22°C , Partly sunny | Kigali-Rwanda

Ibizamini ngiro byatangijwe ku mugaragaro mu mashuri ya TVET

Yanditswe na Mugisha Benigne

Ku ya 09-10-2019 saa 14:51:58
Aha Minisitiri w'Uburezi Dr. Mutimura Eugene arasobanurirwa n'umunyeshuri ibyo arimo gukora (Foto MINEDUC)

Ibizamini ngiro (Pratique) byatangijwe ku mugaragaro mu mashuri y’imyuga n’ubumenyingiro (TVET) mu gihugu hose, abanyeshuri biga mu mashami 39 akaba ari bo barimo kubikora, harimo n’abiga ubusifuzi n’umupira w’amaguru.

Ibi bizamini byatangijwe na Minisitiri w’Uburezi Dr. Mutimura Eugene mu Ishuri ry’imyuga n’ubumenyingiro rya Nyamirama, mu karere ka Kayonza.

Nk’uko bisobanurwa n’Umuyobozi ushinzwe ibizamini mu Ishuri rikuru ry’u Rwanda ry’ubumenyingiro (RP) Maniragaba Léonard, mu bizamini ngiro habayemo impinduka kuko abanyeshuri batagikorera mu matsinda ahubwo buri wese asigaye akora ikizamini ku giti ke, ibi bizamini bikaba bigomba gukorerwa muri santeri 142 n’abanyeshuri 19.334 biga mu mashami 34 harimo n’amashami mashya y’ubusifuzi, umuziki n’umupira w’amaguru.

Ati: “Mu bizamini bya Leta mu mashuri y’imyuga n’ubumenyingiro habayemo impinduka, ubu abanyeshuri ntibagikorera mu matsinda, ahubwo buri wese ku giti ke ahabwa umwanya wo gukora ikizamini.”

Avuga ko abanyeshuri biga ubusifuzi n’umupira w’amaguru bagiye gukora ku nshuro ya mbere ikizamini cya Leta, na bo bari mu batangiye ibizamini.

Avuga ko aya mashami ari mu kigo k’imyuga cya Kabatare, abatangiye ibizamini bakaba bari bamaze imyaka 3 biga muri ayo mashami, hari n’abigaga ibijyanye n’umuziki na bo bitabiriye ibizamini ngiro kimwe n’abandi.

Minisitiri w’Uburezi Dr. Eugène Mutimura yasabye abarezi bo muri aya mashuri kwigisha cyane no gutanga ubumenyi bwuzuye kandi bufite ireme mu kwigisha ubumenyingiro kugira ngo abana biga muri aya mashami basoze amasomo yabo batanga umusaruro mwiza.

Ati: “Guha umunyeshuri umwanya agakora ikizamini ku giti ke adakoreye mu itsinda bimufasha kugaragaza ubumenyi afite mu ishami yiga, mbere si ko byakorwaga, turasaba abarimu gukomeza kubaka ubushobozi bw’abanyeshuri kugira ngo nibagera ku isoko ry’umurimo bazatange umusaruro.”

Bamwe mu Banyarwanda bashimira Minisiteri y’Uburezi ko yongereye amashami bavuga ko yari akenewe mu mashuri y’imyuga n’ubumenyingiro, nk’ishami ry’ubusifuzi n’iry’umupira w’amaguru ngo bikaba bizafasha abana bafite izo mpano kwibona muri ayo mashuri no kubona ibyo biga bijyanye n’ubushobozi bwabo.

Murara Vianney ni umubyeyi, avuga ko ishami ry’ubusifuzi n’umupira w’amaguru ari ishami urubyiruko rwa none rwari rukeneye, rikaba riziye igihe kandi rikazabona abanyeshuri bitewe n’uko urubyiruko rukunze umukino w’umupira w’amaguru n’ubusifuzi kuko ari imyuga ishobora gutunga umuntu.

Yagize ati: “Aya mashami ndayishimiye, yari akenewe n’urubyiruko pe, aziye igihe kandi arakenewe, ndahamya ko urubyiruko rukunda umupira w’amaguru rusubijwe, umupira kandi ugendana no gusifura, ubwo na byo bizitabirwa kuko byagaragaye ko bitunga ababikora.”

Hari n’abanyeshuri bari mu mashuri yisumbuye mu kiciro rusange, bavuga ko aya mashami yombi bayishimiye, ku buryo hari n’abemeza ko ari yo bazakurikira nibagera mu mwaka wa gatatu ngo bazahita bayasaba.

Ibizamini ngiro bya Leta bizakorwa mu gihe k’ibyumweru bitatu mu gihugu hose mu mashami 34 yabyitabiriye.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.