18°C , Mostly cloudy | Kigali-Rwanda
Laurent Gbagbo

Haribazwa niba CPI izarekura Laurent Gbagbo

Yanditswe na KAYIRA ETIENNE

Ku ya 06-10-2018 saa 15:36:06

Guhera mu Gushyingo 2011, Laurent Gbagbo wabaye Perezida wa Côte d’Ivoire ari mu Buholandi aho yashyikirijwe Urukiko Mpuzamahanga mpanabyaha (CPI).

Akurikiranweho ibyaha by’ubwicanyi bwibasiye inyoko muntu aregwa gukorera mu gihugu ke mu mvururu zakurikiye amatora y’Umukuru w’igihugu hagati y’imyaka ya 2011 na 2012.

Ubu hakaba hibazwa niba uru rukiko ruzamurekura nyuma yo kuvugwa ko nta bimenyetso bimushinja.

Laurent Gbagbo w’imyaka 73 y’amavuko.

Ku wa Mbere w’iki cyumweru, urukiko rwongeye gusubukura kuburanisha Gbagbo na Charles Blé Goudé wari Minisitiri w’Urubyiruko.

Abakunzi b’aba banyapolitiki bombi ndetse n’abanzi babo b’Abanyakotedivuwari bakomeje kwibaza niba abacamanza ba CPI bagiye kubarekura, dore ko bimaze iminsi bivugwa ko nta bimenyetso bifatika bibahamya ibyaha by’ubwicanyi bashinjwa.

Umunyamakuru wa Jeune Afrique (J.A) André Silver Konan wakurikiranye iby’urwo rubanza Laurent Gbagbo na Charles Blé Goudé bongeye guhamagazwamo ku itariki 1 Ukwakira 2018 nyuma y’amezi make rusubitswe, atangaza ko abakozi bo mu biro y’umushinjacyaha mukuru wa CPI (Cour Pénale Internationale) basabye abacamanza ko urubanza rw’abo baregwa bombi rwakomeza kugeza ku iherezo ryarwo.

Konan ati «Nyamara ababuranira Gbagbo n’uwayoboraga Minisitiri y’Urubyiruko Goudé, bo basabye ko abakiriya babo barekurwa kuko abagize biro ya Fatou Bensouda, umushinjacyaha mukuru wa CPI, batashoboye kugaragaza ibimenyetso bibahamya ibyaha byose baregwa.»

Ngo ni muri urwo rwego Emmanuel Altit na Claver N’Dri, abunganizi mu mategeko ba Gbagbo na Blé Goudé, basabye urukiko kubarekura burundu ntibongere kugira icyaha babarwaho.

Jeune Afrique yibukije ko Laurent Gbagbo na Charles Blé Goudé bashinjwa ibyaha 4 bikomeye byibasiye inyoko muntu ari byo: ubwicanyi, ihohotera, itoteza n’ibindi byaha by’ubunyamaswa.

Muri urwo rubanza rwo ku wa Mbere w’iki cyumweru, abaregwa bombi ngo bongeye guhakana bivuye inyuma ko nta cyaha na kimwe bemera mu byo bashinjwa.

André Silver Kanon atangaza ko mu rubanza rwo ku wa Mbere tariki 1 Ukwakira, abavoka ba Gbagbo na Goudé basabye urukiko kurekura abo baburanira bashingiye ku ngingo zitandukanye z’amategeko zerekana ko nta mpamvu n’imwe yagombye gutuma rutarekura abaregwa nta bimenyetso bibahamya ibyaha ubushinjacyaha bwagaragaje.

J.A iti «Nubwo ariko biri, abahanga benshi mu mategeko basanga abacamanza batinya kurekura Gbagbo na Blé iyo bareba ubuhamya bw’abantu 82 babashinjaga na dosiye ibihumbi bamaze imyaka 2 yose bafite ku meza yabo zo gusuzuma, kabone n’ubwo nta gifatika kirimo».

Kutava ku izima kw’abagize Urukiko CPI ngo byagaragariye ku mpaka zamaze amasaha ane yose kabone n’ubwo abacamanza ubwabo biyemereye ko nta bunararibonye bafite mu kuburanisha ibyaha Ggagbo na Goudé bashinjwa. Umunyamakuru wa Jeune Afrique yemeza ko abavoka ba Guverinoma ya Cote d’Ivoire muri urwo rubanza ngo bavuze ko nta mpamvu yo kurekura abaregwa kandi ibyaha bakoze bigarararira buri wese.

J.A iti «Ubwicanyi Laurent Gbagbo na Charles Blé Goudé baregwa, ni ubwahitanye abaturage mu gitero cyagabwe mu isoko ryo muri karitsiye ya Abobo, ifasi bivugwa ko yari yiganjemo abaturage bari bashyigikiye Alassane Ouattara mu matora yo 2011. Ubundi bwicanyi bwagarutsweho ni ku itariki 3 Werurwe 2011 bw’ahitwa Yopougon, komine abatangabuhamya bemeza ko yari bugufi bwo kwa Gbagbo.»

Ibyo kurekura Gbagbo na Goudé byo ni ibanga ry’ubutabera bwa CPI nk’uko abasesenguzi b’abanyamategeko babitangarije Jeune Afrique. Ku wa Gatatu tariki 3 Ukwakira, Urukiko rwasubitse urubanza ngo abacamanza basuzume niba kurekura Gbagbo na Goudé bifite ishingiro nk’uko byasabwe n’abababuranira. Ngo ruzongera gusubukurwa kuri 12 Ugushyingo 2018.

Urukiko Mpuzamahanga mpanabyaha rw’i La Haye mu Buholandi CPI, rwongeye gusubukura urubanza Gbagbo na Goudé baregwamo ibyaha byibasiye inyoko muntu, mu gihe muri Côte d’Ivoire havugwa gutandukana hagati y’amashyaka.

RDR (Rassemblement des Républicains), Umutwe wa politiki uri ku butegetsi na PDCI (Parti démocratique de Côte d’Ivoire) ya Heanri Konan Bédié baratandukanye.

Aya mashyaka yombi kera yaruzuzanyaga mu matora, ariko muri iki gihe hategurwa amatora y’inzego z’ibanze ku wa 13 Ukwakira 2018, nta bwo avuga rumwe.

FPI y’abagishyigikiye Laurent Gbagbo riyobowe na Aboudramane Sangaré bamenyesheje ko batazitabira amatora, ariko ishami ryayo riyoborwa na Pascal Affi N’Guessan ngo rizaba muri ayo matora.

TANGA IGITEKEREZO

Leave a Reply

Your email address will not be published. Required fields are marked *