22°C , Partly cloudy | Kigali-Rwanda

Ibizamini bya Leta bisoza ikiciro rusange n’amashuri yisumbuye biratangira

Yanditswe na admin

Ku ya Nov 21, 2017

Nyuma y’igihe gito ibizamini bya Leta bisoza amashuri abanza birangiye, kuri uyu wa kabiri, tariki ya 21 Ugushyingo 2017, hatangiye ibizamini bya Leta bisoza ikiciro rusange n’amashuri yisumbuye.

Nk’uko bitangazwa na Dr Tusiime Rwibasira Mike, Umuyobozi mu Kigo k’igihugu cy’uburezi (REB), ushinzwe ibizamini bya Leta, yabwiye Imvaho Nshya ko kugeza ubu abiyandikishije gukora ibizamini bya Leta  bisoza ikiciro rusange cy’amashuri  yisumbuye mu mwaka wa 2017 ari abanyeshuri 98 222 naho abiyandikishije gukora ibizamini bya Leta bisoza amashuri yisumbuye bo ni 41 909.

Mu kizamini abanyeshuri bashishikarizwa gusubiza neza bazirikana igihe

Dr Rwibasira akomeza avuga ko nta yindi mpamvu ibonetse aba banyeshuri bose bitabira ibizamini bya Leta nk’uko biyandikishije kuko bigeze ku munota wa nyuma wo kubikora nta we uragaragaza ko atazitabira, ndetse n’abarwaye bidakabije bakaba barateganyirijwe uburyo bwo gukora ibizamini.

Yagize ati “Uko abanyeshuri biyandikishije gukora ibizamini bya Leta ni ko bagomba kubikora, mu mibare yabo nta cyahindutse kuko kugeza ubu nta wigeze agaragaza ko afite imbogamizi yo kubikora, yewe n’urwaye ashyirirwaho uburyo bwo kubikora.”

Avuga ko urwaye uri no mu bitaro ariko bikemezwa na muganga ko uburwayi afite butamubuza gukora ibizamini bya Leta mu gihe yiyandikishije, ngo asangishwa ikizamini mu bitaro, akagikora kimwe n’abandi.

Dr. Rwibasira avuga ko impamvu bategereza ko byemezwa na muganga umukurikirana ari ukwirinda kuba bahuhuza umwana ikizamini adashoboye, wenda afite intege nke cyangwa arwaye byo kuremba.

Avuga ko ubu buryo bwakoreshejwe mu banyeshuri baheruka gukora ibizamini bisoza amashuri abanza, ko hari abo basangishije ibizamini mu bitaro byitiriwe Umwami Faisal n’ahandi mu bitaro byo mu gihugu, kandi nta kibazo cyabayemo.

Uyu muyobozi yemeza ko kugeza ubu abiyandikishije ari bo bakoze kuko nta makuru n’amwe ababwira ko hari umwana wasibye ikizamini cya Leta, ariko ngo nyuma yacyo hakazasuzumwa niba hari utarabirangije n’impamvu ya byo.

Rwibasira yongeyeho ko umubare w’abitabiriye ibizamini bya Leta bisoza ikiciro rusange wiyongereyeho 8% ugereranyije n’abakoze umwaka ushize w’amashuri wa 2016 naho  abakora ibizamini bya Leta bisoza amashuri yisumbuye bo bagabanutseho abagera kuri 300, bangana 0.4%, ni mu gihe abakoze ibizamini bya Leta bisoza ayisumbuye mu kiciro cy’abakandida bigenga ari 717.

MUGISHA BENIGNE