Ibitaro bya Ruli: Nta mubyeyi urapfa abyara mu mezi 20 ashize

Yanditswe na Sezibera Anselme

Ku ya 13-08-2019 saa 09:26:29
Minisitiri w'Intebe n'abandi bayobozi yasuye ibitaro bya Ruli mu Karere ka Gakenke

Ibitaro bya Ruli byashimiwe intambwe ikomeye byateye mu mitangire ya serivisi biha ababigana by’umwihariko aho byagaragaje ko hashize umwaka n’amezi 8 (amezi 20), ni ukuvuga kuva mu ntangiriro za 2018 ukageza muri uku kwezi kwa Kanama 2019 nta rupfu rw’umubyeyi n’umwe wahapfiriye abyara babikesha serivisi nziza kandi inoze.

Ibyo byagaragarijwe Minisitiri w’Intebe Dr. Ngirente Edouard ubwo yasuraga ibikorwa binyuranye bibarizwa mu karere ka Gakenke mu Ntara y’Amajyaruguru ari kumwe n’abandi bayobozi muri Minisiteri zitandukanye (MINISANTE, MINICOFIN), agafata umwanya wo gusura n’ibitaro bya Ruli.

Ibitaro bya Ruli byashinzwe na Arikidiyoseze ya Kigali bigizwe n’ibigo nderabuzima 9 bikagira abakozi 121 bigakorana n’Abajyanama b’ubuzima 764. Bitangirwamo serivisi zisanzwe zitangirwa no mu bindi bitaro ariko bikagira umwihariko wo kubaga abana bavukanye ibibazo bitandukanye.

Umuyobozi w’ibitaro bya Ruli Dr. Kaneza Deogratias, avuga ko indwara ikunze guteza imfu cyane ari iyo kuvuka kw’abana batagejeje igihe. Agira ati: “Tubyaza ku mwaka abagore 1.755 ariko kuva umwaka ushize kugeza uyu munsi twasuriweho nta mugore wari wapfira kuri ibi bitaro bya Ruli abyara.”

Avuga ko ku bitaro bya Ruli bifite inzu y’ababyeyi (Maison Maternelle) yakira ababyeyi bafite ibibazo bijyanye no kubyara, bityo n’ugomba kuza kubyara aturuka mu bice bya kure akaza kuhategerereza. Dr. Kaneza avuga ko kuva mu mwaka wa 2011 iyo nzu imaze kwakira ababyeyi batwite 640 kandi bose hamwe babyaye neza.

Nk’uko abitangaza, Dr. Kaneza akomeza avuga ko indwara ikunze kugaragara mu bajya kwivuriza muri ibyo bitaro ari indwara y’amenyo kugera n’aho abaganga basigaye bamanuka bakajya kuyivurira mu bigo nderabuzima.

Avuga ko ibitaro binatanga serivisi zitandukanye zirimo iyo kuboneza urubyaro aho bigeze ku kigero cya 72.5%, kuvura indwara zitandura aho bikurikirana abarwayi 1271.

Hatangirwa kandi serivisi z’amenyo ziri ku rwego rushimishije bikagera n’aho bishobora gukora insimburangingo z’amenyo, ndetse agaragaza ko hatewe intambwe muri serivisi zijyanye n’ubuvuzi bw’amaso.

Mu bituma ibyo bitaro bikomeza gukora neza ku rwego rwishimiwe, harimo no kuba bifasha abaganga bahakorera kubona aho batura kuko bifite amacumbi 12 byabashyiriweho. Ikindi ni uko byateye intambwe mu mitangire ya serivisi aho ibyo bitaro bitanga igikoma n’umugati buri gitondo kuri buri murwayi wese uharwariye.

Haracyari ibibazo bibangamira ibitaro bya Ruli

Mu mbogamizi yagaragaje, Dr. Kaneza avugamo izerekeranye n’umubare w’abakozi badahagije mu bitaro, hakaba abakozi bafitanye amasezerano n’ibitaro ku bijyanye n’imishahara 40% (sous contract) kandi nibura amafaranga miriyoni 12 akaba ari yo abatangwaho ku kwezi nk’umushahara ariko akaba ari ikibazo kiremereye ibyo bitaro.

Agira ati: “Muri abo bakozi 40% ibitaro bifite mu nshingano, abagera kuri 20% bujuje ibisabwa ku buryo bahidurirwa amasezerano bakaba abakozi ba Leta (Sous statut). Turacyanifuza kunoza birushijeho serivisi duha ababyeyi cyane ko tutagira umuganga w’inzobere (Specialist) mu kuvura ababyeyi bikaba ari imbogamizi. Turacyafite ibirarane bya mituweri ya kera bingana na miriyoni 180 ku bitaro na miriyoni 9 mu bigo nderabuzima, hakiyongeraho n’ibirarane bya farumasi y’akarere ya kera bigera kuri miriyoni 31.”

Mu Dr. Kaneza avuga ko ibitaro byatakaje miriyoni zisaga 13 ku barwayi bagana ibitaro badafite ubushobozi bwo kwishyura ikiguzi cya serivisi. Yongeraho ko ikirango k’ibiciro (Tarifu) ikoreshwa iki gihe itajyanye n’igihe kuko ikiguzi cya Oxgene litiro bayirangura amafaranga 300 bajya kwishyuza cyangwa kuyigurisha ku isaha bakayishyuza 600 nyamara umurwayi uyikeneye mu gihe k’iyo saha aba akoresheje ritiro zirenga 5.

Avuga ko hari ikibazo k’imodoka zitwara abarwayi zidahagije, bakifuza ko bongerewe imwe isanga izindi 2 zihasanzwe byafasha kurushaho ibigo nderabuzima birimo ikiri kure y’ibindi kitwa “Nyange” cyagenerwa iy’umwihariko, dore ko gifite n’umuhanda mubi ungana n’ibirometero 14.

Dr. Kaneza agaragaza ko ibitaro bikibangamiwe n’ikiguzi cy’umuriro n’amazi meza kiri hejuru cyane, bifuza y’uko bishoboka ibyo bitaro byashyirwa ku rutonde rw’ibigo bigabanyirizwa amafaranga, cyane kuko usanga bikoresha ikoranabuhanga riri hejuru risaba gukoresha ibipimo biri hejuru.

Agira ati: “Dufite ikibazo k’ibura ry’amazi gikunze kugaragara mu gihe k’izuba. Dufite isoko y’amazi meza iyazana hano ku bitaro ariko aho inyura hose ayo mazi tuyasangira n’abaturage ariko habonetse ubundi bufasha byatugirira akamaro kugira ngo twihaze mu bijyanye n’amazi meza ndetse n’isuku.”

Ibitaro ntabwo bifite aho bitwikira imyanda kuko bigisaba kuyijyana i Nemba, ikindi ni ukuba bigihura n’ikibazo cyo kubura abakozi bagenzura ibikoresho nk’imashini z’ibitaro kubera ko umubare w’ababizobereyemo ari muke mu gihugu kandi na bo bagomba kubanza kugirana amasezerano na Minisiteri y’Ubuzima.

Dr. Kaneza avuga ko bagifite ikibazo cy’amafaranga yiyongera ku mushahara bitewe n’uko umukozi yakoze atajyanye n’ukuri k’umurimo uba wakozwe kuko ibitaro biyatanga ku kigereranyo kiri munsi ya 100% mu gihe yakabaye atangwa 100%.

Atangaza ko ibitaro bigifite inzu zishaje zisakajwe n’amabati ya Asibesitosi ku bitaro bimwe na bimwe, mu bigo nderabuzima, yerekana ko ikiguzi cyo kuyakuraho baciwe miriyoni 63 z’amafaranga y’u Rwanda.

Niyonsenga Theophilla, umubyaza mu bitaro bya Ruli, avuga ko abakozi bakora mu bigo by’ubuvuzi batazamurwa mu ntera aho usanga umukozi uhembwa ukwezi kumwe aba ahembwa umushahara ungana n’umaze imyaka 20.

Mu kwishakamo ibisubizo, avuga ko bakomeje ingamba zigamije kugabanya imfu mu bitaro n’ibigo nderabuzima bikorana, kugabanya igwingira n’imirire mibi no gukomeza gutanga serivisi zo kuboneza urubyaro cyane cyane iza karemano ariko agaragaza ko hari ibigo nderabuzima bikoresha ubwa kizungu, kandi biyemeza gukomeza gucunga umutungo w’ibitaro neza.

Minisitiri w’Intebe Dr. Ngirente nyuma yo kumva ishusho y’ibitaro bya Ruli yashimye ko biza ku isonga mu bikora neza mu Ntara biherereyemo no mu gihugu nk’ibishimangirwa na Minisiteri y’Ubuzima, ashima ababitangije n’abagize uruhare mu kubizamura bigakomeza gukora neza.

Agaruka ku bibazo byagaragajwe, Dr. Ngirente avuga ko hari ibisanzwe bizwi kandi birimo kuganirwaho hagati y’inzego za Minisiteri, Intara n’akarere, byaba iby’ingobyi z’abarwayi, amazi meza ku buryo bazahabwa ibisubizo bidatinze.

Dr. Ngirente ati: “Mu bindi bibazo by’agahimbazamusyi aho gutwikira imyanda, icy’abakozi bahindurirwa amasezerano MINISANTE yiteguye kugira icyo ibikoraho kuko isanzwe hari ibyo izi”.

Muri rusange ibitaro bya Ruli byashimiwe ko hari intambwe byamaze gutera mu kwishakamo ibisubizo mu bibazo byagaragaje ko bikibibangamiye.

Minisitiri w’Intebe Dr Ngirente Edouard uwa 2 uhereye ibumoso n’abayobozi batandukanye bari kumwe n’umuyobozi w’ibitaro bya Ruli Dr Kaneza Deogratias uwa 2 iburyo batemberezwa ibitaro

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.