17°C , Partly cloudy | Kigali-Rwanda

Ibigo by’amashuri birasabwa guhinga imboga zunganira amafunguro y’abana

Yanditswe na Mugisha Benigne

Ku ya 13-02-2020 saa 09:21:09
Amashuri arasabwa guhinga imboga cyangwa imirima y'igikoni

Amashuri arasabwa guhinga imboga zunganira amahunguro ahabwa abana kugira ngo abe afite intungamubiri zuzuye.

Ibi ni ibigarukwaho n’Umuyobozi Mukuru w’Ikigo k’Igihugu cy’Uburezi, Dr. Ndayambaje Irénée, usaba abarezi kubyaza umusaruro ubutaka bafite babuteraho imboga rwatsi zunganira andi mafunguro ya saa sita ku biga muri gahunda y’uburezi bw’imyaka 9 na 12.

Dr. Ndayambaje avuga ko kugaburira abana ku mashuri ari gahunda ya Leta igomba kugirwamo uruhare ku bufatanye bw’ababyeyi na Leta ndetse n’ibigo by’amashuri.

Ati “Ubutaka bw’amashuri bukwiye kubyazwamo umusaruro buhingwamo imboga zunganira andi mafunguro ahabwa abanyeshuri mu mashuri ari muri gahunda y’uburezi bw’imyaka 9 na 12.”

Avuga ko abadafite ubutaka bwo guhingaho bakwiye gukora imirima y’igikoni nk’uko bishishikarizwa n’abandi baturage mu rwego rwo kubona indyo yuzuye.

Abaturage bo mu Murenge wa Kagogo, Akarere ka Burera, babwiye Imvaho Nshya ko hari amashuri yo muri uyu murenge afite imirima y’imboga akagaburira abana indyo irimo imboga, ngo hari n’andi yakoze uturima tw’igikoni mu rwego rwo kubona imboga agaburira abana.

Munyazikwiye Evode, ni umuturage wo mu Murenge wa Kagogo, avuga ko ubusanzwe muri uyu murenge abaturage bafite umuco wo guhinga imboga, ndetse n’amashuri nayo arazihinga ku buryo abana barya imboga mu mafunguro yabo.

Avuga ko abatazifite ku mashuri bajya bazigemurirwa n’abaturage bakazibagurisha kuko mu baturage akenshi haba hari imboga mu mirima.

Umurezi wo mu ishuri rya Sozi yemeza ko gahunda yo kugaburira abana imboga amashuri yamaze kubigira ibyayo ndetse ngo n’abaturage basigaye bazihinga cyane bakarya bakanasagurira amasoko.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.