Huye: Abaturage 16 bashimiwe ibikorwa by’ubutwari byabaranze

Yanditswe na NSHIMIYIMANA EMMANUEL

Ku ya 04-02-2018 saa 10:37:51
Abaturage 16 batoranyijwe nk'abarinzi b'igihango muri Huye bashimiwe mu ruhame (Foto Nshimiyimana E)

Abaturage 16 bo mu mirenge itandukanye igize Akarere ka Huye, bambitswe imidari banahabwa ibyemezo by’ishimwe, kubera ibikorwa by’ubutwari byabaranze, cyane cyane mu gihe cya Jenoside yakorewe abatutsi.

Abaturage 16 batoranyijwe nk’abarinzi b’igihango muri Huye bashimiwe mu ruhame (Foto Nshimiyimana E)

Nk’uko bisobanurwa n’Umuyobozi w’Akarere ka Huye Kayiranga Muzuka Eugene, abashimiwe bose bakoze ibikorwa byiza Abanyarwanda bakwiye gufatiraho urugero, mu migirire yabo ya buri munsi.

Yagize ati “Abarinzi b’igihango twahembye uyu munsi, tukabambika imidari tukanabaha ibyemezo by’ishimwe, barashimwa ibikorwa byiza byakabaye bibera n’abandi urugero mu mikorere yabo ya buri munsi, rwo guharanira gukora neza kuko iyo ukoze ikiza kigusanga imbere.”

Muzuka avuga ko abahembwe barimo abaranzwe n’ibikorwa by’ubutwari  mu gihe cya Jenoside yakorewe abatutsi bagahisha abantu kandi bigaragara ko nta bushobozi budasanzwe bari bafite usibye urukundo, abagize uruhare mu gufasha abana b’imfubyi nyuma ya Jenoside ndetse n’abagerageje kuvugisha ukuri mu gihe k’inkiko Gacaca, bakemera kugaragaza ukuri ku byabaye mu gihe abandi bari bahisemo kwicecekera.

Umuyobozi w’Akarere ka Huye asaba rubyiruko by’umwihariko guharanira kurangwa n’ibikorwa by’ubutwari, cyane ko ngo ubusanzwe ntawaharanira kuba intwari mu gihe yamaze gusaza.

Yagize ati “Twagize amahirwe, twagize urubyiruko rwinshi kandi buriya nta bwo waharanira kuba intwari ushaje, ahubwo waharanira kuba intwari ukiri muto bya bikorwa biranga intwari ukabikora ugifite imbaraga, icyo twabwiraga urubyiruko rero ni ukubibutsa ko na bariya bana b’i Nyange bari urubyiruko nka bo.”

Ababyeyi bibukijwe ko nabo bakwiye kugira uruhare mu kwibutsa abana babo ko bakwiye gukurana umuco wo w’ubutwari no kwanga ikibi.

Bamwe mu batoranyijwe nk’abarinzi b’igihango bemeza ko iki gikorwa cyo gushimira abagize ibikorwa by’ubutwari kibatera ishema ndetse n’umwete wo kumva ko bakwiye gukomeza guharanira ikiza nk’uko bigarukwaho na Bagabo Emmanuel, batoranyijwe nk’abarinzi b’igihango.

Yagize ati “Ubu hari n’andi masomo nungutse kandi hari n’ikindi kizere nongeye kwigirira kuko mbonye ko mfitiwe ikizere nzakora cyane kugira ngo ntazatezuka kuri uru rugero rwiza bashyizeho.”

Undi muturage witwa Musabyimana nawe yagaragaje ko intego ye ari ukurangwa n’ubutwari. Yagize ati “Ikizere nagiriwe ngomba kugishyigikira ngakora ibikorwa byiza by’amahoro, ngakorana n’abo mu murenge wange tukabana neza nk’uko Umukuru w’igihugu abidusaba.”

 

 

Umwanditsi:

NSHIMIYIMANA EMMANUEL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.