18°C , Mostly cloudy | Kigali-Rwanda

Hatanzwe ubujyanama ku mvura nyinshi iteganyijwe kugwa

Yanditswe na TUMUKUNDE GEORGINE

Ku ya 14-01-2021 saa 07:50:08

Ikigo cy’Igihugu gishinzwe Ubumenyi bw’Ikirere (Meteo Rwanda) cyatanze ubujyanama bwafasha abantu kwirinda ingaruka zituruka ku biza mu minsi iri imbere iteganyijwemo imvura.

Bitewe n’uko imvura imaze iminsi iboneka mu bice byinshi by’Igihugu kandi mu minsi ikurikiranye, ikaba inateganyijwe mu minsi iri imbere kugeza ku wa 16 Mutarama 2021, Meteo irasaba Abaturarwanda kwitwararika bagakurikiza amabwiriza bahabwa n’inzego zishinzwe gukumira ibiza.

Mu itangazo yasohoye, Meteo Rwanda ishingiye ku iteganyagihe ry’iminsi 10 ryatanzwe ku wa 10 Mutarama 2021, rigaragaza ko mu Rwanda hateganyijwe imvura iri hejuru y’ikigereranyo cy’isanzwe igwa mu minsi 10 y’ukwezi; hagati y’itariki ya 11-20 Mutarama 2021, hagati y’itariki ya 13 na 15 akaba ari ho hari hateganyijwe imvura nyinshi cyane cyane mu bice by’amajyepfo y’iburengerazuba, yavuze ko iyo mvura izakomeza kugeza ku wa 16 Mutarama hirya no hino mu gihugu by’umwihariko mu Ntara y’Iburengerazuba no mu majyepfo y’iburengerazuba bw’Intara y’Amajyepfo.

Imvura iteganyijwe iri hagati ya milimetero 20 na 50 ku munsi, ikaba ituruka ku isangano ry’imiyaga rituruka mu Nyanja y’Abahinde ryongereye ubuhehere bw’umwuka mu kirere cy’u Rwanda.

Minisiteri Ishinzwe ibikorwa by’Ubutabazi ( MINEMA) na yo ikaba isaba abantu guha agaciro amakuru aba yatanzwe y’iteganyagihe.

Habinshuti Philippe Umuyobozi ushinzwe ibijyanye no gutabara abahuye n’ibiza muri MINEMA, avuga ko iyo amakuru nk’ayo atanzwe n’urwego rubifitiye ububasha atagomba kwirengagizwa, abantu bakwiye kumenya ko iriya mvura ishobora kugwa igatera ikibazo.

Ati: “ Twabwira abantu rero ko ari igihe cyo kuvuga ngo reka twigenzure, twitonde, reka tugire ibyo dukora kugira ngo imvura igiye kugwa itaza kudusiga mu bibazo wenda bisanga n’ibindi turimo gushaka gukemura”.

Habinshuti Philippe Umuyobozi ushinzwe ibikorwa by’ubutabazi

Arakangurira n’ Inzego z’ibanze kwegera abaturage no kubashishikariza kongera imbaraga mu gushyira mu bikorwa ubutumwa barimo guhabwa bakamenya ko mu mirimo yabo ya buri munsi bagomba gushyiramo ubwirinzi no gukumira ibiza. Bakareba niba ibyo barimo gukora bitatuma imvura ibona urwaho rwo kuba yatwara ubuzima bw’abantu cyangwa se ikangiza imitungo n’ibindi bikorwa remezo byubatswe.

Ufite inzu itaziritse igisenge neza akakizirika akagikomeza, utuye munsi y’umukingo cyangwa se mu manegeka, akaba agomba kwihutira gufata ingamba hakiri kare akirinda ingaruka zituruka ku biza.

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.