Huye: Nyirarukundo yasabye ababyeyi b’Intwaza gukomeza kugira ikizere cy’ubuzima

Yanditswe na Uwimana Donatha

Ku ya 02-12-2019 saa 07:20:22
Umunyamabanga wa Leta muri MINALOC nyuma yo kuganira n'Ababyeyi b'Intwaza, yanahuye n'Abakozi bakorera mu rugo rw'Impinganzima

Umunyamabanga wa Leta muri Minisiteri w’Ubutegetsi bw’Igihugu ushinzwe imibereho myiza y’abaturage, Nyirarukundo Ignacienne, yasabye ababyeyi b’Intwaza gukomeza kugira ikizere cy’ubuzima kandi ubuyobozi bw’igihugu bukaba buzakomeza kubaba hafi.

Yabitangaje ubwo we n’abandi bayobozi mu nzego zitandukanye basuraga urugo rw’Impinganzima rutuyemo ababyeyi b’Intwaza mu murenge wa Mukura mu karere ka Huye mu ntara y’Amajyepfo.

Intego y’uruzinduko yari ukuganira n’aba babyeyi no kumenya imibereho yabo ya buri munsi.

Ababyeyi b’Intwaza baba mu rugo rw’Impinganzima rutuwemo n’abayeyi 99, bagizwe n’abakecuru 92 ndetse n’abasaza 7.

Nyirarukundo yashimiye ababyeyi b’Intwaza ko nyuma yo kubura imiryango yabo yishwe muri Jenoside yakorewe Abatutsi mu 1994, bakomeje gutwaza bagahangana n’ubuzima. Yabasabye gukomeza kugira ikizere cy’ubuzima, kandi ubuyobozi bw’Igihugu buzakomeza kubaba hafi.

Umuyobozi w’Akarere ka Huye wungirije ushinzwe imibereho myiza Kankesha Annonciata, yashimiye inzego zose zigira uruhare mu kwita ku mibereho myiza y’Intwaza aho ziri hose mu gihugu. Yavuze ko by’umwihariko ubuyobozi bw’Akarere ka Huye buzakomeza kwita kuri aba babyeyi b’Intwaza baba mu mpinganzima yo muri Huye.

Yavuze ko aba babyeyi b’intwaza Abanyarwanda babigiraho byinshi birimo kumenya guhangana n’ubuzima nyuma y’ibihe bikomeye.

Azele Nyirangirumwami w’imyaka 79, ni umwe mu babyeyi b’Intwaza batuye mu rugo rw’Impinganzima, yashimiye  Perezida Paul Kagame na Madamu Jeannette Kagame bashyizeho urugo rw’Impinganzima rwatumye bongera kugira ikizere cy’ubuzima.

Uyu mubyeyi w’Intwaza yavuze ko bari barataye ikizere cy’ubuzima nyuma ya Jenoside yakorewe Abatutsi mu 1994, ariko nyuma yo gushyirwa mu uru rugo, bongeye kugarura ikizere cyo kubaho. Nyirangirumwami avuga ko yaje mu rugo rw’Impinganzima afite ibiro 55, ariko ubu afite ibiro 70.

Nyuma yo kuganira n’ababyeyi b’Intwaza, Umunyamabanga wa Leta muri MINALOC Nyirarukundo Ignacienne, yanahuye n’Abakozi bakorera mu rugo rw’Impinganzima baganira ku nshingano zabo.

Umwanditsi:

Uwimana Donatha

Tanga Igitekerezo

Email yanyu ntigaragazwa ku rubuga. Amazina na Email ni ngombwa.