19°C , Partly cloudy | Kigali-Rwanda
Guverineri w’Intara y’Iburasirazuba Mufulukye Fred yasobanuye ingamba zafatiwe ibibazo biri mu butaka

Iburasirazuba: Iby’ingenzi kuri komisiyo yo gukemura ibibazo biri mu butaka

Yanditswe na HAKIZIMANA YUSSUF

Ku ya 11-10-2018 saa 18:39:09

Abatuye mu Ntara y’Iburasirazuba bafite ibibazo bishingiye ku butaka n’abafite inzuri barakangurirwa kuzitabira gahunda yo kubikemura yegereje.

Bizakemurwa na komisiyo yashyizweho nyuma yo kubona ko muri iyi ntara hari ibibazo byinshi kandi bimaze imyaka byarabaye insobe.

Intara y’Iburasirazuba ni yo ifite ubutaka bunini, hari ibice byagenewe guhingwamo n’ibindi byahariwe ubworozi.

Iyo komisiyo yihariye izakora mu mezi abiri ikurikirane ibibazo biri mu butaka byose ibishakire umuti.

Guverineri w’Intara y’Iburasirazuba, Mufulukye Fred, avuga ko inshingano z’iyo komisiyo ari “ugusesengura neza imikoreshereze y’ubutaka bwatanzwe, kureba ibibazo bihari no kubishakira ibisubizo”

Abagize iyo komisiyo “bashobora kubikemurira aho bageze cyangwa bagatanga raporo ku zindi nzego zadufasha kubikemura,” nk’uko Mufulukye abisobanura.

Iyi komisiyo yashyizweho iyobowe na Guverineri w’Intara y’Iburasirazuba, ari kumwe n’ukuriye Ingabo z’u Rwanda muri iyi Ntara n’Umujyi wa Kigali, umukomiseri muri Polisi y’Igihugu, izindi nzego zishinzwe umutekano, abakozi bo muri Minisiteri y’Ubutaka n’Amashyamba, bamwe bakozi b’iyi Ntara n’ukuriye Ikigo k’Igihugu gishinzwe Ubuhinzi n’Ubworozi (RAB) mu Ntara y’Iburasirazuba n’abanyamategeko.

Abo bose bazajya bigabanyamo amatsinda azafasha abaturage gukemura ibibazo biri mu butaka cyane cyane mu karere ka Nyagatare, Gatsibo na Kayonza.

Guverineri Mufulukye avuga ko nyuma yo gusaranganya ubutaka ari bwo hatangiye kugaragara ibibazo mu butaka kuko harimo abatangiye kubugurisha ibice bice, ababuhinzemo kandi bugenewe kororerwamo, habayeho ubwiyongere bw’abaturage kandi bashaka ubutaka.

Mu ngero zitangwa ni izo mu Karere ka Nyagatare aho hegitari 1943 zagurishijwe ibice bice, kuri izi hegitari izarimo ibibazo byabonewe ibisubizo zingana na 62%.

Ku buso bwari mu Karere ka Nyagatare mu mwaka wa 2002 bwari kilometerokare 1741, aho hari hatuye abaturage ibihumbi 205, nyamara nyuma y’imyaka 10 gusa, ni ukuvuga muri 2012 abaturage bari ibihumbi 406 barenga.

Yagaragaje uburyo gahunda yo gusaranganya ubutaka yari nziza igamije gufasha abaturage kuzamuka mu iterambere ntawe usigaye inyuma ariko abaturage bamwe ntibayubahirije ngo bakoreshe ubutaka bwabo mu kwiteza imbere bakurikije icyo bwagenewe.

Guverineri Mufulukye yagize ati: “Mu mwaka wa 2007/2008 hagiyeho komisiyo ishinzwe ibijyanye no gusarangaya ubutaka, Nyakubahwa Perezida wa Repubulika yatanze umurongo ngenderwaho nyuma yo kubona ko hari Abanyarwanda bafite ubutaka abandi batabufite, habayeho kubusaranganya. Byarakozwe ku buryo bwiza bihabwa n’amabwiriza, hari ubwatanzwe kugira ngo buteze imbere ubuhinzi hari n’ubwatanzwe kugira ngo buteze imbere ubworozi, gusa hari abatarumvise iyi gahunda ngo bayubahirize”.

Guverineri w’Intara y’Iburasirazuba Mufulukye Fred yasobanuye ingamba zafatiwe ibibazo biri mu butaka

Mu kiganiro n’Imvaho Nshya, Ruboneka Silver, Umunyamabanga Nshingwabikorwa w’Umurenge wa Rwimiyaga mu karere ka Nyagatare, yavuze ko iyi komisiyo bizeye ko izabafasha cyane, ibibazo bigaragara mu butaka bigakemuka.

Yagize ati: “Ufite ibibazo by’abaturage batujwe mu midugudu badafite ibyangombwa, hari abafite inzuri badakorera neza uko bikwiye, komisiyo izatwunganira ibyo byose tubibonere ibisubizo”.

Bamwe mu bagize iriya komisiyo yashyizweho ngo ikemure ibibazo bishingiye ku butaka, bagaragaje bimwe mu bibazo bizibandwaho muri iki gihe cy’amezi abiri, hari ibirebana n’ahari inzuri zaciwemo ibice, ahari ubutaka bwatanzwe budakoreshwa cyangwa bukoreshwa nabi, abaturage batujwe mu midugudu hari ubutaka bwatanzwe cyangwa abatujwe mu midugudu ariko ari mu manegeka.

TANGA IGITEKEREZO

Leave a Reply

Your email address will not be published. Required fields are marked *