28°C , Sunny | Kigali-Rwanda

Herman wahoze ari Minisitiri w’Intebe w’u Bubiligi arasura Rwanda

Yanditswe na Twagira Wilson

Ku ya 01-09-2019 saa 11:38:15
Herman Van Rompuy

Herman Van Rompuy, wahoze ari Perezida w’Inama y’Umuryango w’Ubumwe bw’u Burayi (European Council), akaba yarigeze kuba Ministiri w’Intebe w’u Bubiligi hamwe n’intumwa ayoboye, barasura u Rwanda kuva uyu munsi tariki ya 1 kugeza ku ya 6 Nzeri 2019.

Araza kandi nk’intumwa (Goodwill Ambassador) y’Umuryango w’Ababiligi Uharanira Iterambere ry’Uburezi mu Rwanda, VVOB mu magambo ahinnye.

Intego y’uru ruzinduko ni ukureba uko uburezi buhagaze mu Rwanda muri rusange no kunoza umubano hagati y’Umuryango VVOB na Leta y’u Rwanda mu guteza imbere ireme ry’uburezi.

Mu bikorwa bitandukanye Van Rompuy azitabira birimo ibiganiro azatanga bizibanda ku mubano w’Umuryango w’Ubumwe bw’u Burayi hamwe n’Umuryango w’Afurika Yunze Ubumwe, no ku burezi n’Iterambere.

Ibyo biganiro bizabera muri Kaminuza y’u Rwanda, mu ishami ry’Ubumenyi n’Ikoranabuhanga.

Mu bazitabira icyo biganiro harimo Prof. Philip Cotton Umuyobozi mukuru wa Kaminuza y’u Rwanda, Dr. Charles Muligande, Umuyobozi mukuru wungirije wa Kaminuza y’u Rwanda ushinzwe iterambere ryayo, abanyeshuri ndetse n’abarimu ba Kaminuza y’u Rwanda, kikazitabirwa na ba Amabasaderi banyuranye, abahagarariye Umuryango w’Ubumwe bw’u Burayi, ndetse n’abahagarariye ibihugu byo muri uwo muryango mu Rwanda.

Amakuru Imvaho Nshya ikesha Umuyobozi w’Ishami ry’itumanaho mu rwego rw’umuryango w’Ababiligi uharanira Iterambere ry’Uburezi mu Rwanda VVOB, Ntawigira Etienne, avuga ko Vann Rompuy azasura rimwe mu mashuri akorana n’umuryango VVOB mu karere ka Rwamagana i Duha, ku wa Mbere tariki ya 2 Nzeri 2019, we n’intumwa ayoboye bahure n’abayobozi b’ibigo by’amashuri byo mu murenge wa Kigabiro mu karere ka Rwamagana baganire ku mikoranire yabo n’Umuryango VVOB.

Umuryango VVOB mu Rwanda ukorera mu mashuri abanza n’ayisumbuye mu turere 17. VVOB ihugura abayobozi b’ibigo by’amashuri ku bijyanye n’imiyoborere y’ibigo by’amashuri. Itanga kandi amahugurwa ku barimu bafasha abandi bazwi nk’abamenyerezamwuga (School Based Mentor), abashinzwe uburezi mu mirenge, ndetse n’abarimu bigisha imibare na siyansi bahagariye abandi (STEM Subject Leaders) ku bijyanye no kunoza imyigishirize no gufasha abarimu bagenzi babo (mentoring and coaching).

Kugeza ubu Abayobozi b’ibigo basaga 500 ni bo bamaze guhugurwa ku miyoborere y’ibigo by’amashuri, abarimu bafasha abandi bagera kuri 500 bamaze guhurwa ku bijyanye no gufasha bagenzi babo, mu gihe abashinzwe uburezi bo mu mirenge isaga 200 bahuguwe ku bijyanye no gukorana neza n’abayobozi b’ibigo by’amashuri mu kuzamura ireme ry’uburezi. Abarimu barenga 500 bigisha imibare na siyansi bahagariye abandi bahawe amahugurwa ku bijyanye no kunoza imyigishirize no gufasha abarimu bagenzi babo.

Biteganyijwe ko mu mwaka wa 2021, nibura ibigo by’amashuri 1300 bizaba bimaze kugerwaho na gahunda y’amahugurwa kandi ko nibura abayobozi 2,000 b’ibigo by’amashuri bazaba barabonye impamyabushobozi ku bijyanye n’imiyoborere y’ibigo by’amashuri mu 2021.

Herman Van Rompuy

TANGA IGITEKEREZO

Leave a Reply

Your email address will not be published. Required fields are marked *