18°C , Showers | Kigali-Rwanda
Kubera ubushake Leta y'u Rwanda igira ku kwita ku bafite ubumuga, ubu hatumijwe imodoka zizajya ziborohereza mu ngendo, ibintu mbere bitabagaho

Hatumijwe imodoka zitwara abagenzi zorohereza abafite ubumuga

Yanditswe na Rutayisire Emile

Ku ya 25-04-2019 saa 17:36:54

Abafite ubumuga cyane cyane ubw’ingingo bafite ibyishimo kubera ko hatumijwe imodoka zitwara abagenzi ziborohereza mu buryo bwo kubatwara mu ngendo bakora.

(Rtd) Col. Twahirwa Louis Dodo, Umuyobozi Mukuru wa Jali Holdings, Sosiyete ifite ishami ryo gutwara abantu n’ibintu (Jali Transport) avuga ko bamaze gutumiza imodoka zigera kuri 20 zizajya zorohereza abafite ubumuga kwinjira no gusohoka muri bisi bitabagoye.

Yagize ati “Biteganyijwe ko imodoka zizagera mu Rwanda mu kwezi kwa gatandatu (Kamena 2019). Ni imodoka zizajya zitwara abagenzi bose ariko by’umwihariko zikaba zifite uburyo bwiza butuma ufite ubumuga n’iyo yaba agendera hasi cyangwa ari mu kagare abasha kwiyinjiza no gusohoka mu modoka bitamugoye kandi bidasabye ko hagira umufasha.”

Abanyarwanda bafite ubumuga bukomeye cyane cyane nk’ubw’amaguru ndetse n’abagendera mu tugare bishimiye iyo gahunda yo gutumiza imodoka zizajya ziborohereza kugenda.

Umunyamabanga Nshingwabikorwa w’Inama y’Igihugu y’abafite ubumuga, Ndayisaba Emmanuel, mu kiganiro kihariye yagiranye n’Imvaho Nshya, yavuze ko ikibazo kijyanye no gutwara abafite ubumuga mu modoka zitwara abagenzi cyari gihangayikishije abamugaye ariko ko mu minsi mike kiba cyakemutse.

Ibiganiro byahuje Inama y’Igihugu y’abafite ubumuga, Minisiteri ifite gutwara abantu n’ibintu mu nshingano, MININFRA, n’Urwego rw’Igihugu rushinzwe kugenzura imirimo imwe n’imwe ifitiye Igihugu akamaro, RURA, ni byo byavuyemo gahunda yo gutumiza imodoka zitwara abagenzi zifite imyanya y’aho abafite ubumuga bazajya bicara.

Ndayisaba avuga ko muri Politiki nshya y’Igihugu yo gutwara abantu n’ibintu bashyizemo gahunda y’uburyo bwiza bwo gufasha abafite ubumuga gukora ingendo mu bwisanzure kandi mu buryo bworoshye.

Akagira ati “Gahunda yo gufasha abafite ubumuga kujya bakora ingendo mu modoka zitwara abagenzi mu gihugu yamaze gushyirwa muri Politiki y’Igihugu. Iyo bigeze aho bigasobanuka ni bwo noneho duhita dushaka uko bishyirwa mu bikorwa. Ni yo mpamvu hari imodoka zabugenewe zamaze gutumizwa kandi n’izindi zizakomeza zitumizwe ku buryo abafite ubumuga cyane ubw’ingingo ndetse n’ugenda mu kagare azajya yiyinjiza muri bisi”.

Semanza Alexis afite ubumuga bw’amaguru, avuga ko akora ingendo nke kubera ikibazo afite cy’ubumuga ariko iyo agize aho ajya n’ubwo hari abantu bamwimukira mu mwanya, hari igihe abura aho ashyira amaguru. Akagira ati “Ninjira mu modoka mfashijwe n’abagenzi, ndabibona ko hari abinuba, cyane ko hari ababa bashaka kwihuta. Iyo ngeze mu modoka hari abanyimukira ariko nkabura aho nshyira amaguru kuko ntabasha kuyahina.”

Akomeza ashimira Leta y’u Rwanda izirikana ubuzima bw’abafite ubumuga kandi igashaka ko na bo bagira uruhare mu buzima bw’igihugu, akaba asanga abafite ubumuga cyane cyane ingingo bafite amahirwe yo kuba mu gihugu gifite ubuyobozi bwiza bubitaho bakaba bagiye kujya bakora ingendo mu buryo bwiza nk’abandi.

Kubera ubushake Leta y’u Rwanda igira ku kwita ku bafite ubumuga, ubu hatumijwe imodoka zizajya ziborohereza mu ngendo, ibintu mbere bitabagaho

TANGA IGITEKEREZO

2 Comments on “Hatumijwe imodoka zitwara abagenzi zorohereza abafite ubumuga”

Leave a Reply

Your email address will not be published. Required fields are marked *