18°C , Showers | Kigali-Rwanda
Hakuzimana Olivier wegukanye umwanya wa mbere muri Tour de Huye 2019 mu bakoresheje amagare asanzwe yahembwe igare

Huye: Hakuzimana yegukanye irushanwa ryo gushaka impano mu gusiganwa ku magare

Yanditswe na BUGINGO FIDELE

Ku ya 14-05-2019 saa 08:58:54

Hakuzimana Olivier ufite imyaka 19 y’amavuko ni we wegukanye irushanwa ryo gushaka impano ryabereye i Huye “Tour de Huye” mu bakinishije amagare asanzwe ya pinebalo.

Iri siganwa ryabaye tariki 11 Gicurasi 2019  ryari ryateguwe n’ikipe  Cycling Club for All (CCA) ibarizwa mu Karere ka Huye ku bufatanye n’akarere   ryabereye mu mujyi wa Huye aho abasiganwa mu byiciro bitandukanye bazengurutse umugi.

Mu bakoresha amagare asanzwe mu bahungu basiganwe intera ya kirometero 58 maze Hakuzimana Olivier ufite imyaka 19 y’amavuko  aba uwa mbere akurikirwa na Misago Appolinaire ufite imyaka 21   na Hategekimana Jean Paul ufite imyaka 22    bose bakoresheje  isaha 1, iminota 22 n’amasegonda 28.

Mu bakobwa basiganwe intera ya kirometero 31,  Manishimwe Jeannette ufite imyaka  19 yabaye uwa mbere akoresheje iminota 53 n’amasegonda 40 akurikirwa na Mutuyimana Genetha ufite imyaka 16 bakaba barakoresheje ibihe bingana naho ku mwanya wa 3 haza  Iyaturinze Lucie ufite imyaka wakoresheje iminota  57 n’amasegonda 36.

Uretse abakoresheje amagare ya pinebalo, abasanzwe bakina uyu mukino na bo barakinnye. Mu ngimbi “Juniors” basiganwe intera ya kirometero 76, Habimana Jean Eric ukinira Fly ni we wabaye uwa mbere akoresheje  isaha 1, iminota 46 n’amasegonda  42 yakurikiwe na Nzeyimana Muhirwa (1h46’42) na Mutabazi Cyprien (1h46’ 46”).

Mu kiciro cy’abakuru “Elite” na bo basiganwa kirometero 76,  Ruberwa Jean yabaye uwa mbere akoresheje isaha 1, iminota 45 n’amasegonda 36 akurikirwa na  Uwiduhaye (1h45’36”) na  Nduwayo Eric (1h46’48”).

Nk’uko byemezwa n’ubuyobozi bwa CCA abakinnyi bitwaye neza mu basiganwa bakoresheje amagare ya pinebalo bazabafasha bakazamura urwego rwabo.

Hakuzimana Olivier wegukanye umwanya wa mbere muri Tour de Huye 2019 mu bakoresheje amagare asanzwe yahembwe igare

TANGA IGITEKEREZO

Leave a Reply

Your email address will not be published. Required fields are marked *