17°C , Partly sunny | Kigali-Rwanda
Ikiyaga cya Kivu kizacukurwamo gazi izakoreshwa mu ruganda rwa CIMERWA

Harigwa uko gazi yo mu Kivu yakoreshwa na CIMERWA

Yanditswe na KAYITARE JEAN PAUL

Ku ya 10-06-2018 saa 06:48:53

Urwego rw’igihugu rushinzwe ubucukuzi bw’amabuye y’agaciro, Peteroli na Gazi (RMB), ruratangaza ko hari ikizere cyuko gazi yo mu Kivu izakoreshwa n’uruganda rwa CIMERWA rukora sima, hakaniyongeraho nuko hazakoreshwa na nyiramugengeri nubwo yo imaze igihe ikoreshwa.

Ikiyaga cya Kivu kizacukurwamo gazi izakoreshwa mu ruganda rwa CIMERWA

Ubuyobozi bw’uruganda rwa sima na bwo bushimangira ko gukoresha gazi yo mu Kivu bishoboka. Urwego rwa RMB ruvuga ko icyari gisigaye ari ugushaka uburyo bwo gutunganya inzira gazi igomba kunyuzwamo.

Gatare Francis, Umuyobozi Mukuru wa RMB, asobanura ko umushinga wo gucukura gazi yo mu Kivu ukirimo kwigwaho kugira ngo izafashe uruganda rwa CIMERWA. Ati “Uwo mushinga wa gazi urakigwaho ndetse n’uburyo gazi yakurwa mu Kivu ikagezwa ku nganda nini nka CIMERWA kugira ngo ishobore kuba yabafasha ndetse na bo barimo kwiga uburyo bushya bwo gukoresha nyiramugengeri, icyakoze izo ngamba zombi zirahari”.

Akomeza avuga ko nta gihe giteganyijwe umushinga wo mu Kivu uzaba warangiriye, ahubwo ko ukiri mu nyigo mu gihe waba urangiye akaba ari bwo hamenyekana igihe gazi izatangira gukoreshwa.

Ati “Nta gihe giteganyijwe umushinga wo mu Kivu uzaba warangiriye, gusa mu bigaragara ni uko ikoranabuhanga rihari ndetse no kubikora bishoboka. Ikiba gisigaye ni ukumenya niba mu buryo bw’ubucuruzi byakunguka”.

Umuyobozi ushinzwe icungamutungo muri CIMERWA, Bugunya John, ashimangira ko gukoresha gazi yo mu Kivu bizashoboka kandi ko ngo n’abashoramari babonetse.

Ati “Turabona gukoresha gazi bishoboka kuko inyigo zaratangiye ndetse n’abashoramari bazashyira amafaranga muri uwo mushinga wo kuba bategura gazi bayikura mu Kivu na bo barabonetse kuko bari no muri gahunda yo kubona ibisabwa kugira ngo babigeze ku nzego zitandukanye babe babona uburenganzira bwo gutangira gukora ibyo bikorwa”.

Bugunya avuga ko nyiramugengeri imaze igihe ikoreshwa mu ruganda rwa CIMERWA ariko na yo ngo nta bwo yari ihagije ku isoko kuko hari ikoreshwa na CIMERWA hakaba na nyiramugengeri iba ikenewe n’uruganda rwa Gishoma bityo ugasanga izo nganda ntizihazwa n’izo nyiramugengeri.

Akomeza avuga ko hari ikizere cyuko nyiramugengeri mu kwezi kwa Nyakanga na Kanama izaba yatangiye kuboneka. Ati “Ikidushimishije kandi kiduha ikizere ni uko mu minsi ishize abashoramari batandukanye bamaze kugaragaza ubushake ndetse batangiye n’imirimo yo gutegura nyiramugengeri bakaba baraduhaye ikizere ko mu kwezi kwa Nyakanga cyangwa mu kwa Kanama hazaba hatangiye kuboneka nyiramugengeri ihagije ku buryo CIMERWA izabona nyiramugengeri ihagije bikazatuma tugabanya ya makara twatumizaga hanze”.

Mu gihe gazi yo mu Kivu yaba itangiye gukoreshwa n’uruganda rwa CIMERWA ndetse hakiyongeraho kuba rwaba runakoresha nyiramugengeri, ibi byatuma igiciro cy’umufuka wa sima kigabanuka.

TANGA IGITEKEREZO

Leave a Reply

Your email address will not be published. Required fields are marked *