HEC yatunguwe n’imitsindire y’abanyeshuri mu mashuri makuru

Yanditswe na MUGISHA BENIGNE

Ku ya 04-02-2018 saa 10:33:53
Inama y'igihugu y'amashuri makuru ikora ubugenzuzi mu rwego rwo gusuzuma ireme ry'uburezi mu mashuri makuru

Umuyobozi w’Inama y’igihugu y’amashuri makuru (HEC) Dr Muvunyi Emmanuel atangaza ko mu igenzura  ryakozwe batunguwe n’uko imitsindire y’abanyeshuri igaragaramo ikibazo.

Inama y’igihugu y’amashuri makuru ikora ubugenzuzi mu rwego rwo gusuzuma ireme ry’uburezi mu mashuri makuru

Yavuze ko mu mikoro amwe mu mashuri makuru atanga abanyeshuri batsinda ku ijanisha rya 98% mu gihe mu bizamini batsinda ku kigereranyo cya 10%, akaba asanga hashobora kuba hari ikibazo cyo  kwigisha no kubaza.

Yagize ati Ibyo rero ni byo biganisha ku kudodesha ibitabo, umunyeshuri utiga neza; udasuzumwa neza; umwarimu udakora neza akazi ke ku buryo umunyeshuri agera aho yandika igitabo nta bushobozi afite bwo gukora ubushakashatsi akajya kudodesha.”

Dr Muvunyi avuga ko umwarimu wigishije atari we wagombye  gutanga isuzuma ngo anarikosore, ahubwo ko haba hakenewe undi mwarimu umukorera isuzuma.

Aha Muvunyi anenga abarimu batanga  amasuzuma atari ku rwego rw’abanyeshuri ndetse n’integanyanyigisho zitari ku rwego rushimishije.

Yakomoje ku ngeso mbi yo kudodesha iranga bamwe mu banyeshuri, avuga ko byose biterwa n’ubumenyi budahagije baba bafite, bigatuma batabasha kwikorera  ubushakashatsi, ahubwo bagasaba ababibakorera nabo bakabyiyitirira.

Gusa amagenzura yakozwe muri za kaminuza n’amashuri makuru ntiyakunze kuvugwaho rumwe n’abantu banyuranye, kuko hari abayabonaga nko gukabya, abandi bakibaza impamvu ishuri rimaze imyaka itagira uko ingana ryigisha rikanatanga n’impanyabumenyi ariko rigafungwa igitaraganya kandi abarirangijemo atari bake.

Bamwe mu bigaga porogaramu zahagaritswe wasangaga barira ayo kwarika bavuga ko bababajwe n’uko bafungiwe badasoje amasomo yabo, ndetse bamwe byanabagizeho ingaruka zo kuva aho bigaga banatanze amafaranga y’ishuri bakajya ahandi naho bakongera bakahatanga amafaranga y’ishuri.

Gusa HEC yo ntiyahwemye kuvuga ko ari uburyo bwo kugenzura amashuri makuru kugira ngo atange uburezi bufite ireme, bityo abayasojemo babashe  gupiganira isoko ry’umurimo no kuwihangira.

Dr Muvunyi avuga ko  hari gahunda yo gusuzuma abarimu kandi na bo bagasuzumana hagati yabo ku buryo nta mwarimu uzongera gutanga ibizamini bitari ku rwego rw’abanyeshuri, akavuga ko ibi bizagenda binakemura iki kibazo cyo kwandikisha ibitabo (kudodesha) byajyaga bikorwa na bamwe mu banyeshuri.

 

 

 

Umwanditsi:

MUGISHA BENIGNE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.