19°C , Mostly clear | Kigali-Rwanda
Aba ni abari bitabiriye inama aho u Rwanda rwashimwe kuba rwubahiriza uburenganzira bwa muntu (Foto Regis)

Ibihugu 7 byashimye uko u Rwanda rwubahiriza uburenganzira bwa muntu

Yanditswe na Twagira Wilson

Ku ya 11-06-2019 saa 16:48:07

Abayobozi baturutse mu bihugu 7 by’Afurika ari byo Uganda, Kenya, Burundi, Repubulika Iharanira Demukarasi ya Congo, Somaliya, Tanzania na Sudani y’Epfo, bashimye aho u Rwanda rugeze rwubahiriza uburenganzira bwa muntu.

Uhagarariye Amashami y’Umuryango w’Abibumbye mu Rwanda Fodé Ndiaye avuga ko kuva mu mwaka wa 2011, u Rwanda rwakomeje kongera imbaraga mu guteza imbere iyubahirizwa ry’uburenganzira bwa muntu ku buryo ubu bigeze ku gipimo gishimishije.

Ati: “Ku bufatanye n’abandi bafatanyabikorwa, kugeza ubu turashima ibyo u Rwanda rumaze gukora mu bijyanye no kubahiriza uburenganzira bwa muntu kuko ku myanzuro rumaze kubahiriza 94%”.

Mu nama y’iminsi itatu ibera i Kigali kuva ku wa Kabiri tariki ya 11 Kamena 2019, ihuje ibyo bihugu, hamwe n’inzego zifite aho zihuriye n’iyubahirizwa ry’uburenganzira bwa muntu mu rwego rw’Afurika, Geneva n’ahandi.

Ni inama igamije kwisuzuma ku birebana n’iyubahirizwa ry’uburenganzira bwa muntu, umuyobozi w’Amashami y’Umuryango w’Abibumbye mu Rwanda Fodé Ndiaye avuga ko ku bufatanye n’abandi bafatanyabikorwa nk’Imiryango ya sosiyete sivili, by’umwihariko ihuriro ritanga ubufasha mu by’amatageko “Legal aid forum” ndetse n’Umuryango w’Abibumbye, u Rwanda rumaze gutera intambwe mu kubahiriza uburenganzira bwa muntu.

Umuyobozi Mukuru muri Minisiteri y’Ubutabera ushinzwe ubutabera mpuzamahanga, Umurungi Providence, yabwiye abanyamakuru ko aho Rwanda rugeze rwubahiriza uburenganzira bw’ikiremwa muntu hashimishije, asanga ibyo rubikesha imikoranire myiza n’imiryango ya sosiyete sivili ikorera mu gihugu, dore ko ari na yo igera ku baturage benshi hirya no hino mu gihugu.

Ati “Kuba u Rwanda ruhagaze neza, rukaba rwarateye intambwe ishimishije ku birebana n’iyubahirizwa ry’uburenganzira bwa muntu ni ubufatanye dukesha imikoranire n’imiryango ya sosiyete sivili kuko dukorera intego imwe, kandi begera cyane abaturage ari na bo bagenerwabikorwa bafite uburenganzira bugomba kubahirizwa.’’

Kananga Andrews uyobora LAF, Legal Aid Forum, ari ryo huriro rishinzwe gutanga ubufasha mu by’amategeko, yagarutse ku nsanganyamatsiko y’iyo nama igira iti “Gushimangira ubufatanye mu byerekeranye n’iyubahirizwa ry’uburenganzira bwa muntu, mu karere, asanga ubufatanye n’ukwishyira hamwe na za Leta ari ingenzi kugira ngo uburenganzira bwa muntu bwubahirizwe uko bikwiye.

Aba ni abari bitabiriye inama aho u Rwanda rwashimwe kuba rwubahiriza uburenganzira bwa muntu (Foto Regis)

TANGA IGITEKEREZO

Leave a Reply

Your email address will not be published. Required fields are marked *