27°C , Partly sunny | Kigali-Rwanda

Ibitaro bya Kibagabaga birashishikariza abarwayi kumenya uburenganzira bwabo

Yanditswe na Ntawitonda Jean Claude

Ku ya 21-01-2020 saa 13:48:49
Umuyobozi w’Ibitaro bya Kibagabaga Dr. Mutaganzwa Avite

Ubuyobozi bw’Ibitaro bya Kibagabaga bukomeje gushishikariza abarwayi, abarwaza n’abagana ibitaro bakeneye izindi serivisi kumenya uburenganzira n’inshingano bafite mu guharanira kubona serivisi zinoze no gushyira mu bikorwa gahunda y’“Ijwi ry’Umurwayi” yatangijwe na Minisiteri y’Ubuzima mu mavuriro n’ibitaro byose mu Gihugu.

Umuyobozi w’Ibitaro bya Kibagabaga Dr. Mutaganzwa Avite, yatangarije Imvaho Nshya ko bifuza ko buri wese yamenya uburenganzira n’inshingano afite mu rwego rw’ubuvuzi.

Yagize ati: “Ijwi ry’umurwayi ni gahunda yatangijwe na Minisiteri y’Ubuzima hagamijwe ko abagana amavuriro bagira uruhare mu kunoza imitangire ya serivisi z’ubuvuzi, batanga amakuru ku gihe kugira ngo aho serivisi zitagenda neza bikosorwe vuba kandi hafatwe ingamba zirambye zo gukomeza kunoza serivisi. Ni gahunda ifungura ibiganiro tugirana n’abaturage tubamenyesha ibyo dukora, uburenganzira bwabo n’inshigano zabo igihe baje kwaka serivisi  kwa muganga, noneho na bo bakatubwira ibyo bashima n’ibyo banenga, ibyifuzo byabo mu mikorerere y’ivuriro n’umusanzu bashoboye gutanga kugira ngo ivuriro rirusheho gutera imbere bakawutanga; kuko ivuriro ni iry’abaturage.”

Abagana Ibitaro bya Kibagabaga bagaragaje ko iyo gahunda ari nziza cyane kuko izabafasha guhugukirwa muri serivisi z’ubuvuzi, bakongera n’ikizere cyo kubonera serivisi zinoze ku gihe ari ko banagira uruhare mu iterambere ry’Ibitaro.

Mbonimana Paul, yagize ati:Ijwi ry’Umurwayi ni gahunda twishimiye kuko yatumye twisanga mu bitaro cyane. Mbere umuntu yarazaga agasanga muri serivisi akeneye bimusaba gutegereza cyane kubera kutamenya aho yerekeza ngo bamufashe, ariko ubu tuzi aho tubariza, nomero z’abaganga n’ibyo bakora biba bimanitse ahantu hatandukanye. Iyo uvuze ikitagenda uyu munsi ejo ntigisubira, turashima ubuyobozi bwibutse kudukangurira kumenya ko umurwayi ari umufatanyabikorwa ugomba kumenya agaciro ke.”

Kanamugire Marcel, na we ati: “Naje hano gusaba taransiferi yo kuvuza umwana ku Bitaro bya Kanombe ariko ibisabwa byose turabyubahiriza kandi tubona bigenda neza. Uburenganzira bwacu tububonera mu kugendera kuri gahunda dusanga hano, uko twakirwa ndetse na serivisi duhabwa. Ni byiza ko Leta hari ukuntu igenda ihindura ibintu, uko iminsi ihita ni ko bagenda bakosora ibitaragendaga neza.”

Kanamugire Marcel

Uhawenimana Evariste, ati: “Gahunda yo gufasha abagana ibitaro kumenya uburenganzira n’inshingano zabo ni nziza. Hano si ubwa mbere mpaje ariko uburenganzira bwacu bujyana no gukurikiza amategeko n’amabwiriza dusanze ahangaha. Naje kuvuza umwana ariko kubera ko naje nyuma y’abandi nzi ko ngomba gutegereza kuko abantu tuba turi benshi kandi twese tubabaye.”

Uhawenimana Evariste

Uburenganzira bw’Umurwayi

Ubuyobozi bw’Ibitaro bya Kibagabaga buvuga ko urutonde rw’uburenganzira n’inshingano byamanitswe aho abagana Ibitaro bakirirwa kugira ngo uzi gusoma wese abibone, n’abaganga bakabisobanurira abarwayi igihe babavura.

Umurwayi afite uburenganzira bwo:

  • kuvurwa mu cyubahiro kandi ibitekerezo bye bwite n’ukwemera kwe mu byerekeranye n’idini n’umuco bikubahirizwa n’abantu bose bakora mu rwego rw’ubuzima;
  • kudakorerwa ivangura iryo ari ryo ryose, kudahozwa ku nkeke no kudahungabanyirizwa umutekano;
  • kuvurwa hakoreshejwe ururimi yumva;
  • kumenya umuvura n’ubushobozi afite mu rwego rw’ubuvuzi;
  • kumenya uko ubuzima bwe buhagaze, ibyo isuzuma ryagaragaje, n’ibishobora kumubaho igihe ari kuvurwa;
  • gusuzumirwa ahantu hiherereye hatuma agirirwa ibanga; n’amakuru ye agomba kugirwa ibanga;
  • kuvuga ibitagenda neza no guhabwa igisubizo vuba ku bibazo yagaragaje;
  • guhitamo no kugira uruhare mu byemezo bimufatirwa, uburyo akurikiranwa na muganga igihe avurwa, imiti ahabwa no kuvurwa afite amakuru ahagije.
  • kwanga serivisi runaka no gukurikiranwa n’umuganga cyangwa itsinda ry’abaganga runaka mu gihe afite impamvu zumvikana.

Abarwayi n’abandi bagana amavuriro baributswa inshingano na bo bafite zo gukurikiza neza amabwiriza yose bahawe na muganga, gukoresha neza imiti bandikirwa, kuvugisha ukuri igihe bivuza cyangwa bahabwa izindi serivisi, kugira isuku hagamijwe kwirinda indwara zandura, kwirinda kugira imyitwarire iyo ari yo yose yashyira ubuzima bwabo n’ubw’abandi mu kaga, kwivuza batararemba no kugaragaza ko bafite ubushobozi bwo kwishyura serivisi bahawe.

Ubutumwa bugaragaza uburenganzira bw’umurwayi buba bumanitse aho abarwayi bakirirwa.

Umwanditsi:

Ntawitonda Jean Claude

3 Comments on “Ibitaro bya Kibagabaga birashishikariza abarwayi kumenya uburenganzira bwabo”

  1. Nibyiza ko abagana ivuriro bashaka serivisi bazihabwa neza kandi kugihe, ariko abahabwa serivisi z’ubuvuzi nabo bubahirize inshingano zabo harimo no kwishyura serivisi baba bahawe, inzego z’ibanze nazo zikomeze gushishikariza abaturage gutanga ubwisungane mukwivuza (MUTUWEL DE SANTE) Kuko ni imwe mumbogamizi amavuriro ahura nayo.

    1. Abagana ibitaro bakwiye kwirinda kuvunda babwira Muganga ngo njye ngirira vuba mfite akazi nk aho hari abandi bakwiye kwirirwa bicaye ku bitaro kuko bo ari imburamumaro wa wundi akabacaho. Ibi bitera stress nyiri ukuvura agerageza gushimisha abamusaba kubagirira vuba ariko byica qualité ya service ihawe uwo muntu wihuta atyo. Ibi nkunda kubibona kubacuruzi no ku bayobozi bamwe na bamwe!
      .

  2. Ikindi ni uko abaturage bagomba gushushikarira kwirinda indwara no kwivuza hakiri bityo bizagabanya umubare w’abivuza barembye bareke no kuba unuzigo ku miryango yabo no ku gihugu.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.