19°C , Partly sunny | Kigali-Rwanda
Ibikoresho byifashishwa mu maresitora bigomba kogeshwa amazi ashyushye (Foto Nshimiyimana E)

Huye:Resitora zasabwe gukoresha amazi ashyushye mu gusukura ibikoresho

Yanditswe na NSHIMIYIMANA EMMANUEL

Ku ya 17-01-2018 saa 07:17:08

Mu rwego rwo kwimakaza isuku no kwirinda indwara zikomoka ku mwanda, abacuruza ibiribwa bitetse baributswa ko ari ngombwa cyane kwifashisha amazi ashyushye mu gutunganya ibikoresho bifashisha, kuko ari bwo buryo bwizewe bwo kunoza isuku y’ibyo bikoresho.

Ibikoresho byifashishwa mu maresitora bigomba kogeshwa amazi ashyushye (Foto Nshimiyimana E)

Ibi byatangajwe nyuma y’aho Akarere ka Huye gafatiye ingamba zo gufatanya n’abafatanyabikorwa batandukanye mu kwimakaza isuku, aho buri wa gatanu habaho umwanya wo kugenzura isuku, by’umwihariko ahahurira abantu benshi.

Ni mu gihe kandi abaganga batandukanye bahamya ko indwara nyinshi abantu bivuza kwa muganga, usanga zifitanye isano n’isuku nke.

Gusa ngo mu rwego rwo guhangana n’izo ndwara zikomoka ku mwanda, ni ngombwa ko abantu bakaza ingamba zo kunoza isuku by’umwihariko mu gutegura ibiribwa, bakoresha amazi ashyushye mu gukora isuku y’ibikoresho abantu batekeramo n’ibyo bariramo, nk’uko bigarukwaho na muganga Iraguha Emmanuel, ushinzwe isuku n’isukura mu bitaro bya Kaminuza bya Butare (CHUB).

Yagize ati “Abantu benshi bakunda kwibwira ko amazi meza ari amazi bavomye kuri robine, ariko iyo umuntu ayavomye agahita ayanywa mu by’ukuri nta bwo ayo mazi aba ari meza kuko muri ayo mazi hashobora kuba harimo udukoko twanduza indwara z’impiswi.”

Iraguha yakomeje agira ati “Ahubwo no mu maresitora abakwiye koza biriya bikoresho bakoresha bagaburira abakiriya babo bakoresheje amazi atetse ndetse agakoreshwa agishyushye byaba ari akarusho.

Bakwiye gukoresha amazi ashyushye ndetse atetse kugira ngo twa dukoko dupfe ku ikubitiro, kandi binatange ikizere ko cya gikoresho cyakoreshejwe n’abantu benshi gifite isuku.”

Hari hashize iminsi umukozi w’Akarere ka Huye ushinzwe ihuriro ry’abafatanyabikorwa Kayitare Leon Pierre, asabye abajyanama b’ubuzima kurushaho kwita ku suku.

Kayitare yanagaragaje ko mu bikorwa by’abajyanama b’ubuzima ndetse n’abandi bafatanyabikorwa b’Akarere bakora ibijyanye n’isuku, bakwiye gutekerezwa uko bakongera imbaraga mu bukangurambaga bwo gutoza abaturage kugira umuco isuku.

Bamwe mu baturage baganiriye n’Imvaho Nshya, nabo bemeza ko hari intambwe igenda iterwa mu kurushaho kunoza isuku, gusa bakagaragaza ko imbaraga zikwiye gukomeza gishyirwa mu bukangurambaga, by’umwihariko bwo kunoza isuku y’ahahurira abantu benshi.

Manishimwe Nathan, utuye mu Murenge wa Tumba yagize ati “Gukoresha amazi atetse byo biragenda byubahirizwa kuko no mu rusengero barabitwigisha, ariko icyo cyo koza ibikoresho byo mu gikoni hifashishijwe amazi ashyushye ni kiza ariko cyo wenda abantu benshi ntibaratangira kukitabira.”

 

TANGA IGITEKEREZO

Leave a Reply

Be the First to Comment!

avatar