28°C , Partly sunny | Kigali-Rwanda

Hitezwe irushanwa rizamura impano nshya mu muziki nyarwanda

Yanditswe na Gisubizo Gentil M.

Ku ya 11-08-2020 saa 13:06:55

Ikigo Genesis Broadcasting Network cyateguye irushanwa ry’umuziki ryitwa “Head’s Up Music Competition” rigamije kuzamura no kumenyekanisha abafite impano mu muziki nyarwanda.

Ab’inkwakuzi batangiye kwiyandikisha muri iri rushanwa kuko byatangiye tariki 3 Kanama bikorerwa ku rubuga www.genesisbizz.com, bikazasozwa ku ya 31 Kanama 2020.

Niragire Marie France wateguye iri rushanwa, mu kiganiro n’Imvaho Nshya yavuze ko icyo agamije ari ugufasha abana bafite impano ariko babuze aho bazigaragariza kugira ngo abantu bazimenye.

Ati: “Gukora ibi nta y’indi nyungu mbifitemo ahubwo ni urukundo rw’umuziki kuko njya mbona abana benshi bafite impano ariko babuze ubushobozi cyangwa se aho banyura kugira ngo abantu babamenye, ari na yo mpamvu tuzabakorera indirimbo tukabaha n’andi mafaranga azabafasha muri urwo rugendo.”

Abemerewe guhatana ni abafite impano mu kuririmba havuyemo abamaze kuba ibyamamare; ikigenderwaho kandi muri iri rushanwa niuko abiyandikisha bagomba kuba bari hagati y’imyaka 10 na 35.

Irushanwa rizatangira tariki ya 12 Nzeri, risozwe kuya 26 Ukuboza 2020 ubwo hazemezwa batatu bazaba aba mbere.

Uwa mbere azakorerwa indirimbo esheshatu (mini-album) ndetse n’amashusho y’indirimbo ebyiri. Nyuma y’ibyo azanahabwa Miriyoni imwe y’amafaranga y’u Rwanda.

Niragire Marie France yateguye irushawa ry’abanyempano bashya mu muziki nyarwanda yise ‘Head’s Up Music Competition’

Uwa kabiri azahembwa ibihumbi Magana 500, mu gihe uwa gatatu we azahabwa ibihumbi 300.

Ikiciro cya mbere kizaba kigizwe n’abantu 80 bazarushanwa, hagasigaramo 40 ari bo bazakomeza guhatana kugera hasigayemo icumi bazagera ku cyiciro cya nyuma. Ku rushanwa bizajya biba buri cyumweru binyuze imbonankubone (live) kuri Genesis TV.

Tariki ya 6 Ukwakira 2020 hazatangazwa urutonde rw’abantu 40 batsinze bakwiye gukomeza mu kindi kiciro.

Abo bose bazarushanwa kugeza tariki ya 13 Ukuboza 2020 hasigaremo icumi gusa ari na bo bazaba bageze mu cyiciro cya nyuma.

Abo icumi bazaba batsinze bazakorana indirimbo ivuga ku irushanwa rya Head’s Up. Nyuma y’aho buri muhanzi azaba yarakoze indirimbo ye ari na yo azaririmba mu gihe azaba ari imbere y’abagize akanama nkemurampaka.

Irushanwa biteganyijwe ko rizasozwa tariki ya 26 Ukuboza 2020. Abahatana bemerewe kwiyandikisha mu byiciro birimo injyana ya “RnB, Gospel, Hip-Hop, Gakondo na Afrobeat.”

Abazagira uruhare mu gutora abatsinze hazaba harimo akanama nkemurampaka kazaba gafite uruhare rwa 50%, gutorera kuri internet bizaba bifite 30% naho ubutumwa bwo mu ndirimbo hamwe n’uko bazitwara muri Studio byo bikazaba bifite 20%.

Niragire Marie France asanzwe ari umuhanzi umenyerewe mu ruhando rwa firimi nyarwanda, akaba anaheruka gushyira hanze indirimbo nshya yise “Impamo” yahimbye ashingiye ku nzozi yari afite none ubu akaba yarazigezeho by’umwihariko mu rukundo.

Head’s Up ni irushanwa rigamije kuzamura no gufasha impano z’abahanzi badafite ubushobozi n’ababuze uko bigaragaza

Umwanditsi:

Gisubizo Gentil M.

3 Comments on “Hitezwe irushanwa rizamura impano nshya mu muziki nyarwanda”

  1. mwaramutseneza nanjyemfite impano mukuririmba arko ubushobozi bwokuyiteza ntabwomfitepe nibamwaba mucyandika abanyempano mwanyandika kuzina rya The Futureman murakoze munyihanganire mbimenye ntinze

  2. mwaramutseneza nitwa NDIBWAMI mperereye mumajyaruguru nanjyemfite impano yokuririmba arko ubushobozi bwoyiteza imbere ntabwomfitepe nibamwaba mucyandika abafite impano mukuririmba mwanyandika kuzinarya The Futureman niryozina nshaka kubaka mumuziki murakoze munyihanganire mbimenyentinze

  3. mwaramutseneza nitwa irimaso james mperereye mumajyaruguru mukarere ka Burera nanjyemfite impano mukuririmba arko ntabushozi mfite bwokuyiteza imbere niba mwabamucyandika abanyempano munyandike kuzina rya The Futureman munyihanganire mbimenyentinze murakoze

Tanga Igitekerezo

Email yanyu ntigaragazwa ku rubuga. Amazina na Email ni ngombwa.