28°C , Sunny | Kigali-Rwanda

Hon Ngoga yashyizwe mu itsinda ry’impuguke zigiye gukora gahunda y’impinduka muri CAF

Yanditswe na BUGINGO FIDELE

Ku ya 11-09-2019 saa 18:00:13
Abagize itsinda ry'impuguke bari mu nama na Perezida wa FIFA, Infatino ndetse na Perezida wa CAF, Ahmad

Hon Ngoga Martin usanzwe ari Perezida w’Inteko  Ishinga Amategeko  y’Umuryango w’ubumwe bw’ibihugu by’Afurika y’i Burasirazuba “EALA” akaba ari umuyobozi wungirije w’akanama gashinzwe imyitwarire  mu ishyirahamwe ry’umupira w’amaguru ku Isi “FIFA” (FIFA Ethics Committee-Investigatory) yashyizwe  mu mu itsinda ry’impuguke zigomba gukora gahunda y’impinduka mu impuzamashyirahamwe ry’umupira  w’amaguru muri Afurika “CAF”.

Iri tsinda ry’impuguke ryashyizweho n’ ishyirahamwe ry’umupira w’amaguru ku Isi “FIFA”. Uretse Hon Ngoga Martin  hari n’abandi bari muri iri tsinda barimo  Abdoulaye Diop (Mali), Hossam El Shafei (Misiri), Janet Katisya (Kenya)  na Anin Yeboah (Ghana).

Perezida wa FIFA, Gianni Infantino ni we watangije  gahunda y’iri tsinda mu nama yabereye i Cairo mu Misiri tariki 10 Nzeri 2019. Inshingano nyamukuru  y’iri tsinda ni ukongera ingufu no kwihutisha gahunda y’impinduka muri CAF.

Muri bimwe bitegerejwe iri tsinda ritegerejweho ni ibijyanye n’imicungire y’imari, kunoza imiyoborere ndetse n’imikorere n’imikoranire.

Perezida wa CAF, Ahmad Ahmad  ubwo  yatangizaga iyi nama yashimiye abagize iri tsinda kuba baremeye izi nshingano zo gufasha  mu kwihutisha impinduka. Yakomeje avuga ko bagiye bahura n’imbogamizi zitandukanye ari na yo mpamvu bafashe abantu bigenga ariko akizera ko bazafatanya byose bikagenda neza.

Perezida wa FIFA, Gianni Infantino  yagaragaje ko  ashyigikiye kandi yiteguye gukorana n’iri tsinda. Ati: “Ubufatanye  bwa CAF na FIFA nibigenda neza, umupira w’amaguru muri Afurika  uzagaragaza indi sura ku rwego mpuzamahanga.”

Mu byaganiriweho harimo kugenzura imikoresherezwe y’imari, gukorera mu mucyo, kugendera ku mahame, gutegura amarushanwa atandukanye mu buryo bwa kinyamwuga, kuzamura iterambere ry’umupira w’amaguru muri Afurika ndetse no kuzamura ubufasha bw’abanyamuryango 54  ba CAF .

Mu bindi byaganiriweho ni ikibazo cy’umutekano, imiyoborere y’umupira w’amaguru ndetse no gucunga neza ibyinjira bivuye mu marushanwa atandukanye n’ibindi bikorwa.

Abagize itsinda ry’impuguke bari mu nama na Perezida wa FIFA, Infatino ndetse na Perezida wa CAF, Ahmad

TANGA IGITEKEREZO

Leave a Reply

Your email address will not be published. Required fields are marked *