17°C , Partly cloudy | Kigali-Rwanda
Umuvugizi w’Urwego rw’Ubugenzacyaha (RIB), Mbabazi Modeste

Ibyaha by’ingengabitekerezo ya Jenoside mu cyunamo byaragabanutse – RIB

Yanditswe na Kayitare Jean Paul

Ku ya 15-04-2019 saa 17:15:32

Urwego rw’Igihugu rw’Ubugenzacyaha RIB, ruratangaza ko ibyaha by’ingengabitekerezo ya Jenoside byagabanutse ugereranyije n’imyaka ishize.

Mu kiganiro kihariye uru rwego rwagiranye n’Imvaho Nshya, Umuvugizi wa RIB, Mbabazi Modeste, yasobanuye uburyo ibyaha by’ingengabitekerezo ya Jenoside byagabanutse.

Yagize ati “Ibyaha by’ingengabitekerezo ya Jenoside byaragabanutse ukurikije imyumvire y’Abanyarwanda n’uburyo bitabiriye icyunamo, ukareba noneho uburyo abantu batanze ubuhamya, bigaragara ko babohotse. Baba abakoze Jenoside bagiye batanga ubuhamya, bakagaragaza ibyo bakoze no kuvuga ibintu uko biteye.”

Mbabazi akomeza avuga ko ngo iyo urebye abagaragaweho ibyaha by’ingengabitekerezo ya jenoside n’ibifitanye isano na yo birimo kugoreka ukuri kuri Jenoside, birimo ivangura n’amacakubiri, ngo usanga byaragaragaye ku bantu basa n’abadasobanukiwe cyane, bitandukanye n’ibyagiye bigaragara mu myaka yashize.

Akomeza agaragaza uko ibi byaha byagabanutse, agashimangira ko ibyo biha urwego rwa RIB abereye umuvugizi, hakoreshejwe uburyo bw’imbuga nkoranyambaga, terefoni bibafasha kumenya iyo mibare.

Usanga mbere byari bigoranye cyane kubivuga ariko ubu ngo usanga abantu babivuga, bakabitanga cyangwa bagatanga amakuru mu buryo bwihuse.

Mbabazi agaragaza ingano y’ibyaha by’ingengabitekerezo ya Jenoside byagaragaye mu gihe k’icyumweru k’icyunamo mu myaka ibiri ishize.

Ati “Mu mwaka 2017 hagaragaye ibyaha 114 ariko nabwo abantu batitabira kubivuga naho ubundi bigaragara ko byari kurenga uwo mubare. Mu 2018 hagaragaye ibyaha 72 kandi no muri uyu mwaka wa 2019 hagaragara 72 ariko wareba abo bigaragaraho ugasanga batandukanye n’ab’umwaka ushize.”

Umuvugizi w’Urwego rw’Ubugenzacyaha (RIB), Mbabazi Modeste

Urwego rw’Igihugu rw’Ubugenzacyaha rutangaza ko nubwo ibyaha by’ingengabitekerezo ya Jenoside bigaragara, ko hari n’imbagara zo kubirwanya zashyizwemo n’ubuyobozi bw’igihugu kugira ngo iki cyaha k’ingengabitekerezo gicike burundu.

Mu gihe k’icyumweru k’icyunamo guhera tariki 07 Mata kugeza tariki 13 Mata 2019, mu Ntara y’Iburasirazuba hagaragaye ibyaha 27 by’ingengabitekerezo ya Jenoside, mu Ntara y’Amajyepfo hagaragara ibyaha 25, Iburengerazuba hagaragara ibyaha 3, mu Ntara y’Amajyaruguru hagaragara ibyaha 7 naho mu Mujyi wa Kigali hagaragara ibyaha 10 by’ingengabitekerezo ya Jenoside.

Perezida wa IBUKA, Prof. Dusingizemungu Jean Pierre, mu kiganiro yatangiye mu muhango wo kwibuka Jenoside yakorewe Abatutsi ku kicaro cya Polisi y’igihugu ku Kacyiru tariki ya 12 Mata 2016, yagaragaje ko mbere itegeko rihana ingengabitekerezo ya Jenoside ryateganyaga igihano gishobora kugeza ku gifungo cya burundu ku wahamwe nayo.

Ibihano

Itegeko Nº 59/2018 ryo ku wa 22/8/2018 ryerekeranye n’icyaha cy’ingengabitekerezo ya jenoside n’ibyaha bifitanye isano na yo, riteganyiriza ibihano uhamwe n’ibyo byaha.
Ingingo ya 10 ivuga ko gusenya, konona cyangwa gutesha agaciro urwibutso rwa jenoside cyangwa ahashyinguye imibiri y’abazize jenoside bihanishwa igifungo kitari munsi y’imyaka icumi (10) ariko kitarenze imyaka cumi
n’itanu (15) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW).
Ingingo ya 11 yo umuntu ugira imyitwarire cyangwa ukora igikorwa kigamije gutoteza, gutera ubwoba,
gutesha agaciro, kwigamba, gushinyagurira, gutuka cyangwa kwangiza umutungo w’umuntu bishingiye ko ari uwacitse ku icumu rya jenoside, aba akoze icyaha, bihanishwa igifungo kitari munsi y’imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda atari munsi y’ibihumbi magana atanu (500.000 FRW) ariko atarenze miliyoni imwe (1.000.000 FRW).

TANGA IGITEKEREZO

Leave a Reply

Your email address will not be published. Required fields are marked *