28°C , Sunny | Kigali-Rwanda

Iburasirazuba: Ba rwiyemezamirimo b’urubyiruko bahize abandi bahawe ibihembo

Yanditswe na Uwimana Donatha

Ku ya 11-09-2019 saa 18:39:33

Mu Ntara y’Iburasirazuba habaye amarushanwa ya ba rwiyemezamirimo b’urubyiruko. Abatsindiye ibihembo bose bakaba bazahatana n’abandi ku rwego rw’Igihugu.

Aya marushanwa asanzwe aba buri mwaka yitwa ‘Youth Connect Award’ akaba ategurwa na Minisiteri y’Urubyiruko, mu Ntara y’Iburasirazuba yahuje ba rwiyemezamirimo baturutse mu turere tugize iyo ntara.

Uwabaye uwa mbere ku rwego rw’Intara y’Iburasirazuba ni Umuhesha Campany yo mu karere ka Bugesera ifite urubuga www.umuhesha.rw ruhuza abakozi bo mu ngo n’abakeneye, iyi kampani ikaba yarahembwe amafaranga y’u Rwanda 1.500.000.

‘CCE Business Group’ na yo yo mu karere ka Bugesera ihinga ikanatunganya urusenda yaje ku mwanya wa kabiri ihembwa amafaranga 1.000.000.

‘East Africa Business Support’ yabaye iya gatatu icungira umutekano imodoka nini zambukiranya umupaka ndetse ikohereza n’ubutumwa na yo yahembwe Frw 1.000.000 ndetse na Karwanira Ferdinand uhagarariye koperative ikora ibikoresho by’amarerero y’abana mu mbaho wabaye uwa kane.

Umunyamabanga Nshingwabikorwa w’Intara y’Iburasirazuba, Habimana Kizito yavuze ko yashimishijwe na ba rwiyemezamirimo barushanyijwe ku dushya bagaragaje kuko twose tuza dusubiza ibibazo bihari.

Yashimiye kandi ba rwiyemezamirimo bose bitinyutse bagashyira imishinga yabo mu bikorwa, ashishikariza n’abandi gutinyuka bagatangira kandi bakagaragaza ikoranabuhanga mu byo bakora.

Yabwiye urubyiruko ko rugomba guharanira kuba ba rwiyemezamirimo mpuzamahanga kandi rukumva ko ruzabyigezaho. Urubyiruko rwashishikarijwe gutangira kare, bagahera kuri bike bafite, bakagira ikinyabupfura, ntibasesagure kandi bakamenya kuzigama.

Ati “U Rwanda rurimo amahirwe menshi, icyo mukeneye ni ukureba kure mukabasha kuyabona no kuyabyaza umusaruro.”

Umuhuzabikorwa w’Inama y’Igihugu y’Urubyiruko, Mwesigwa Robert, yabwiye abitabiriye aya marushanwa ko icyo ubuyobozi bushyize imbere ari ugufasha urubyiruko kwihangira imirimo ariko nanone ko urubyiruko narwo rusabwa gutekereza cyane.

Arwibutsa ko icyo basabwa ari ugutangira gushyira mu bikorwa imishinga yabo gusa, kuko amahirwe yo kubafasha kwiteza imbere ahari.

Mwesigwa Robert yanashishikarije urubyiruko kwiyandikisha bityo rukazabasha kwitabira inama ya «Youth Connekt Awards 2019» kuko naho rushobora kuzahakura ubundi bumenyi.

Urubyiruko rwitabiriye icyo gikorwa rukaba rwarahawe ikiganiro kirebana n’ubukangurambaga kuri gahunda ya Kora Wigire, umuco wo kwizigamira n’inguzanyo yo gutangira gukora.

Iyi ni nshuro ya munani hakorwa aya marushanwa ya ba rwiyemezamirimo b’urubyiruko (Youth Connekt Awards), aho muri iyi Ntara y’Iburasirazuba harushanyijwe ba rwiyemezamirimo 49.

Abagize Company Umuhesha bahawe ibihembo bya rwiyemezamirimo b’urubyiruko barushije abandi

TANGA IGITEKEREZO

Leave a Reply

Your email address will not be published. Required fields are marked *