27°C , Partly sunny | Kigali-Rwanda
Iki ni ikiraro rusange cyororewemo inka zirenze 20 (Ifoto Nshimiyimana E)

Huye: Kororera hamwe byafashije umushinga wabo wo gucuruza ifumbire

Yanditswe na Nshimiyimana Emmanuel

Ku ya 12-02-2019 saa 16:24:47

Abaturage bo mu Kagari ka Kabusanza, mu Murenge wa Simbi mu Karere ka Huye batahuye ibanga ryo kubyaza umusaruro ifumbire y’imborera bayigurisha n’abayikeneye.

Baributsa aborozi ko kororera hamwe no gufata inka neza bishobora gufasha aborozi kwiteza imbere binyuze mu kugurisha ifumbire.

Aba baturage bororera mu kiraro rusange kirimo inka za kijyambere zahawe imiryango igeze kuri 20 y’abatishoboye batujwe mu Mudugudu w’Ikitegererezo wa Kabusanza.

Aba baturage kimwe n’ubuyobozi bagaragaza ko kororera hamwe, gufata inka neza zitaweho, ari ibanga rikomeye mu kugwiza ifumbire ndetse no kuyibonera isoko cyane ko ngo umubare w’abakeneye kugura ifumbire ari munini ugereranyije n’aba bayifite.

Nshimiyimana William umwe mu bafite inka muri iki kiraro, ati: ʺKuba inka ziri hamwe, ahantu hamwe kuko tuba twazigaburiye neza ndetse zigasasirwa icyarire tubona ifumbire kandi twasanze na yo ikenerwa cyane kandi kuko dukorera hamwe iboneka ari nyinshi ndetse n’umushoramari uyikeneye akayibonaʺ.

Yunzemo ati: ʺUmuntu wese uyikeneye biramworohera kuko hari ubwo ibishingwe biba byabaye byinshi, ariko rero byose ni uko turi hamwe biranoroha kubonera isoko hamwe kuruta uko umuntu yaba afite agatebo k’ifumbire ku giti ke ari umweʺ.

Uwizeyimana Jean Damascene na we yagize ati: ʺAbatugurira ifumbire baraboneka ndetse twamaze kubona ko ifumbire na yo ari ikintu kiri mu nyungu tubona kuko iyo yabaye nyinshi kubona isoko usanga byoroshye rwoseʺ.

Aba baturage kandi bavuga ko n’abandi baturage batuye ahantu hamwe bashobora gushyira inka zabo hamwe cyane ko ngo usibye no kugurisha ifumbire byanabafasha ku mutekano w’inka ndetse n’abavuzi b’inka bakabasha kubaha inama mu buryo bwo kwita kuzitaho no kuzivura mu gihe bibaye ngombwa.

Icuruzwa ry’ifumbire kandi rigarukwaho n’Umunyamabanga Nshingwabikorwa w’Umurenge wa Simbi na we wemeza ko ari kimwe mu byo aborozi bakwiye kwitaho mu gihe bakora ubworozi ndetse akanagaragaza ko isoko ry’ifumbire rigihari ndetse kurihaza ari cyo kibazo.

Yagize ati: ʺIkiraro rusange byagaragaye ko cyabateje imbere by’umwihariko ikijyanye no gushyira umusaruro ku isoko ndetse n’ifumbire irimo kandi byose biba bitewe n’uko inka ziri hamwe zigaburirwa hamwe, ifumbire ikabonekera hamwe ndetse n’uyishaka akabasha kubona nyinshi akeneyeʺ.

Yunzemo ati: ʺBasagura iyo gukoresha mu mirima yabo ariko banabona umusaruro mwishi w’ifumbire kandi ubona ko ari ikintu gifite imbaraga kandi by’umwihariko mu gihe k’ihinga ry’ibigori mu kwezi kwa Nzeri n’Ukwakira isoko ry’ifumbire riraboneka cyane, ariko n’abahinga insina na bo barayikenera cyaneʺ.

Yunzemo ati: ʺByaragaragaye ko ifumbire ari ikintu gishobora kuvamo amafaranga kandi wagira inka nyinshi cyangwa inka imwe amafaranga y’ifumbire umworozi ayabona bitewe n’uko yagaburiye inka; uko yayahiriye ikarya ndetse n’icyarire ashyira mu kiraro ari cyo kivamo ifumbire ʺ.

Ahamagarira abaturage kwita ku bworozi bw’inka, bakazigaburira neza bakabona umusaruro utubutse w’ifumbire cyane ko muri uriya murenge na ho abakeneye ifumbire ari benshi cyane. Ahamya ko uwabikora kinyamwuga ashobora kwiteza imbere bivuye ku ifumbire.

Iki ni ikiraro rusange cyororewemo inka zirenze 20 (Ifoto Nshimiyimana E)

TANGA IGITEKEREZO

Leave a Reply

Your email address will not be published. Required fields are marked *