mwaka wa 2013/14 kigera kuri 25.8% muri 2016/17;

Umubare w’ingo ziba mu nzu zisakaje amabati wariyongereye ugera kuri 67.3% mu mwaka wa 2016/17 uvuye kuri 61.1% mu mwaka wa 2013/14.

Ibindi bipimo mushobora kubisanga ku rubuga rw’Ikigo cy’Igihugu cy’Ibarurishamibare, www.statistics.gov.rw

ZIMWE MU MPAMVU ZATUMYE IGABANUKA RY’UBUKENE RIGENDA BIGURUNTEGE

Ubushakashatsi bwa gatanu ku mibereho rusange y’ingo bwatangiye mu Kwakira 2016 bugeza mu Kwakira 2017 bwahuriranye n’ibihe bidasanzwe kuko muri icyo gihe u Rwanda rwahuye n’ibizazane. Bimwe muri ibyo twavuga:

Impeshyi idasanzwe yabaye mu mwaka wa 2016 mu gihembwe cya kabiri cy’ihinga yagize ingaruka ku musaruro w’ubuhinzi. Ibyo byatumye habaho igabanuka ry’ibiribwa n’izamuka ry’ibiciro mu mwaka wa 2017. Byatumye ubushobozi bwo kugura ibintu ku isoko bugabanuka, ndetse n’ubwo kwihaza mu biribwa muri rusange. Ibi kandi ntabwo byagaragaye mu Rwanda gusa, kuko ibihugu byinshi byo munsi y’Ubutayu bwa Sahara byahuye n’ingaruka z’imihindagurikire y’ikirere muri icyo gihe. Ku Rwanda, ingaruka zavuyemo ni uko igabanuka ry’ubukene mu baturage ritihuse nk’uko byagenze mu myaka yashize.

Uwo musaruro muke mu buhinzi wabangamiye kandi kwiyongera k’umusaruro mbumbe w’u Rwanda (GDP), byatumye ubukungu butazamuka neza mu mwaka w’ingengo y’imari 2016/17 (Nyakanga 2016 – Kamena 2107)’ igihe ubushakashatsi bwabaga. Muri iki gihe, Umusaruro mbumbe w’u Rwanda wiyongereye ku kigero kiri hasi ugereranyije n’imyaka icumi ishize y’ingengo y’imari.

UMWANZURO

Muri rusange, Ubushakashatsi ku nshuro ya gatanu ku Mibereho y’Ingo buratuma tugira ishusho nyayo kandi yumvikana ku mpinduka zabaye mu mibereho rusange y’abaturage kuva mu mwaka wa 2014.

Ibyavuye muri ubu bushakashatsi bigaragaza ko ibipimo bitandukanye by’imibereho myiza y’abaturage bikomeje kuba byiza; twavuga ibipimo bigaragaza imiturire, ikoreshwa ry’amashanyarazi, ikoreshwa ry’ikoranabuhanga, n’ ibindi. Hari ibindi bipimo bigaragaza ko nta mpinduka zabaye cyane muri icyo gihe. Twavuga nk’ibirebana n’uburezi.

Ubu bushakashatsi kandi bwongeye gushimangira ko imihindagurikire y’ikirere ituma ingo zitari nkeya zihura n’ibibazo bibangamira imibereho myiza yazo ya buri munsi, harimo n’ubushobozi bwo guhaha. Bityo, igabanuka ry’ubukene n’ubukene bukabije mu Banyarwanda ntiryihute uko bikwiye.

Ni yo mpamvu hakenewe gushyirwaho ingamba zafasha abaturage mu guhangana n’ibihe bidasanzwe cyane cyane ibihungabanya ubukungu ndetse n’ihindagurika ry’ikirere ndetse no kongera imbaraga muri gahunda zifasha abaturage bahura n’ibyo bihe bidasanzwe.