22°C , Mostly sunny | Kigali-Rwanda
Umunyamabanga Mukuru muri Komisiyo y'igihugu ikorana na UNESCO Mutesa Albert

Hasobanuwe impamvu yatumye amwe mu mashuri akurirwaho ‘kudefanda’

Yanditswe na Sezibera Anselme

Ku ya 12-07-2019 saa 15:14:05

Umunyamabanga Mukuru wa Komisiyo y’Igihugu ikorana na UNESCO Mutesa Albert, avuga ko amikoro make mu banyeshuri ba kaminuza ari mu byahereweho kugira ngo gahunda yo kudefanda (cyangwa gusobanura) ibitabo bakoze ikurweho.

Mutesa avuga ko byagiye bigaragara muri za kaminuza zo mu Rwanda ku bijyanye no kuyobora ubushakashatsi bukorwa n’abanyeshuri ko hari igihe biba bitoroshye kandi umubare wabo ukomeza kuba mwinshi.

Agira ati: “Hari abanyeshuri bariha amafaranga yo gukora ubwo bushakashatsi, bakariha abarimu baba bagomba kububayoboramo bityo bikagaragara ko kaminuza zimwe byagiye bizigora bigatuma zifata ibyemezo byo kugabanya ubwo bushakashatsi bwo kwandika ibitabo”.

Ibyo Mutesa arabigarukaho mu gihe hari ababyeyi bamwe bifuza ko abanyeshuri ba kaminuza basubirizwaho gahunda yo kudefanda ibitabo byabo baba baranditse nyuma y’ubushakashatsi bakoze bakabisoma kuko bituma ireme ry’uburezi rizamuka.

Mutesa avuga ko mu gihe bikomeje kubera zimwe muri izo kaminuza inzitizi hari izindi ngamba ziba zafashwe zigamije gusimbura ibyifuzo by’abo babyeyi cyangwa zikoroshya icyo kibazo.

Ati: “Hari aho usanga abanyeshuri bafatanya gukora ibitabo (Memoire), kuko ikibazo cyari uko umunyeshuri yasozaga kwandika igitabo ke bikamusaba kujya kukimurikira imbere y’abantu batandukanye barimo abakemurampaka ugasanga kubikora ku mubare w’abanyeshuri bose bitoroshye.

Ibyo bisaba gufata ingamba zo koroshya ikintu, ikifuzo cy’ababyeyi n’abandi batandukanye ni cyo kuko byatumaga abana bataba abanebwe, bakamenya gukora ubushakashatsi bikaba byiza, ariko iteka iyo ushaka ubwinshi bw’umusaruro, ukanashaka n’ireme ry’uburezi ugomba kugereranya byombi”.

Mutesa avuga ko usibye no muri kaminuza ikibazo nk’icyo kinagaragara mu mashuri yisumbuye n’amashuri abanza nyuma yaho kuva mu 2000-2015 Leta yakanguriye ababyeyi kugarura abana mu mashuri nabo baritabira kugira ngo gahunda y’uburezi bwa bose yubahirizwe.

Avuga ko ku ruhande rumwe byabaye byiza kuko umubare mwinshi wabashije kugaruka mu mashuri, ariko binateza ikibazo cy’ubucucike kubera ko bitahise bihurirana no gutegura ibyumba by’amashuri bihagije icyo gihe.

Ati: “Icyo twishimira ni uko abana bose bari mu mashuri, icyo turi kurwana nacyo ubu ni ukugira ngo tugere ku ireme ry’uburezi kandi birakorwa kuko Guverinoma igenda ishaka inkunga hirya no hino ndetse na Banki y’Isi ikaba idutera inkunga mu kubaka amashuri kugira ngo ubucucike bugabanuke”.

Mutesa agira inama amashuri ya kaminuza ko mu gihe bigaragara ko abarimu bayobora ubushakashatsi bukorwa n’abanyeshuri babakoresha ubumenyingiro bwinshi (pratique).

Kankera Viviane, umwe mu babyeyi waganiriye n’Imvaho Nshya, avuga ko kuba kaminuza zagiraga gahunda y’uko abanyeshuri bazo bamurika ibitabo banditse bakanabisoma ari bimwe mu by’ingenzi byatumaga bagira umuhate wo kubyiyandikira batabyandikishije ku bantu bo hanze bityo bikazamura ireme ry’uburezi.

Nkusi Jacques na we ni umwe mu babyeyi uvuga ko kwandika ibitabo ukanabisobanura ku banyeshuri bituma batirara kandi aho gukurwaho kubera ubushobozi akumva hajya hakoreshwa ubuhari buke byanarimba umuntu akajya agisomera imbere y’abakemurampaka n’abamwishyuriye amashuri gusa ariko bigakorwa.

Umunyamabanga Mukuru muri Komisiyo y’igihugu ikorana na UNESCO Mutesa Albert

 

TANGA IGITEKEREZO

Leave a Reply

Your email address will not be published. Required fields are marked *