21°C , Partly sunny | Kigali-Rwanda
Umuyobozi Mukuru w’Ikigo gishinzwe imicungire n’imikoreshereze y’ubutaka mu Rwanda Mukamana Esperance yasabye abaturage kubyaza umusaruro ubutaka

Iburasirazuba: Ibibazo by’ingutu biri mu butaka byahagurukiwe

Yanditswe na HAKIZIMANA YUSSUF

Ku ya 07-10-2018 saa 10:30:18

Ubuyobozi bw’Intara y’Iburasirazuba n’Ikigo cy’Igihugu cy’Ubutaka barizeza gukemura ibibazo biri mu mitangire y’ibyangombwa by’ubutaka, bagasaba abaturage gukoresha ubutaka neza.

Mu bibazo byagaragajwe mu nama yigaga ku bibazo by’ubutaka mu Ntara y’Iburasirazuba yabereye i Rwamagana ku biro by’Intara, harimo n’icy’ubutaka budakoreshwa ibyo bwagenewe.

Umuyobozi Mukuru w’Ikigo gishinzwe imicungire n’imikoreshereze y’ubutaka avuga ko Intara y’Iburasirazuba ari yo ifite ibibazo byinshi by’ubutaka, hakaba hakenewe uburyo bw’umwihariko bwo kubikemura.

Dr. Mukamana Esperance yagize ati, “Abatunze ubutaka bari bahawe bugenewe kororeraho hagiye gukorwa gahunda y’uko bakoresha neza buriya butaka bahororera, ariko hari n’igice cy’ubwo butaka bahingamo kugira ngo bashobore kwiteza imbere.

Usibye ikibazo cy’abahinga mu butaka bwagenewe ubworozi, hari n’ikibazo cy’abantu bagiye bagurisha ubutaka bakigira Uganda ubutaka butarandikwa ku babuguze.

Dr. Mukamana ati “Icyo kibazo twakibonye mu Karere ka Nyagatare na Gatsibo, ababuguze usanga basigaye mu kibazo cyo kubona ibyangombwa kuko kugira ngo akibone ni uko kwa noteri hagomba kuboneka uwaguze n’uwagurishije kugira ngo noteri yemeze bwa bugure, ikibazo cyagiye kibaho ni uko ba bandi babasigiye icyangombwa gusa kandi ibi ntibihagije.”

Yakomeje agira ati “Twasabye abayobozi ko bigisha abaturage mu nama zisanzwe ndetse n’icyumweru cyahariwe gutanga serivisi y’ubutaka (land week) ko ubugure bw’ubutaka cyangwa ihererekana ry’ubutaka rikorewe imbere ya noteri ari ryo rifite agaciro.”

Umuyobozi Mukuru w’Ikigo gishinzwe imicungire n’imikoreshereze y’ubutaka mu Rwanda Mukamana Esperance yasabye abaturage kubyaza umusaruro ubutaka

Hanagagajwe uburyo bamwe mu bakozi bo mu turere batanga ibyangombwa batitaye ku bishushanyombonera, ahateganyijwe umuhanda umuturage yarahawe ikemezo cyo kuhatura.

Guverineri w’Intara y’Iburasirazuba Mufulukye Fred yemeza ko ibibazo biri mu ntara ayoboye bishingiye ku butaka biyemeje kubishakira ibisubizo.

Yagize ati: “Hari ubutaka bwatanzwe kugira ngo buteze imbere ubworozi, uyu munsi tubona ko bwakoreshejwe nabi usanga korora bikorwa nabi, dukeneye korora neza, dukeneye amata n’inyama kandi ibi byose kugira ngo bikorwe dukeneye ubutaka.

Mufulukye avuga ko “hari henshi usanga ubutaka butarateguwe neza ba nyirabwo babuhawe” bityo ugasanga “nta kintu kiriho”, hakaba hashyizweho yihariye yo kubisuzuma.

Inkuru bifitanye isano wasoma:

Iburasirazuba: Ubujura muri serivisi z’ubutaka bwavugutiwe umuti

TANGA IGITEKEREZO

Leave a Reply

Your email address will not be published. Required fields are marked *