22°C , Partly cloudy | Kigali-Rwanda
Ubwo ikipe ya Rayon Sports yegukanaga igikombe k'Intwari muri Gashyantare 2018

Hatangajwe gahunda y’irushanwa ry’intwari 2019

Yanditswe na Bugingo Fidèle

Ku ya 11-01-2019 saa 11:22:56

Tariki 01 Gashyantare buri mwaka ni umunsi wahariwe kuzirikana intwari z’u Rwanda.

Muri uyu mwaka wa 2019, Urwego rwushinzwe Intwari z’Igihugu, Imidari n’Impeta z’Ishimwe “CHENO” rufatanyije n’ishyirahamwe ry’umupira w’amaguru mu Rwanda “FERWAFA” bateguye irushanwa rizatangira tariki 26 Mutarama risozwa tariki 01 Gashyantare 2019.

Iri rushanwa “Heroes Cup Tournament 2019” rizabera kuri Sitade Amahoro i Remera rizahuza amakipe 4 ya mbere mu mwaka w’imikino wa 2017-2018 ari yo APR FC, AS Kigali, Rayon Sports na Etincelles FC.

Amakipe yose azahura hagati yayo aho ikipe izagira amanota menshi cyangwa se izigamye ibitego byinshi mu gihe habayeho kunganya amanota abe ari yo yegukana igikombe.

Uko imikino iteganyijwe

Tariki 26 Mutarama 2019, APR FC izakina na AS Kigali (15h30) naho Rayon Sports ikine na Etincelles FC (18h00). Tariki 29 Mutarama 2019, Etincelles FC izakina na APR FC (15h30) naho Rayon Sports FC ikine na AS Kigali (18h30). Tariki 01 Gashyantare 2019, AS Kigali izakina na Etincelles FC (15h30) naho Rayon Sports ikine na APR FC (18h00).

Muri iri rushanwa hazanakinwa amakipe yo mu kiciro cy’abagore aho AS Kigali yegukanye shampiyona izakina na Scandinavia yabaye iya kabiri (15h30). Hazanaba kandi umukino w’amakipe abiri ya gisirikare (18h00). Imikino ikaba izaba tariki 31 Mutarama 2019.

Ikipe izegukana igikombe mu bagabo izahabwa miliyoni 4 iya kabiri ibone miriyoni 2, iya gatatu ihabwe miriyoni imwe n’igice (1,5) naho iya 3 ihabwe miriyoni 1. Mu bagore, ikipe ya mbere izahabwa ibihumbi 750 naho iya kabiri ihabwe 500. Ikipe z’abasirikare, iya mbere izahabwa miriyoni iya kabiri ihabwe ibihumbi 500.

Ikipe ya Rayon Sports ni yo yegukanye igikombe nyuma yo gusoza ifite amanota 4 inganya na APRFC na Police FC ariko ikaba yari izigamye ibitego byinshi.

Ubwo ikipe ya Rayon Sports yegukanaga igikombe k’Intwari muri Gashyantare 2018

TANGA IGITEKEREZO

Leave a Reply

Your email address will not be published. Required fields are marked *