19°C , Showers | Kigali-Rwanda
Perezida wa RAF, Mubiligi Fidele (Hagati) ashyikirizwa inkunga na BK

Hatangijwe ku mugaragaro imyiteguro ya Marato ya 2019 yitiriwe Amahoro

Yanditswe na BUGINGO FIDELE

Ku ya 17-05-2019 saa 07:38:47

Nk’uko bimaze kumenyerwa buri mwaka ishyirahamwe ry’imikino ngororamubiri mu Rwanda “RAF” bafatanyije na Minisiteri y’Umuco na Siporo “MINISPOC” ndetse n’abaterankunga batandukanye bategura isiganwa mpuzamahanga   ku maguru ryitiriwe amahoro “Kigali International Peace Marathon”.

Muri uyu mwaka iri rushanwa biteganyijwe ko rizaba tariki 16 Kamena 2019, gusa    gahunda yo kwitegura  iri siganwa ikaba yaratangiye tariki 15 Gicurasi 2019 aho yatangirijwe   imbere ya Kigali Convention Centre.

Mu gutangiza imyiteguro y’iri siganwa, Perezida wa RAF, Mubiligi Fidele yibukije ko rigiye kuba ku nshuro 15 akaba ndetse ari irushanwa ryatangijwe na Perezida w’u Rwanda Paul Kagame rigamije gutanga ubutumwa bwo kwimakaza amahoro.

Umunyamabanga uhoraho muri MINISPOC, Ntigengwa John ni we watangije ku mugaragaro iki gikorwa  aho yavuze ko mu myaka iri siganwa rimaze riba rigenda rikomera kandi ryitabirwa yaba Abanyamahanga ndetse n’Abanyarwanda.

Biteganyijwe ko Marato ya 2019 izitabirwa n’abantu bagera ku bihumbi 10 baturutse mu bihugu bitandukanye. Umwaka ushize wa 2018  hitabiriye  abantu 7,950 bari baturutse mu bihugu 34.

IRUSHANWA RIZATWARA ASAGA MIRIYONI 300

Biteganyijwe ko iri siganwa rizatwara asaga miriyoni 300 z’amafaranga y’u Rwanda azava muri MINISPOC,  abaterankunga ari bo MTN yatanze miriyoni 95 n’ibuhumbi 175, BK yatanze miriyoni 45 ndetse n’ayo abantu bazakoresha biyandikisha.

Perezida wa RAF, Mubiligi Fidele (Hagati) ashyikirizwa inkunga na BK

Nyuma yo gutangiza ku mugaragaro  gahunda yo kwitegura Marato  mpuzamahanga yitiriwe amahoro “Kigali International Peace Marathon 2019” igikorwa cya mbere cyabaye ni  isiganwa rya nijoro ry’abatarabigize umwuga “Kigali Night Run” ryitabiriwe n’ababyifuzaga bose bari barimo n’abitabiriye inama mpuzamahanga ya  “Transform Africa”  aho bakoze intera ya kirometero  5,4.  Iri siganwa kandi ryanitabiriwe n’abayobozi batandukanye barimo Ministiri w’Umuco na Siporo, Nyirasafari Esperance.

HARI ABATUMIWE BY’UMWIHARIKO

Muri uyu mwaka  hatumiwe kandi abantu batandukanye  bazwi muri uyu mukino  nka Usain Bolt (Jamaica), Mohamed  Farah (UK), Nawal El Moutawakel (Morocco), Tirunesh Dibaba(Ethiopia), Tegla Chepkitel Loroupe (Kenya) aho bakwiruka mu kiciro cy’abishimisha (10 km).

Hari kandi n’abayobozi barimo  Sebastian Coe  (UK ), Perezida w’ishyirahamwe ry’uyu mukino ku Isi (IAAF) ndetse na Hamad Kalkaba Malboum (Cameroun) akaba ari Perezida w’impuzamashyirahamwe  y’imikino ngororamubiri muri Afurika (CAA).

UKO ISIGANWA RIZAGENDA

Hazakinwa Marato (42,195 km), igice cya Marato (21,098 km) ndetse n’abasiganwa byo kwishimisha “Run for Fun” (10 km ).

Abari bitabiriye Kigali Night Run, kimwe mu bikorwa byatangije gahunda yo kwitegura Kigali International Peace Marathon 2019

TANGA IGITEKEREZO

Leave a Reply

Your email address will not be published. Required fields are marked *