27°C , Mostly cloudy | Kigali-Rwanda
Abashushanya, abadoda n'abandi banyabugeni bazitabira igitaramo cyateguwe na Ingeri Arts (Foto Muhire E.)

Hateguwe iserukiramuco rizahuza abanyabugeni

Yanditswe na KAYITARE JEAN PAUL

Ku ya 17-06-2018 saa 09:39:15

Ingeri Arts isanzwe ihuriza hamwe abanyabugeni bo mu cyaro cyangwa badafite aho bagaragariza impano zabo, yateguye igitaramo k’iserukiramuco kizahuza abanyabugeni, abadozi, abaririmbyi, abashushanya, ababyina imbyino gakondo, ikinamico hakabamo no kwerekana filimi zahanzwe n’urubyiruko.

Abashushanya, abadoda n’abandi banyabugeni bazitabira igitaramo cyateguwe na Ingeri Arts (Foto Muhire E.)

Muhire Emmanuel ushinzwe gahunda mu Ngeri Arts yateguye iri serukiramuco asobanura ko iki gitaramo kigamije kugaragaza ibimaze kugerwaho mu rwego rw’ubuhanzi.

Ati: “Iki gitaramo, icyo kizaba kigamije, ni ukwerekana icyo abahanzi bo mu cyaro bamaze kugeraho uyu munsi. Igitaramo kizabera i Musanze tariki 11 Kanama 2018 guhera saa saba n’igice kugeza saa kumi n’imwe n’igice, kikazabera mu kigo k’imyidagaduro cya Muhoza.”

Abahanzi bazataramira abazitabira igitaramo baragera ku icumi harimo n’itorero ryitwa ‘Amasaro yaka’ ry’Akarere ka Musanze n’itsinda rikora ikinamico ryitwa Galax.

Akarere ka Musanze ni ko karimo gufasha Ingeri Arts mu bikorwa byagiye bikorwa mbere nko kugera ku bana aho batuye mu tugari no mu mirenge itandukanye.

Muhire avuga ko iki gitaramo kizaba kibaye ku nshuro ya kabiri, kuri iyi nshuro bakaba barimo kumenyekanisha kugira ngo kizitabirwe n’abantu benshi baruta abakiriwe mbere.

Ikigo cyo muri Uganda gitunganya filimi zikorwa n’urubyiruko kikanigisha abana gukora filimi, na bo bazerekana ibyo bakora ikindi kandi kizitabirwa n’abazaturuka i Bukavu muri Repubulika Iharanira Demokarasi ya Kongo.

TANGA IGITEKEREZO

Leave a Reply

Be the First to Comment!

avatar