27°C , Partly sunny | Kigali-Rwanda

Huye: Amakipe azakina imikino ya nyuma mu irushanwa ribanziriza igice cya Marato yaramenyekanye

Yanditswe na BUGINGO FIDELE

Ku ya 14-01-2020 saa 15:17:52
Ikipe ya IPRC Huye izakina umukino wa nyuma na ENDP Karubanda muri Basketball mu bakobwa

Nyuma y’imikino y’amajonjora, amwe mu makipe  azakina imikino ya nyuma y’irushanwa ribanziriza  isiganwa  ryo kwiruka ku maguru “Huye Half Marathon 2020”  yamaze kumenyekana.

Akarere ka Huye ku bufatanye na Minisiteri ya Siporo, ishyirahamwe  ry’imikino ngororamubiri mu Rwanda “RAF”  ndetse na  Cercle Sportif de Butare ( CSB )   bateguye    isiganwa ryo kwiruka ku maguru “Huye Half Marathon 2020”  rizaba ku nshuro ya mbere tariki 18 Mutarama 2020.

Mbere y’iri siganwa ariko hateguwe icyumweru cyahariwe imikino itandukanye yahuje ibigo by’amashuri bibarizwa i Huye n’amakipe y’impunzi za Kigeme na Mugombwa mu mikino itandukanye irimo Volleyball, Basketball no koga.

Iyi mikino yatangiye tariki 11 biteganyijwe ko izasozwa tariki 17 Mutarama 2020. Muri  Basketball mu bahungu  hari amakipe 8 agabanyije mu matsinda 2 aho itsinda A ryarimo  IPRC Huye, PSVF, Inkambi ya Mugombwa na Regina Pacis naho itsinda B rikabamo UR, GSOB, PSS Baptiste n’Inkambi ya Kigeme.

Nyuma y’imikino y’amajonjora ikipe ya IPRC Huye yatsinze GSOB amanota 59 kuri 36 muri ½ mu gihe ikipe ya UR Huye yatsinze PSVF amanota 59 kuri 44. Umukino wa nyuma uzahuza IPRC Huye na  UR Huye.

Mu bakobwa hari amakipe 4 yakinnye hagati  ari yo  IPRC Huye  yahuye na  GSOB naho UR Huye  ihura   na ENDP. Ikipe ya ENDP na IPRC Huye akaba ari zo zizakina umukino wa nyuma.

Mu mukino wa Volleyball mu bahungu hari amakipe 8 ashyirwa mu matsinda 2. Itsinda A ryarimo PSVF, UR, Inkambi ya Kigeme na Regina Pacis naho itsinda B ririmo GSOB, Philippe Neri, Inkambi ya Mugombwa n’Umuco VC.

Nyuma y’imikino y’amajonjora, muri ½, ikipe y’Umucyo VC yatsinze PSVF amaseti 3-0 naho umukino wa ½ wagombaga guhuza ikipe ya GSOB n’ikipe y’inkambi ya Kigeme ntiwaba bikaba biteganyijwe ko  uzakinwa tariki 15 Mutarama 2020 kugira ngo hamenyekane ikipe izakina n’Umucyo VC  ku mukino wa nyuma.

Mu bakobwa, ikipe ya IPRC Huye, GSOB  na  Regina Pacis  zakinnye hagati yazo, ikipe ya IPRC Huye izakina na Regina Pacis ku mukino wa nyuma.

Tariki 17 Mutarama 2020 ni bwo biteganyijwe ko imikino izasozwa hakinwa imikino ya  nyuma muri Volleyball, Basketball ndetse no mu kiciro cyo koga. Imikino ya Sitting Volleyball yo ikaba itarabashije kuba kubera ko amakipe yari yitabiriye shampiyona y’igihugu.

Nyuma yo gusoza iyi mikino hateganyijwe igitaramo k’imyidagaduro kizabera mu   Nzu ndangamurage y’u Rwanda i Huye hanyuma tariki 18 Mutarama 2020 habe isiganwa.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.