22°C , Partly cloudy | Kigali-Rwanda

Ibiciro by’umuriro w’amashanyarazi byazamutse

Yanditswe na Mutungirehe Samuel

Ku ya 15-01-2020 saa 08:49:50
Umuyobozi Mukuru wa RURA, Lt Col Patrick Nyirishema iburyo n'Umuyobozi Mukuru wa REG, Ron Weiss basobanura ibyatumye ibiciro by'amashanyarazi bizamuka (Foto Samuel M)

Urwego rw’Igihugu rushinzwe imirimo imwe n’imwe ifitiye Igihugu akamaro RURA, na Sosiyete y’Ingufu REG, batangaje impinduka ku biciro by’amashanyarazi ku bafatabuguzi b’umuriro mu Rwanda, ibiciro byazamutse mu byiciro byose ariko hakabamo n’aho byagumye aho bisanzwe, ku bitaro n’amavuriro biramanuka.

Mu kiganiro Umuyobozi Mukuru wa RURA Lt. Col. Patrick Nyirishema n’umuyobozi Mukuru wa REG Ron Weiss bahaye itangazamakuru kuwa 14 Mutarama 2020, bavuze ko igihe cyari kigeze ngo bongere bavugurure ibiciro, bijyane n’icyo bisaba kugira ngo umuriro uboneke.

Uburyo ibiciro by’umuriro byazamutse, ingo z’abaturage zitarenza kilowati (Kwh) 15 ku kwezi zizakomeza kwishyura amafaranga 89 asanzwe, ariko izikoresha kilowati hagati ya 15 na 50, kilowati imwe zizajya ziyigura amafaranga 212 avuye ku 182.

Ingo zikoresha kilowati zirenze 50 ku kwezi zizajya zishyura amafaranga 249 kuri kilowati imwe avuye kuri 210. Inzu zitari izo guturamo ntizibe n’inganda, izitarenza Kwh 100 ku kwezi zizajya zishyura amafaranga 227 kuri Kwh imwe, izirenza kwh 100 zizajya zishyura 255 kuri Kwh imwe baguze avuye kuri 222.

Inganda zitunganya amazi nta cyahindutse kuko RURA yasobanuye ko basanze zizamuriwe igiciro kuri Kwh byatuma na bo bazamura igiciro cy’amazi. Iminara y’itumanaho yazamuriwe igiciro kuri Kwh, kigera kuri 201 avuye ku 185, amahoteri azamurirwa igiciro kigera kuri 157 kivuye ku 126 kuri Kwh.

Ibitaro n’ibigo by’ubuzima byamanuriwe igiciro, kigera ku 186 kivuye ku 192 kuri Kwh imwe. Ibigo by’itangazamakuru byazamuriwe igiciro kigera ku 192 kivuye ku 184 kuri Kwh imwe. Byasobanuwe ko ari uko basanze hari ibitari binini biba bifite ibikoresho bisaba umuriro mwinshi kurenza uw’inganda bigatuma serivisi zimwe mu buvuzi zihenda cyangwa bikaba byatera ikibazo runaka.

Inganda nto zidakoresha kwh ibihumbi 22 ku mwaka zazamuriwe igiciro kigera ku 134 kivuye ku 110 kuri Kwh imwe. Inganda ziciriritse zikoresha Kwh ziri hagati y’ibihumbi 22 na 60 ku mwaka zizajya zigura Kwh imwe ku mafaranga 103 avuye kuri 87.

Inganda nini zizajya zigura Kwh imwe ku mafaranga 94 avuye kuri 80 mu gihe ibigo binini bibika amakuru by’ubucuruzi byo byagabanuriwe bikazajya bigura Kwh imwe ku mafaranga 179 avuye kuri 222.

Umuyobozi Mukuru wa RURA, Lt. Col. Patrick Nyirishema yagize ati “Impamvu zituma igiciro gihindurwa, icya mbere tuba twifuza ko REG na EUCL bakomeza kugira ubushobozi bwo gukwirakwiza umuriro ndetse n’abantu bose bakawubona. Biba bisaba rero ko bagira igiciro gituma bashobora gukora imirimo bashinzwe kugira ngo umuriro uboneke.

Icya kabiri ni uko icyo bisaba kugira ngo wa muriro uboneke mu buryo bw’amafaranga bibasaba nabyo bigenda bihinduka, ubwo rero tuba twagiye mu mibare tukabyitegereza tugakorana n’inzego zose bireba kugira ngo noneho dushyireho igiciro kijyanye mu by’ukuri n’uko bimeze ku isoko kugira ngo dukomeze tubone uwo muriro”.

Umuyobozi Mukuru wa Sosiyete y’ingufu REG Ron Weiss, yavuze ko kimwe mu bituma umuriro w’amashanyarazi ubahenda gishingiye ku bikorera mu rwego rwo gukora amashanyarazi bawubagurisha, bavuga ko bashora menshi bitewe n’izamuka ry’idorari, hakaza n’indi mpavu y’uko hari abagurisha umuriro REG bawukura mu bikomoka kuri lisansi nabyo bidasiba kuzamuka.

Hari kandi n’indi mpamvu y’uko ibikoreshwa mu gukora umuriro w’amashanyarazi bisaba ishoramari rinini kandi n’imirimo itandukanye y’ikigo ikaba ikeneye ubushobozi bwisumbuye.

RURA yaboneyeho gutangaza ko ibiciro bishya bizatangira gukurikizwa ku wa kabiri w’icyumweru gitaha, tariki ya 21 Mutarama 2020.

Ibiciro bishya bije bisimbura ibisanzwe, byashyizweho kuva tariki ya 13 Kanama 2018, hakaba hari hashize umwaka n’amezi atanu.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.