Huye: Uruhare rw’abagore bayobotse kwipimisha batwite mu kurwanya igwingira

Yanditswe na TUMUKUNDE GEORGINE

Ku ya 21-10-2020 saa 06:27:12
Mukamana Marguerite yatangaje ko yubahiriza gahunda zo kwipimisha uko zagenwe

Abagore bo mu Karere ka Huye bayobotse gahunda yo kwipimisha inshuro 4 igihe batwite barishimira ko bibafasha kubungabunga ubuzima bwabo n’ubw’abana, bakavuka bameze neza, bikabarinda igwingira. Barakebura bagenzi babo batabyitabira kuko baba bashyira mu kaga ubuzima bwabo n’ubw’abana.

Bamwe mu baganiriye n’Imvaho Nshya barimo Mukamana Marguerite utuye mu Kagari ka Buhimba, mu Murenge wa Rusatira, watangaje ko iyo atwite yubahiriza ziriya nshuro zagenwe, kandi asanga birimo inyungu nyinshi; yasobanukiwe uruhare bifite mu mikurire y’umwana.

Ubwo yari amaze kwipimisha kwa muganga, yagize ati: “Kwipimisha kane ni ngombwa, umenya igihe uzabyarira n’iyo hari ikibazo wenda utarya neza, muganga arakubwira ati ndabona umwana afite intege nkeya cyangwa akabona ntufite ibiro umugore agomba kubyara agezeho […]. Ubu nipimishije ubwa mbere, ariko no mu gihe gishize nari nipimishije inshuro enye”.

Yakomeje avuga ko igihe yagiye kwipimisha agirwa n’inama zo kurya indyo yuzuye, kugira isuku no kuruhuka kugira ngo we n’umwana bagire ubuzima bwiza.

Muhawenimana Euphrasie utuye mu Mudugudu wa Giseke, mu Kagari ka Sazange mu Murenge wa Kinazi, abyaye gatatu aritegura kwibaruka undi mwana, yagarutse kuri zimwe muri serivisi ahabwa iyo yagiye kwipimisha.

Ati: “Nko ku nda ya mbere, iyo uje kwipimisha baguha inzitiramibu, bagufata neza ariko reba nawe umuntu witeguye umugeni! Abaganga bakugira inama, bagenda bareba uko uruhinja rukura mu nda, bakubwira uburyo ugomba kurya imbuto, imboga […], ifunguro ryange riba ririmo imboga zikajyana n’ibirayi, ibijumba, imyumbati, umuceri, igitoki n’ibindi, nkunda guhinga avoka na zo nkazitegura, n’imineke n’igikoma”.

Muhawenimana Euphrasie arakangurira abagore guha agaciro gahunda yo kwipimisha inshuro 4

Avuga imyato gahunda yo kwipimisha kuko yamuramiye ubwo yari yagize ikibazo atwite umwana acukije.

Ati: “Nari nagize ikibazo cy’uko ntazibyaza kandi abandi bana narabibyaje (yababyaye atabazwe), abaganga barabibonye bihutira kunyohereza ku ivuriro rikuru barankurikirana, mbyara bambaze. Iyo nza kuguma mu rugo cyangwa nkaba naraje kwipimisha igihe cyararenze, umwana aba yaragize ikibazo nange nkakigira. Ubu umwana ameze neza ariruka akajya kuvoma,…”

Imiterere ya gahunda yo kwipimisha inshuro 4

Umuganwa Marie Chantal Umuforomokazi mu Kigo Nderabuzima cya Rusatira, ukora muri serivisi yo gusuzuma abagore batwite, yasobanuye uko bafasha umubyeyi utwite no kurinda umwana igwingira.

Ati: “Ku nshuro ya mbere abagore tubatuma abagabo kugira ngo tumenye ubuzima bw’ababyeyi bose, tukamenya n’uko tuzafata ubuzima bw’umwana muri rusange”.

Asobanura ko iyo umubyeyi apimishije inda hakiri kare babasha kumufasha bakarwanya igwingira ry’umwana kuko ritangira akiri mu nda. Iyo umubyeyi atabashije kubona indyo yuzuye, hashobora kubaho kudakura k’umwana mu nda kandi umubyeyi utarapimishije inda ntabimenya. Avuga ko akenshi abo babyeyi babyara abana bafite ibiro bikeya, imikurire yabo ntigende neza cyangwa bikaba byabaviramo gupfa.

Ati: “Iyo yipimishije kare ahabwa inama ku mirire, iyo umuntu yabashije gufata indyo yuzuye, agafata akaruhuko, akabasha gufata ibinini byongera amaraso, akenshi tugira abana badafite igwingira”.

Umuganwa asobanura ko umugore agomba kujya kwipimisha akibura imihango, kwa muganga bakareba impamvu yayibuze; niba yarasamye cyangwa ari ikindi kibazo cyabiteye.

Ku nshuro ya mbere (mbere y’ibyumweru 12), umugore ajyana n’umugabo we bagakorerwa ibizamini hakarebwa ubuzima bw’ababyeyi bose, bakagirwa inama, bagatahana n’ibinini byongera amaraso.

Umuganwa Marie Chantal, Umuforomokazi mu Kigo Nderabuzima cya Rusatira

Ku ya kabiri (hagati y’ibyumweru 12 na 24), abagore batwite bakorerwa ibizamini, hakarebwa uburebure bwa nyababyeyi bikagendana n’iby’umweru inda imaze, ngo hari igihe basanga bidahura, bagahita bamwohereza ku bitaro akajya guca mu cyuma (ecographie) hakarebwa impamvu ibitera. Bahabwa n’inama zireba n’ubuzima.

Ku ya gatatu (hagati y’ibyumweru 24 na 28) ni ukureba imikurire y’umwana muri rusange. Ku nshuro ya 4 (hagati y’ibyumweru 28 na 37) na bwo harebwa ubuzima bw’umwana uri mu nda, buri mubyeyi akagirwa inama hakurikijwe ibyo babonye bamupima.

Umuganwa agaragaza ko kuri kiriya Kigo Nderabuzima bari kuri 56% by’abagore bipimishije inshuro enye.

Aranakangurira abagabo kujya baherekeza abagore babo bagiye kwipimisha n’igihe bagiye kubyara. Ati: “Turabashishikariza guherekeza abagore babo n’igihe baje kubyara kugira ngo babashe kubona uburemere biba bifite, iyo babashije kububona no kuboneza urubyaro biroroha n’umwe utabyumvaga abona ko bikaze agafasha umubyeyi kuboneza urubyaro, bityo tukarwanya igwingira ry’abana, kuko iyo umwana yonse nibura imyaka ibiri tuba tuzi ko igwingira ari 0%”.

Abagore batipimisha kubera imyumvire ishingiye ku muco baraburirwa

Hitiyaremye Nathan Umuyobozi w’Ishami rishinzwe Ubuzima mu Karere ka Huye, avuga ko abaturage bakwiye kumenya ko gupima abagore batwite bigamije gusigasira umwana ukiri mu nda kugira ngo azavuke yuzuye, afite ibiro bishyitse, uburebure bushyitse, kuko iyo atitaweho akiri mu nda aba afite ibyago byinshi byo kugwingira.

Gupimisha inda byinjira muri gahunda yo kurandura imirire mibi mu bana bari munsi y’imyaka 5 by’umwihariko.

Nkuko Hitiyaremye Nathan yabisobanuye, kugwingira ni ubwoko bumwe bw’imirire mibi y’akarande, usanga uburebure bw’umwana budahuye n’imyaka afite, hakabaho gutakaza ibiro na byo ntibihuye n’imyaka afite, akenshi iyo umwana yagwingiye ni imirire mibi idashobora gukosoka.

Avuga ko hari abatitabira kubera imyumvire ishingiye ku muco. Ati: “Umugore aravuga ati nta bwo nakwipimisha inda itaragaragara bayiroga cyangwa abantu bakanseka ngo ndajya kwerekana iki mu gihe inda itaragaragara,…Ikindi ni imyumvire ku bantu bamwe batari bamenya ibyiza byo kwipimisha inshuro 4. Ubukangurambaga bwacu bugamije kugira ngo twumvishe abantu ko nta muntu ushobora kuroga inda”.

Hitiyaremye Nathan Umuyobozi w’Ishami rishinzwe Ubuzima mu Karere ka Huye

Agaragaza ko kwipimisha ku bagore batwite biri mu mihigo y’aka karere, bafite intego y’uko abipimisha inshuro 4 bagera nibura kuri 60 %. Ati: “Uyu munsi tugeze ku gipimo cya 39,6%, ubukangurambaga burakomeje”. Abana bafite igwingira ni 26%.

Kurwanya igwingira bitangirana n’umunsi umugore yasamye

Gico Justin Umujyanama mu bijyanye n’imirire mu Kigo k’Igihugu gishinzwe Ubuzima (RBC), avuga ko gahunda yo kurwanya igwingira itangirana n’umunsi umugore yasamye kugeza umwana yujuje amezi 24, hari ibikorwa bitandukanye bikorwa bikubiye muri gahunda y’iminsi 1000 ya mbere y’ubuzima bw’umwana.

Muri gahunda yo kwipimisha, asobanura ko umugore utwite ahabwa inyigisho zitandukanye zifitiye akamaro kanini umwana atwite ndetse na we ubwe, bikarinda umwana kugwingira.

Asobanurirwa amafunguro agomba gufata n’inshuro ayafata buri munsi; afata ifunguro rito riri hagati y’amafunguro manini, kugira ngo we n’umwana urimo gukura bagire imbaraga zihagije n’imirire myiza.

Mu biribwa umugore utwite akeneye bikungahaye ku ntungamubiri kurusha ibindi harimo amata, imbuto n’imboga bishyashya, inyama, amagi, amafi, ibinyampeke, ubunyobwa, amashaza n’ibishyimbo.

Gico Justin akomeza uvuga ko mu kwipimisha umugore utwite ahabwa ibinini bya feri na aside folike bimurinda kubura amaraso bikanakumira ko umwana yavukana ubumuga ubu n’ubu. Ahabwa ibinini by’inzoka kugira ngo habeho ikumira ry’ibura ry’amaraso.

Habaho kumenya uko umugore ahagaze ku birebana na virusi itera SIDA no gufata imiti igihe muganga yayigennye. Akangurirwa kwirinda marariya, kugira isuku, gukaraba intoki n’ amazi meza n’isabune mbere yo gutegura ibiribwa, kurya, avuye mu bwiherero cyangwa gusukura umwana.

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.