17°C , Mostly cloudy | Kigali-Rwanda
Perezida wa Rayon Sports, Muvunyi Paul (hagati), Munyakazi ukuriye MK Sky Vision (iburyo) n'umuyobozi wa MOGAS mu Rwanda, Rwamuhinda Dick (ibumoso) nyuma yo gushyira umukono ku masezerano

Hashyizweho uburyo Rayon Sports izungukira  ku bakunzi bayo bakoresha ibinyabiziga

Yanditswe na BUGINGO FIDELE

Ku ya 10-06-2019 saa 19:44:35

Ikipe ya Rayon Sports yamaze gusinya amasezerano y’ubufatanye na MK Sky Vision na Sosiyete icuruza ibikomoka kuri peterori  “MOGAS”  aho  abakunzi b’iyi kipe ku mafaranga bazajya bakoresha  bagura lisansi na mazutu  muri MOGAS  hari azajya ahabwa iyi kipe.

Tariki 08 Kamena 2019 ni bwo aya masezerano yashyizweho umukono hagati ya Perezida wa Rayon Sports, Muvunyi Paul, Munyakazi Sadati ukuriye MK Sky Vision na Rwamuhinda Dick, umuyobozi wa MOGAS mu Rwanda.

Perezida wa Rayon Sports, Muvunyi Paul (hagati), Munyakazi ukuriye MK Sky Vision (iburyo) n’umuyobozi wa MOGAS mu Rwanda, Rwamuhinda Dick (ibumoso) nyuma yo gushyira umukono ku masezerano

Uko bizakorwa

Umuyobozi wa MK Sky Vision, Munyakazi Sadati yaragaje ko ibi ari ibintu bari bamaze iminsi bategura.  Yakomeje avuga ko batangiranye na MOGAS ku bijyanye n’ibikomoka kuri peterori ariko ko bazakomeza n’ibindi nk’abafite amahahiro manini, iganda n’utubari.

Munyakazi avuga ko MK Sky Vision yakoze ikarita  “MK Card” umukiriya azajya yifashisha mu gihe agiye kunywesha amavuta kuri MOGAS hanyuma  kuri ritiro imwe  haveho amafaranga 65 age  mu ikipe ya Rayon Sports.

Uyu muyobozi yavuze ko bari batangiriye ku igeragezwa ry’abantu ibihumbi 10 ariko ubu bafite ibihumbi 12 bamaze kwiyandikisha n’amakarita yabo yakozwe.

Yagize ati:Dufashe nk’urugero, aba biyandikishije habayeho kwitabira serivise za MOGAS, ku munsi  hakwinjira miriyoni 4, mu kwezi zikaba 120  tukajya no mu batwara za moto bikaba gutyo. Si aha kandi kuko no mu mahahiro manini, utubari n’ahandi tuzahagera.”

Munyakazi avuga ko iyi karita itangirwa ubuntu kandi ko vuba aha bagiye gushyiraho ababahagarariye mu bice bitandukanye by’igihugu  bazajya bandika abakunzi b’iyi kipe bayifuza nyuma bohereze imyirondoro ubundi ikarita bazibakorere kuko bifitiye imashini izikora. Ati: “ Biraduhenda ariko  icyo twifuza ni uko igera ku bantu benshi.”

Umuyobozi wa MOGAS mu Rwanda, Rwamuhinda Dick yatangaje ko ibi ari ubwa mbere bagiye kubikora mu Rwanda ariko ko ahandi iyi sosiyete ikorera bikorwa. Akomeza avuga ko mbere yo kwemera ndetse no gusinya amasezerano babonye ko bazunguka kuko bazi neza ko Rayon Sports ari ikipe ifite abakunzi benshi na bo bizeye ko bazitabira serivise zabo ku bwinshi.

Ati: Ubundi igiciro k’ibikomoka kuri peterori kigenwa na RURA, cyazamuka cyangwa cyamanuka ntacyo bizahindura ku masezerano. Icyo twe twifuza ni ukubona abakiriya benshi kuko ariya  tuzatanga ari mu yo tuzunguka.”

Perezida w’ikipe ya Rayon Sports, Muvunyi Paul yavuze ko muri  iyi mikoranire hazavamo inyungu nyinshi yaba kuri Rayon Sports, MK Sky Vision ndetse na MOGAS.

Ati: “N’ubusanzwe abakunzi bacu baguraga ibikomoka kuri peterori nta bwo igiciro kiziyongera  bazakomeza bagure nk’uko baguraga ariko noneho kuri ya yandi batanze havemo make ajya mu ikipe yacu. Ubu icyo tugiye gukora ni ugushishikariza abakunzi b’ikipe kugana MOGAS.”

Intego nyamukuru ni ukubaka Sitade

Uyu mushinga wateguwe mu rwego rwo gufasha ikipe ya Rayon Sports kwiyubaka cyane  ibijyanye no gushaka Sitade yayo “Gikundiro Stadium” bifuza ko yaba iri kurwego rwo kwakira nk’abantu ibihumbi 64.

Munyakazi Sadati avuga ko bigenze neza mu myaka 7 byashoboka ko iyi Sitade yakubakwa.

Perezida wa Rayon Sports, Muvunyi avuga ko muri aya mafaranga bazajya babona  hazajya havaho agera hafi  kuri 30% agomba guhabwa MK  Sky Vision hanyuma bafate nka 30%  bayabike. Ati:Aya azabikwa rero  tuyizigamiye ni yo yagira icyo atugezaho mu gihe kiri imbere kuko n’ubundi  abakinnyi, abatoza bari basanzwe bahembwa.”

Gusa Muvunyi avuga ko ikihutirwa mbere ya Sitade ari ugushaka aho abakinnyi bajya bakorera umwiherero kuko bitwara hafi miriyoni 6 buri kwezi ariko anishimira ko bakemuye ikibazo k’imodoka aho batangaga miriyoni 4 ariko ubu bakaba  bataga  imwe n’ibihumbi 200.

Perezida wa Rayon Sports, Muvunyi (hagati) arimo gusinya amasezerano

Umuyobozi wa MOGAS mu Rwanda, Rwamuhinda Dick ashyira umukono ku masezerano

Abayobozi berekwa uko ikarita “MK Card” izajya ikorwa

Imashini ikora izi karita

Perezida wa Rayon Sports, Muvuyi yahise ashyikirizwa iye

Nyuma yo gusinya amasezerano abari bitabitabiriye bose ku ruhande rwa Rayon Sports, MK Sky Vision na MOGAS

TANGA IGITEKEREZO

Leave a Reply

Your email address will not be published. Required fields are marked *