20°C , Partly cloudy | Kigali-Rwanda
Izi ni zimwe mu Ntwari z'u Rwanda

Ibiranga Intwari z’u Rwanda , ibyiciro zirimo n’ibishingirwaho

Yanditswe na Mugisha Benigne

Ku ya 01-02-2019 saa 13:20:20

Intwari z’u Rwanda zagaragaje ibikorwa by’indashyikirwa no gukunda igihugu, zikaba ziri mu byiciro binyuranye bitewe n’ibikorwa bya buri wese.

Umunyamabanga nshingwabikorwa w’Urwego rw’Intwari z’igihugu, imidari n’impeta by’ishimwe, Nkusi Deo avuga ko hari ibishingirwaho hatoranywa intwari, ndetse hakaba n’ibindi bishingirwaho mu kuziha ibyiciro.

Bimwe mu biranga intwari ni ukugira umutima ukomeye kandi ukeye, ni ukudatinya gushyigikira ikiza, kugaragaza ikibi no guhangara kukirwanya uzi neza ingaruka, kabone n’ubwo byagusaba kumena amaraso.

Ikindi ni ugukunda igihugu, kugishyira imbere no guharanira ubusugire, iterambere n’isheme by’igihugu n’ubumwe bw’abagituye.

Harimo kandi ubwitange mu bigaragaza intwari, akaba ari ukwigomwa inyungu zawe bwite, guharanira inyungu rusange, byaba ngombwa ugahara ubuzima bwawe.

Kugira ubushishozi ni ikindi mu biranga intwari, ni nko kureba kure no kumenya ukuri kutagaragarira buri wese.

Kugira ubwamamare mu butwari na byo ni kimwe mu biranga intwari, gukora ibikora by’ubutwari bizwi kandi bishimwa na benshi.

Kuba intangarugero no kuba umunyakuri, ni ukurangwa n’ibikorwa bihebuje, bibera abandi urugero rwiza no kurangwa n’ukuri kandi ukaguharanira ntutinye no kuba wakuzira.

Kugira ubupfura no kugira ubumuntu, bigaragara nko kugira imico myiza mu matwara ufite, imibereho n’imyifatire ndetse n’imibanire n’abandi, kurangwa n’umutima ukunda abantu ku buryo buhebuje aho kubarutisha ibintu.

Nkusi avuga ko iyo bajya gushyira umuntu mu ntwari bashingira ku bwitange buhebuje yagaragaje, akamaro yagize muri sosiyete n’urugero yatanze.

Intwari z’u Rwanda zibarirwa mu byiciro bitatu

Umunyamabanga nshingwabikora wa CHENO avuga ko ikiciro cya mbere k’Intwari ari ik’Imanzi kibarirwamo Major General Fred Gisa Rwigema.

Fred Gisa Rwigema yaranzwe n’ubwitange buhebuje ubwo yayoboraga ingabo za FPR Inkotanyi ku rugamba rwo kubohora igihugu mu mwaka wa 1990, nyuma akarugwaho.

Ati: “Yabereye abantu bose urugero rwiza rw’ubwitange, yagiriye akamaro abandi benshi kuko yarwanye intambara aharanira uburenganzira bwa muntu, baba Abanyarwanda cyangwa abanyamahanga.”

Ikiciro cya kabiri k’intwari z’u Rwanda ni ik’Imena, kibarirwamo Umwami Mutara Rudahigwa Charles Leon Pierre na Michel Rwagasana.

Imena ni intwari iyinga Imanzi, ikaba inkwakuzi mu kugaragaza ibikorwa byiza bidasanzwe mu gihugu, biranga n’ubwitanga buhebuje, urugero n’akamaro bihanitse.

Umwami Mutara III Rudahigwa Charles Leon Pierre yabaye umwami w’u Rwanda kuva 1931-1959 yagaragaje ibikorwa by’urukundo mu Banyarwanda ashyiraho ikigega cyo kurihira amashuri abana b’abanyarwanda, yakuyeho ubuhake, yagabiye abakene, yanahirimbaniye ubwigenge.

Naho Michel Rwagasana yabaye umunyamabanga w’Inama nkuru y’igihugu cy’u Rwanda n’umunyamabanga w’Umwami Mutara III Rudahigwa, yabaye umukozi wa Leta Mbirigi muri Teritwari ya Ruanda-Urundi mu biro bishinzwe abakozi kavukire i Bujumbura.

Rwagasana yagaragaje ubumuntu mu mibereho ye, umutima wo gukunda abantu no guhangana na Politiki y’amacakubiri bituma ahara byose kugeza ku buzima bwe. Yanze gukoresha ububasha yahawe ku nyungu ze bwite, ahubwo aharanira ubumwe bw’Abanyarwanda.

Agatha Uwilingiyimana nawe ni imwe mu ntwari z’Imena, yabaye Minisitiri w’Intebe kuva muri Nyakanga 1993 kugeza muri Mata 1994, yagize umutima ukomeye kandi ukeye ari Minisitiri w’amashuri abanza n’ayisumbuye.

Yahangaye gukuraho akarengane mu mashuri mu gihe abashinze icyo bitaga iringaniza bari bagitegeka igihugu. Yarwanyije ishyirwa mu bikorwa rya Jenoside yakorewe abatutsi muri 1994, ndetse aza kwicwa azira ibitekerezo bye.

Niyitegeka Felicite, yakoze imirimo itandukanye yo kwigisha, kurera, gucunga umutungo no gufasha abatishoboye.

Mu mwaka wa 1994 Jenoside yamusanze ku Gisenyi aho yiciwe azira ko yafashije abatutsi bihishe mu kigo yari ashinzwe kuyobora cya Centre Saint Pierre. Yemeye gupfana n’abari bamuhungiyeho kandi yabonye ubufasha bwa musaza we w’umusirikare mukuru .

Abanyeshuri b’i Nyange na bo babarirwa mu kiciro cy’Imena. Aba bana banze kwitandukanya ubwo baterwaga n’abacengezi ku ya 18/03/1997 bakababwira kwitadukanya, abahutu ukwabo, abatutsi ukwabo, ari bwo abanyeshuri bangaga bakavuga ko bose ari abanyarwanda, maze abacengezi batangira kubarasa.

Abanyeshuri bazize ubu bwicanyi bari 7, ariko n’abasigaye bose babarirwa mu kiciro cy’Imena.

Ikiciro cya 3 ni Ingenzi, ikaba intwari iyinga Imena ikaba inkwakuzi mu kugaragaza ibitekerezo cyangwa ibikorwa by’ingirakamaro birangwa n’ubwitange buhebuje, akamaro gakomeye n’urugero ruhanitse.

Muri iki kiciro nta ntwari irashyirwamo.

Izi ni zimwe mu Ntwari z’u Rwanda

TANGA IGITEKEREZO

Leave a Reply

Your email address will not be published. Required fields are marked *