Ibimaze kugerwaho mu Rwanda hashingiwe ku ngengo y’imari 2019/2020

Yanditswe na Mugabo Lambert

Ku ya 02-12-2019 saa 12:24:21
Minisitiri w'Imari n'Igenamigambi Dr. Ndagijimana Uzziel, ubwo yatangazaga Ingengo y'Imari y'Umwaka wa 2019-2020

Ingengo y’Imari ya Leta ya 2019/2020 yatangiye gushyirwa mu bikorwa mu ntangiriro za Nyakanga 2019. Mu gihembwe cyayo cya mbere, ni ukuvuga kugera muri Nzeri 2019, hakozwe ibikorwa bizamura imibereho y’Abanyarwanda, nk’uko byagaragajwe na Minisitiri w’Igenamigambi, Dr. Uzziel Ndagijimana.

Minisitiri Ndagijimana yabitangarije Abanyarwanda, ubwo yagezaga ku Nteko rusange y’Abadepite uko ubukungu rusange n’ingengo y’imari bihagaze. Mu rwego rw’ubuhinzi, mu gihe cyavuzwe hejuru, mu gutegura ku gihe igihembwe k’ihinga cya 2020A, hakomeje gahunda yo kugeza ku bahinzi imbuto z’indobanure n’ifumbire mvaruganda mu rwego rwo kongera umusaruro.

Yagize ati “Mu rwego rwo kongerera umusaruro w’ibihingwa byoherezwa mu mahanga, hatunganyijwe Toni 5,721 z’ikawa ugereranyije na Toni 6,168 zari ziteganyije na Toni 6,079 z’icyayi ugereranyije na Toni 5,959 zari ziteganyijwe.”

Hagamijwe kongera umusaruro ukomoka ku bworozi, hakomeje gahunda yo gutera inka intanga no kuzikingira indwara zitandukanye. Mu rwego rw’ubwishingizi mu buhinzi n’ubworozi, abahizi bagera kuri 200 n’aborozi 5,200 bafashe ubwishingizi bw’ibihingwa n’amatungo yabo.

Ibikorwa by’ingenzi byagezweho mu rwego rw’ubucuruzi n’inganda, ni uko amasoko akorerwamo ubucuruzi bwambukiranya imipaka ya Rubavu na Rusizi yatangiye gukora, kugeza ubu irya Rubavu ryitabirwa ku gipimo cya 54% naho irya Rusizi ryitabirwa ku gipimo cya 58%.

Mu rwego rwo gukomeza gutunganya no kongerera agaciro umusaruro ukomoka ku buhinzi n’ubworozi, amata angana na litilo miriyoni 2 yarakusanyijwe atunganyirizwa mu nganda zitandukanye hirya no hino mu gihugu ugereranyije na litilo miriyoni 1.1 yari ateganyijwe.

Ibyagezweho mu rwego rw’ingufu

Minisitiri Ndagijimana yavuze ko muri kiriya gihe cy’amezi atatu ingo 38,954 zahawe amashanyarazi ashamikiye ku muyoboro (on-grid) ugereranyije n’ingo 18,334 zari ziteganyijwe, naho ingo 31,105 zihabwa amashanyarazi ashingiye ku ngufu z’imirasire y’izuba (off-grid) ugereranyije n’ingo 12,500 zari ziteganyijwe.

Ati “Byongeye, ahantu hakorerwa ibikorwa bitanga umusaruro hagera ku 113 hagejejwe amashanyarazi ashamikiye ku muyoboro ugereranyije n’ahantu 45 hari hateganyijwe. Ibi bikaba bigaragaza ko gahunda yo gukwirakwiza amashanyarazi iri ku muvuduko mwiza”.

Yakomeje avuga ko imirimo yo kubaka, gusana no kwagura imiyoboro y’amashanyarazi itandukanye yakomeje. Ati “Imiyoboro ya Km 79.3 harimo uwa Mamba-Rwabusoro-Rilima wa KV 220 n’uwa Bugesera-Gahanga wa KV 110 yarakomeje, imirimo ikaba yarageze ku gipimo cya 90% ugereranyije na 60% cyari giteganyijwe.”

Imirimo yo kubaka uruganda rw’amashanyarazi aturuka kuri nyiramugengeri mu Karere ka Gisagara ruzatanga MW 80 yarakomeje, imirimo ikaba yarageze ku gipimo cya 81.8% ugereranyije na 70% cyari giteganyijwe.

Dr. Ndagijimana kandi avuga ko imirimo yo kubaka urugomero rw’amashanyarazi rwa Rusumo ruzatanga MW 80 ruhuriweho n’ibihugu by’u Rwanda, Tanzaniya n’u Burundi nayo yarakomeje, imirimo ikaba igeze ku gipimo cya 53% ugereranyije na 50% cyari giteganyijwe.

Naho mu rwego rw’amazi, isuku n’isukura, ngo mu rwego rwo kongera ubushobozi bw’amazi aboneka ku munsi akava kuri m3 267,660 akagera kuri m3 322,660 mu mwaka wa 2019, imirimo yo kubaka uruganda rutunganya amazi rwa GIHIRA II mu mujyi wa Rubavu yageze ku gipimo cya 30% nk’uko byari biteganyijwe.

Ati  “Uru ruganda ruzatanga amazi angana na m3 15,000 ku munsi. Imirimo y’inyongera yo gufasha gukwirakwiza amazi ava ku ruganda rwa KANZENZE igeze ku gipimo cya 60.5% ugereranyije n’igipimo cya 60% cyari giteganyijwe; uru ruganda rukazatanga amazi angana na m3 40,000 ku munsi rukazafasha kugeza amazi meza mu karere ka Bugesera no mu mujyi wa Kigali.”

Minisitiri Ndagijimana kandi avuga ko mu rwego rwo gukomeza kugeza amazi meza ahantu hakorerwa ibikorwa bitanga umusaruro (amashuri, amavuriro n’inganda), ibikorwa 26 (harimo amashuri 17, ibigo nderabuzima 3 n’amazu akoreramo ibigo bya Leta 6) byagejejweho amazi meza ugereranije na 20 byari biteganijwe.

Hakomeje kandi imirimo yo kubaka Km 171 z’ imiyoboro y’amazi mu turere dutandukanye iteganyijwe kugeza amazi meza ku baturage 124,241 mu bice by’icyaro. Imirimo yo kubaka imiyoboro ireshya na Km 127 mu karere ka Gicumbi ku bufatanye na WASH igeze ku gipimo cya 65.5%, iyo kubaka umuyoboro wa Ruhunde-Rushara ureshya na Km 19.6 muri Burera igeze ku gipimo cya 98% ugereranyije na 80% yari iteganyijwe, imirimo yo kwagura umuyoboro w’amazi ugera mu cyanya k’inganda cya Rwamagana na santeri y’ubucuruzi ya Ntunga igeze ku gipimo cya 75% nk’uko byari biteganyijwe.

Iby’ingenzi byagezweho mu rwego rwo gutwara abantu n’ibintu

Aha, Dr. Ndagijimana avuga ko hakomeje imirimo yo gusana imihanda ya kaburimbo itandukanye ireshya na Km 262. Umuhanda Huye-Kitabi ureshya na Km 53 wageze ku gipimo cya 96.5% ugereranyije n’igipimo cya 95% cyari giteganyijwe; umuhanda wa Kagitumba-Gabiro ureshya na Km 57 wageze ku gipimo cya 98.4% ugereranyije n’icya 95% cyari giteganyijwe; naho umuhanda Kayonza-Rusumo ureshya na Km 92 ukaba ugera ku gipimo cya 85% nk’uko byari biteganyijwe.

Akomeza agira ati          “Hakomeje kandi imirimo yo gukora imihanda y’igitaka itandukanye igahindurwamo kaburimbo; harimo imirimo y’inyongera mu kubaka umuhanda wa Kivu Belt Lot 7 Gisiza-Rubavu izafasha kubaka umuhanda ugera ku bitaro bya Murunda no ku ruganda rwa BRALIRWA igeze ku gipimo cya 32.17% ugereranyije na 30% yari iteganyijwe, umuhanda wa Base-Rukomo ureshya na Km 51.54 wageze ku gipimo cya 95.1% nkuko byari biteganyijwe, Umuhanda wa Nyagatare-Rukomo ureshya na Km 73 ugera ku gipimo cya 38.8% ugereranyije na 45% yari iteganyijwe naho umuhanda wa Huye-Kibeho-Ngoma ureshya na Km 66 ugera ku gipimo cya 25.4% nk’uko byari biteganyijwe.”

Ikindi ni uko imirimo yo kubaka imihanda itandukanye yo mu Mujyi wa Kigali ifite Km 54 hamwe n’iyo mu migi yunganira Umujyi wa Kigali yakomeje ikaba igeze ku gipimo cya 97%; naho umuhanda Sonatube -Gahanga-Akagera ukaba warageze ku gipimo cya 33% ugereranyije n’igipimo cya 20% cyari giteganyijwe.

Mu rwego rwo guteza imbere imiturire, Minisitiri Ndagijimana avuga ko amakuru agendanye n’ingo zituye ahashyira ubuzima bw’abazituye mu kaga yakusanyijwe nk’uko byari biteganyijwe, izigera kuri 20 zo mu turere twa Muhanga na Rutsiro zafashijwe kwimuka batuzwa neza mu midugudu. Intego y’umwaka wa 2019/20 akaba ari ukwimura ingo zigera kuri 730.

Ati “Mu rwego rwo guteza imbere imiturire myiza mu cyaro, hakomeje gutegurwa ahazubakwa imidugudu y’ikitegererezo (IDP model Villages) mu Turere twa Nyagatare, Gicumbi, Burera na Nyaruguru; aho iyo midugudu izubakwa hamwe n’abagenerwa bikorwa bamaze gutoranywa, inyigo nazo zari zigeze kure zikorwa.”

Hakomeje kandi imirimo yo kubaka inyubako za Leta zitandukanye: Inyubako y’ububiko bw’inyandiko ku rwego rw’igihugu iri ku Kacyiru igeze ku gipimo cya 49.7% ugereranyije n’intego ya 46.6% yari yarihawe.

Ibyagezweho mu rwego rw’uburezi n’ubuzima

Mu burezi, Minisitiri w’Imari n’Igenamigambi yatangaje ko imirimo yo kubaka ibyumba by’amashuri 1,150 n’ubwiherero 1,084 biteganyijwe mu mwaka w’ingengo y’imari wa 2019/20 igeze ku gipimo cya 32.46%. Naho mu rwego rwo gukomeza guteza imbere ireme ry’uburezi n’imyigire, amashuri 556 yo mu byiciro bitandukanye yaragenzuwe agirwa inama z’ibigomba kongerwamo imbaraga

Hatanzwe kandi ibitabo by’imfashanyigisho mu masomo y’Icyongereza n’Imibare bigera ku 140,839 mu mashuri atandukanye. Akomeza agira ati “Imirimo yo kubaka amashuri y’imyuga n’ubumenyi ngiro ya Muhanga igeze ku gipimo cya 94% ikaba iteganyijwe kurangirana n’iki gihembwe cya kabiri turimo; imirimo yo kubaka ishuri ryigisha kwakira neza abatugana (Hospitality Management Institute) riherereye mu murenge wa Remera mu karere ka Gasabo igeze ku gipimo cya 82%, naho IPRC Ngoma ikaba yari igeze ku gipimo cya 85%.”

Mu rwego rw’ubuzima, uyu muyobozi avuga ko mu rwego rwo kurwanya Malariya hatewe imiti yica imubu itera Malariya mu Turere twagaragayemo Malariya kurusha utundi. Mu Karere ka Kirehe hatewe umuti mu ngo 96,635 naho mu Karere ka Nyagatare haterwa umuti mu ngo 125,077.

Ni mu gihe mu rwego rwo guhangana n’indwara zitandura, abakozi bo mu bigo nderabuzima 155 bahawe amahugurwa mu kuvura no gukumira izo ndwara. Naho muri gahunda yo kwegereza abaturage serivisi z’ubuvuzi, Dr. Ndagijimana yatangaje ko kubaka ibitaro bya Gatunda bigeze ku gipimo cya 85%; kubaka ibitaro bya Munini bigeze ku gipimo cya 44.3%; kubaka ibitaro by’Akarere ka Nyarugenge bigeze ku gipimo cya 87%, naho ibitaro bya Nyabikenke imirimo igeze kuri 60%.

Ibikorwa by’ingenzi byagezweho mu butabera n’imibereho myiza

Mu rwego rwo gukomeza kwegereza abaturage ubutabera, Abunzi bakiriye imanza 10,774, muri zo  9,419 zingana na 87% zarakemuwe, naho 1,355 zingana na 13% zari zigisuzumwa. Ikindi ni uko  ngo baturage bakomeje guhabwa ubufasha mu butabera binyuze mu nzu zitanga ubwo bufasha (MAJ), hakaba harakiriwe imanza 4,682, muri zo 99% zarakemuwe ugereranyije n’intego yo gukemura 99.5%.

Ku byagezweho mu mibereho myiza, Minisitiri Ndagijimana yagize ati “Imiryango igera ku 13,127 yahawe akazi muri gahunda y’imirimo rusange ya VUP, naho imiryango igera ku 98,119 ihabwa inkunga y’ingoboka ugereranyije n’imiryango 86,771 yari iteganyijwe.”:

Ikindi, ni uko imiryango 3,247 yahawe inka muri Gahunda ya Girinka ugereranyije n’imiryango 1,532 yari iteganyijwe. Abana bari munsi y’imyaka 5 bagaragaweho imirire mibi bagera ku 9,239 bahabwa amata ugereranyije na 12,225 bari bateganyijwe; naho abana 86,531 hamwe n’abagore batwite n’abonsa 19,099 bahawe ibiribwa bikungahaye ku ntungamubiri.

Yavuze kandi ko mu rwego rwo guteza imbere imibereho myiza (Human Security), hubatswe amazu y’abatishoboye agera ku 2,653 ugereranyije n’amazu 2,294 yari ateganyijwe. Hasanywe amazu agera kuri 681, hubakwa ubwiherero 2,877 naho ubugera ku 10,266 burasanwa aho butari bumeze neza.

Minisitiri w’Imari n’Igenamigambi akaba yaravuze ko hakurikijwe uko imibare ihagaze ubu ngubu hamwe n’ikigereranyo mu gihe giciriritse, hari ikizere ko ubukungu bw’u Rwanda buzakomeza kuzamuka ku gipimo gishimishije, kandi ko ingengo y’imari yatowe n’abadepite izashyirwa mu bikorwa uko biteganyijwe.

Umwanditsi:

Mugabo Lambert

Tanga Igitekerezo

Email yanyu ntigaragazwa ku rubuga. Amazina na Email ni ngombwa.