22°C , Mostly sunny | Kigali-Rwanda

Ibice bigize Ingoro y’amateka y’Urugamba rwo guhagarika Jenoside

Yanditswe na Kayira Etienne

Ku ya 08-07-2019 saa 11:14:01

Ibice bigize Ingoro y’Amateka y’Urugamba rwo guhagarika Jenoside yakorewe Abatutsi mu Rwanda mu 1994 ibarizwa mu Ngoro y’Inteko Ishinga Amategeko, bigaragaza intambwe zitandukanye abari Ingabo za RPA bateye bagerageza gushakira amahoro igihugu n’abagituye.

Mu kiganiro Bashana Médard, Umuyobozi w’Ingoro y’Amateka y’Urugamba rwo rwo Guhagarika Jenoside yagiranye n’Imvaho Nshya, yatangaje ko iriya Ngoro ngo izwe n’ibyumba bigera kuri 11 bikubiye mu byiciro 3 by’ingenzi.

Ati: “Ikiciro cya mbere gikubiyemo inzira y’imishyikirano y’Amahoro ya Arusha, amasezerano yaje gusinywa n’impande zombi ku itariki 4 Kanama 1993. Ni ukuvuga, yasinywe hagati ya RPF na Guverinoma y’u Rwanda yari ihagarariwe kuri icyo gihe na Habyarimana Juvénal. Ayo masezerano ariko nta bwo yaje kubahirizwa na Guverinoma yari iriho, kugeza ubwo yahisemo kwihutisha itegurwa ry’umugambi wa Jenoside yakorewe Abatutsi mu Rwanda n’ishyirwa mu bikorwa ryayo”. Iyo umuntu asura iyo Ngoro, ngo ni icyo kiciro aheraho.

Bashana yakomeje atangaza ko ikiciro cya kabiri k’Ingoro y’Amateka y’Urugamba rwo guhagarika Jenoside ngo gikubiyemo itangwa ry’Itegeko ryo guhagarika Jenoside, ryatanzwe n’uwari Umugaba Mukuru w’Ingabo za RPA Paul Kagame, ngo wari ufite Ipeti rya Jenerali Majoro (Major General) icyo gihe.

Ati: “Iryo tegeko ryatanzwe ku itariki 7 Mata 1994, ahagana saa kenda z’amanywa ku Murindi. Ku ikubitiro ryahawe ingabo 600 zari zaraje ziherekeje Abanyapolitiki bari muri CND. Izo ngabo zategetswe gusohoka zikirwanaho, zikarokora abakorerwaga Jenoside aha mu Mujyi wa Kigali no mu nkengero zawo”.

Iryo tegeko ariko, ngo ryanahawe n’izindi ngabo zose za RPA aho zari ziherereye, ko zifata ibyerekezo bitandukanye by’u Rwanda zigenda zirwana zinarokora abicwaga hirya no hino mu gihugu.

Bashana ati: “Muri iki kiciro cya kabiri harimo ibyumba bitatu by’imbere. Uko ari bitatu ni nabyo bigaragaza impamvu y’itangwa ry’Itegeko ryo guhagarika Jenoside kuko ryaje nyuma y’itariki ya 6 Mata 1994, ubwo indege y’uwari Perezida yaraswaga, bikaba urwitwazo rwo gutangiza ishyirwa mu bikorwa ry’umugambi wa Jenoside wari waracuzwe kuva mbere”.

Tukiri kuri iki gice cya kabiri cyo muri iyo Ngoro y’Amateka ibarizwa mu Nteko Ishinga Amategeko y’u Rwanda iri ku Kimihurura mu Karere ka Gasabo, Bashana yamenyesheje ko itangwa ry’itegeko kuri batayo ya gatatu yari iri muri iyi ngoro yitwaga CND, yari yaraje iherekeje abanyapolitiki ba FPR-Inkotanyi baje gushyira mu bikorwa amasezerano ya Arusha yavugaga ko hagombaga kujyaho Guverinoma y’inzibacyuho yaguye y’ubumwe bw’Abanyarwanda, hakanajyaho Inteko Ishinga Amategeko y’inzibacyuho.

Ati: “Abo basirikare bari muri CND ubwo yari irimo iraswaho, abantu batangiye kwicwa muri Kigali no mu nkengero, ni bo bahawe itegeko ku ikubitiro n’Umugaba Mukuru w’Ingabo za APR, Maj. Gen. Paul Kagame ngo basohoke birwaneho batangire no kurokora abicwaga muri Kigali no mu nkengero”.

Muri iyi Ngoro nanone hanabonekamo ibyumba bitandukanye binarimo inkuta zishushanyijeho ishusho y’urugamba, ahabanza, hari urugaragaza uko Jenoside igitangira igihugu cyari cyasenyutse. Mu bice bikurikira hari urugaragaza uko urugamba rutari rworoshye ku ngabo za RPA zari muri CND, ndetse hakabonekamo n’urushushanyijeho intwaro nto izi ngabo zarurwanye zifite, ariko zibasha gutsinda urugamba.

Igice cya gatatu nkuko Bashana Umuyobozi w’Ingoro yakomeje abisobanurira Imvaho Nshya, kerekana neza uko itegeko ryo gutangira kwerekeza mu bindi bice by’igihugu nko mu kerekezo k’Iburasirazuba bw’Amajyepfo, icyo hagati ndetse n’ik’Iburengerazuba ryatanzwe.

Hakurikijwe itegeko ry’Umugaba Mukuru w’Ingabo zahoze ari iza APR, abo basirikare ngo bari bafite inshingano zo kurokora Abatutsi bicwaga hirya no hino mu gihugu, gusenya ibirindiro by’umwanzi wari uri gushyira mu bikorwa umugambi wa Jenoside ndetse akazabona Jenoside yahagaze na Guverinoma yari irimo ikora Jenoside yakuweho, amahoro yagarutse mu Rwanda.

Ubwo Imvaho Nshya yasuye iyi Ngoro y’Amateka y’ Urugamba rwo Guhagarika Jenoside, yabashije kwibonera urugamba rwabereye ku Musozi wa Rebero, wabereyeho intambara ikomeye cyane ndetse n’uko wafashwe bigatuma isura y’imirwano mu Mujyi wa Kigali ihinduka kuko habonetse inzira yo kurokoreramo Abatutsi mu bice by’Amajyepfo ya Kigali, ibirindiro byari ahirengeye ku Ngabo za RPA ndetse iyo nsinzi iza gufasha mu gutesha Ingabo za Leta yiyitaga iy’Abatabazi guhunga yerekeza mu bice byahoze ari Gitarama, ikomereza i Gisenyi no muri Repubulika Iharanira Demokarasi ya Kongo, iki gihugu kikitwa Zaïre yayoborwaga na Maréchal Mobutu Sese Seko.

Ibyumba bikubiyemo imigendekere y’Urugamba rwo Guhagarika Jenoside yakorewe Abatutsi bifite umwihariko w’amatara yaka bitewe n’inkuru ya buri kimwe. Kuva ku ibara ry’umutuku nk’ibara ry’aho Jenoside yarimo ikorwa rukomeye, kugeza ku cyatsi nk’ibara rigaragaza amahoro ari naryo ricanwa ahari ikizere ingabo za APR zamaze kwinjira mu gihugu ku bwinshi.

Ibice bimwe na bimwe byayo kandi bigaragaza ubuhamya bw’abakiriho mu mashusho. Hashyizwemo icyumba kihariye cyubatsemo ishusho y’Umusozi wa Rebero igaragaza mu buryo bwagereranywa n’amashusho, uko gufatwa kwawo kwahinduye isura y’urugamba muri Kigali bigaha ingufu Ingabo zari iza RPA.

Iyo usuye neza iyo Ngoro witonze, koko usanga ibyumba bigera kuri 11 bisozwa n’ikigaragaramo gushimira abasivili b’abenegihugu n’abanyamahanga bitanze bakagira uruhare mu guhisha Abatutsi bahigwaga, abayoboye Ingabo za RPA babereka ahari abashobora kurokorwa, abirwanyeho n’abazamuye ijwi ryabo muri icyo gihe kitari cyoroshye bavuga ukuri kw’ibyabaga.

Hari n’icyumba kihariye cy’aho abasirikare ba RPA muri CND bavuriraga bagenzi babo babaga bakomeretse ndetse n’Abatutsi batabarwaga. Aha habonekamo ibibumbano bibiri by’abasirikare b’abaganga bavura undi uryamye ku gitanda ndetse bafite ibikoresho bitandukanye byo kwifashisha mu kumuvura.

Usibye ibi bishushanyo n’ibigaragara hanze, hari ibindi bibiri by’abasirikare bakiriho babashije kurokora Abatutsi bicwaga. Ingoro y’Amateka y’Urugamba rwo Guhagarika Jenoside, inafite ibice biri hanze bigaragaza ibibumbano bitandukanye birimo ikigaragaza imbunda ya 12.7 mm machine gun, iri hejuru y’iyi nyubako yifashishijwe mu gukumira cyane cyane ibitero byabaga biturutse muri Camp GP; icy’umusirikare wunamiye bagenzi be ba RPA baguye ku Rugamba rwo guhagarika Jenoside, ndetse n’igikubiyemo amateka yose umuntu aba yeretswe muri iyi Ngoro.

Umuyobozi w’iyo Ngoro y’amateka Bashana Médard, yatangaje ko isurwa cyane kuko amateka ayirimo agaragaza ukuri ku nzira iruhije ingabo zari iza RPA n’abanyapolitiki bayo banyuzemo bashakira Abanyarwanda bose amahoro arambye.

TANGA IGITEKEREZO

Leave a Reply

Your email address will not be published. Required fields are marked *