21°C , Partly sunny | Kigali-Rwanda
Abayobozi b'inzego zitandukanye mu ntara y'Iburasirazuba bitabiriye inama, basaba aborozi kumvira amabwiriza bahawe

Iburasirazuba:Abaragira inka mu kigo cya gisirikare bibukijwe ko bitemewe

Yanditswe na HITIMANA SERVAND

Ku ya 06-03-2018 saa 08:48:14

Ubuyobozi bw’Intara y’Iburasirazuba bwihanangirije aborozi bo mu turere 3 dukora ku kigo cya gisirikare cya Gabiro, baragira amatungo yabo muri iki kigo, bubibutsa ko bitemewe kandi uzabifatirwamo azahanwa.

Abayobozi b’inzego zitandukanye mu ntara y’Iburasirazuba bitabiriye inama, basaba aborozi kumvira amabwiriza bahawe

Byatangarijwe mu nama yabereye mu kigo cya gisirikare cya Gabiro, yahuje umuyobozi w’Intara y’Iburasirazuba Mufulukye Fred, ubuyobozi bwa RAB, inzego z’umutekano, abayobozi n’abahagarariye aborozi mu turere twa Nyagatare, Gatsibo na Kayonza.

Guverineri w’Intara y’Iburasirazuba Mufulukye Fred, yatangiye yibutsa aborozi akamaro k’ibikorerwa muri iki kigo, anagaragaza ko bidashobora kubangikanywa no kuhororera.

Nyuma y’ibyemezo byagiye bifatwa ariko ngo aborozi bakabirengaho, uyu muyobozi yagaragarije aba borozi ibyemezo bishya kandi bikarishye biheruka gushyirwaho n’inama njyanama z’uturere twa Gatsibo, Nyagatare na Kayonza.

Izi nama njyanama zose zahurije ku mwanzuro umwe w’uko inka zose zizongera gufatirwa mu kigo cya Gabiro, zizajya zitezwa cyamunara amafaranga avuyemo agashyirwa mu isanduku ya Leta.

Guverineri Mufulukye yagize ati “Hagiye hafatwa ingamba zitandukanye zibabuza kuragira muri iki kigo mukabirengaho, twashyizeho amande, ariko ngira ngo mwabaraga inyungu mukuramo mugasanga nta cyo bibabatwaye.

Ubu rero ni ukubihanangiriza bwa nyuma tunabagaragariza ikemezo gikakaye cyafashwe, aho uzongera gusuzugura amabwiriza akazana inka mu kigo zizatezwa cyamunara, amafaranga agashyirwa mu kigega cya Leta.”

Guverineri avuga ko uyu wari umwanya wo kubamenyesha ibi byemezo, kugira ngo babyirinde kuko intego atari iyo guhana, ahubwo ikigamijwe ari ugushakira ubwisanzure iki kigo no kurinda abaturage impanuka bagiriramo mu gihe k’imyitozo.

Ikindi gikomeye ni ukwirinda ikwirakwizwa ry’indwara y’uburenge ikunze gukururwa n’abazerereza amatungo muri iki kigo.

Bamwe mu borozi bagaya bagenzi babo batumva amabwiriza y’ubuyobozi. Babwiye Guverineri w’intara ko bashyigikiye ibyemezo byafashwe, basaba bagenzi babo bagitsimbaraye ku kuragira muri iki kigo ko bakwiye kubicikaho.

Kabitiri Vedaste wororera mu murenge wa Murundi, yagize ati “Ba Nyakubahwa nta bwo aborozi b’Iburasirazuba dukwiye kuba ibigande. Ngewe naragiye muri iki kigo ariko aho amabwiriza aziye nabicitseho, ngabanya inka zange nsigarana izikwiriye mu rwuri rwange.

Turi bakuru dukwiye kumva, kandi ibyemezo mwafashe nge mbona ko nta kibazo biteye cyane ko mubanje no kubimenyesha abo bireba. Bagenzi bange batarazinukwa kuragira muri iki kigo ndabagira inama yo kureba ibibazo birimo, ari ibyo biteza, ibyo bateza bagenzi babo n’ibyo bateza igihugu muri rusange, bakororera mu nzuri zabo.”

Umuyobozi ushinzwe ubworozi muri RAB, Dr. Christine Kanyandekwe, yatangaje ko Leta yashyizeho amahirwe menshi afasha aborozi korora mu buryo bugezweho, abirirwa bazerereza amatungo bakaba bakwiye kubicikaho, kuko binyuranyije na gahunda ya Leta yo korora kijyambere.

Nyuma y’iyi nama yahuje ubuyobozi mu nzego zitandukanye, hafashwe umwanzuro ko inka zose zari zarafatiwe muri iki kigo zisubizwa ba nyirazo nk’amahirwe ya nyuma, izizongera gufatirwamo zo zikazajya zitezwa cyamunara nk’uko byemejwe n’inama njyanama z’uturere dukora kuri iki kigo cya Gabiro.

TANGA IGITEKEREZO

Leave a Reply

Be the First to Comment!

avatar