21°C , Partly cloudy | Kigali-Rwanda
Bamwe mu bajyanama b'ubuhinzi (Foto Nshimiyimana E)

Huye: Abashinzwe kwamamaza ubuhinzi barasabwa kurushaho kwegera abaturage

Yanditswe na Nshimiyimana Emmanuel

Ku ya 15-08-2019 saa 16:29:15

Umuyobozi wungirije w’ikigo k’igihugu gishinzwe iterambere ry’ubuhinzi n’ubworozi (RAB) ushinzwe ubushakashatsi n’iyamamaza buhinzi, Dr. Bucagu Charles, arasaba abafite aho bahuriye no kwamamaza ibikorwa bigamije kongera umusaruro mu buhinzi kurushaho kwegera abaturage kugira ngo babafashe kongera ubumenyi ku buhinzi bwa kijyambere.

Dr. Bucagu avuga ko abafashamyumvire mu bihinzi n’abamamazabuhinzi ari abantu bakora byinshi mu guteza imbere ubuhinzi kandi bafite ubumenyi bwinshi kuko bahugurwa cyane bakaba ari abo kwizerwa.

Mu kiganiro yagiranye n’Imvaho Nshya nyuma yo kuganira n’abahinzi bo mu Karere ka Huye mu Murenge wa Mukura, yagaragaje byinshi kuri gahunda yo kwamamaza ibikorwa mu buhinzi, asaba ko ababikora babyongeramo imbaraga kandi abaturage nabo bakarushaho kwegera abafite ubumenyi kugira ngo babigireho.

Muri rusange ngo inzego zifite inshingano zo kwamamaza ubuhinzi harimo ikigo cya RAB n’ibigo byayo 13, inzego z’iyamamazabuhinzi zikorana n’inzego z’ibanze harimo abashinzwe ubuhinzi ku Murenge n’Akarere, abashinzwe iterambere mu Kagari bazwi nka CDO, hakazamo abamamazabuhinzi n’abafashamyumvire.

Dr. Bucagu avuga ko by’umwihariko abaturage batoranyirijwe gufasha abandi barimo abamamazabuhinzi ndetse n’abafashwamyimvire bari mu matsinda ndetse bakaba bafite inshingano yo kugira uturima abahinzi bakwiye kwigiraho imikorere yo kuzamura umusaruro.

Ati ‟Izo nzego zose dukorana mu buryo bwa hafi n’inzego z’ibanze kuko abamamazabuhinzi mu gihugu bageze ku bihumbi cumi na bine magana abiri (14.200) n’abafashamyumvire ibihumbi bibiri magana atanu (2500) bari ku rwego rw’Akagari, ba goronome bangana n’imirenge yose kongeraho abakora mu Karere.”

By’umwihariko kuri aba bamamaza buhinzi n’abafashamyumvire, Dr. Bucagu yibutsa ko bafashwa byinshi kugira ngo nabo babashe gufasha abandi ari yo mpamvu baba bakwiye kwiyambazwa.

Ati ‟Bariya bafite ubumenyi kuko batoranywa nk’inyangamugayo kandi banatoranywa kuko hari aho bageze mu buhinzi, ni abantu biyemeje gufasha bagenzi babo, ariko duhora duhugura tukifuza ko baduhora hafi bagakorana n’abashakashatsi bakareba ibikorwa kugira ngo bavome bwa bumenyi babugeze hasi kuri bagenzi babo.”

Avuga ko aba baturage bahuguwe by’umwihariko banafasha abaturage kumenya imbuto no kuzisakaza mu baturage, ati ‟Imbuto dukora zihita zigera mu mirima y’abo abaturage bakazimenya.”

Bamwe mu baturage bakora imirimo yo kumenyekanisha gahunda nziza zigamije kuzamura umusaruro w’abaturage, bemeza ko hari umurimo ukomeye bakora ariko nabo bakemeza ko uko RAB yagiye ibongerera ubumenyi byagize uruhare rukomeye cyane mu iterambere ry’ubuhinzi.

Semwiza Jean Damascene utuye mu Murenge wa Mukura, akora nk’umwamaza buhinzi, yagize ati ‟Twebwe dufasha abaturage kumenya byinshi mu byo duhugurwamo tukabereka ubumenyi tugenda twunguka mu gukora ubuhinzi neza, kandi tunabikora twifashishije n’imirima shuri tubagaragariza uko nabo bakwiye kuvugurura ubuhinzi.”

Semwiza by’umwihariko agaragaza ko hari byinshi amaze kwigezaho bitewe no gukora ubuhinzi neza, cyane ko avuga ko ibyo yahuguwemo byatumye aba umuhinzi ntangarugero mu gace atuyemo ndetse abaturage muri rusange bakaba bafite byinshi bamwigiraho.

Bamwe mu bajyanama b’ubuhinzi (Foto Nshimiyimana E)

 

TANGA IGITEKEREZO

Leave a Reply

Your email address will not be published. Required fields are marked *