Haribazwa ku nkomoko ya Coronavirus

Yanditswe na Kayira Etienne

Ku ya 10-02-2020 saa 10:55:02
Mu rwego rwo kurushaho kwirinda kwandura Coronavirus bambara udupfukamunwa (Foto AFP)

Icyorezo «Coronavirus» kimaze ibyumweru bitari bike cyadutse mu Mujyi wa Wuhan mu Bushinwa, ariko cyari kitaramenyekana neza ikigitera n’ibyo cyakomotseho.

Mu mpera z’icyumweru gishize Radio Mpuzamahanga y’u Bufaransa RFI, yatumije abantu muri sitidiyo zayo kugira ngo basangire ibitekerezo ku nkomoka y’iyo virusi.

Ubwo icyo kiganiro cya RFI cyabaga ku itariki 7 Gashyantre 2020, amakuru y’uwo munsi yavugaga ko  abantu basaga ibihumbi 31 bari bamaze kwandura, abagera kuri 636 bari bamaze gupfa.

Nibura ibihugu bitari munsi ya 20 byavugwagamo Coronavirus, imigi itari mike yashyizwe mu kato indi ifunga imipaka yayo iyihuza n’iyindi kubera ubukana bwo kwica icyo cyorezo cyagaragaje mu kwezi kimaze kimenyekanye.

Iti «Ukwezi kurarangiye Coronavirus yadutse mu Mujyi wa Wuhan mu Bushinwa, aho abashakashatsi bo ku Isi bagenda bagerageza kumenya amavu n’amavuko ya coronavirus 2019-nCoV ».

Ubwo Prof. Arnaud Fontanet, akaba n’Umuyobozi w’Ishami ry’Ubuzima rusange mu kigo Institut Pasteur yafashe ijambo yagize ati «Aya ni amateka agarutse ugereranyije n’ayo dusanzwe tuzi ya Sras, kuko mu ntangiriro virus imeze nka Coronavirus yagaragaye ku gacurama (chauve-souris) ku buryo ibigaragara kuri iki cyorezo gishya bigera kuri 96%, bisa neza n’iyabonetse ku gacurama ko mu Bushinwa rwagati mu 2018». Ariko ngo ako kanyamaswa kari kifitemo ubwandu cyangwa uburwayi, bwanduza ariko ubwako katarwaye.

Iyo mpuguke mu bumenyi bw’ubuzima ikomeza igira iti «Icyo twamenye ni uko habayeho hôte intermédiaire, ugenekereje mu kinyarwanda wakita gitera, ari yo nyamaswa zagurishijwe mu masoko atandukanye, acururizwamo inyamaswa mu buryo bw’umwihariko yo mu Mujyi wa Wuhan, ahantu icyorezo Coronavirus cyagaragaye bwa mbere. Ubushakashatsi bugaragaza ko abarwaye ba mbere, bakoze kuri utwo tunyamaswa aho twacuruzwaga mu masoko yavuzwe». Iperereza ngo rirakomeje muri iryo soko, kabone n’ubwo ryafunzwe kuva hatangira guhwihwiswa ko abarwaye ku ikubitiro ari ho baba baranduriye».

Prof. Fontanet yatangarije Radio France Internationale ko, ngo Visuri yiswe Srasm(Syndrome respiratoire aigu sèvère) ikomoka ku gakoko gatoya ko mu muryango w’inyamabere (mammifère) kagira inyama zikundwa cyane n’Abashinwa, zigurishwa muri resitora cyane cyane yo mu burasirazuba bw’amajyepfo y’u Bushinwa. Ati «Kugeza magingo aya, nta bwo ubushakashatsi bwerekana neza ko ibipimo byafashwe muri iryo soko ari ho ikibazo nyirizina cya coronavirus cyatangiriye. Ariko ikizwi ni uko, hari ibimenyetso bimwe byerekana ko iyi virusi ariho byahereye».

Iyi mpuguke mu birebana n’indwara zandura atangaza ko mu kigo Institut Pasteur, atangaza ko yari azi ko Icyorezo Sras cyo mu 2002-2003 cyahitanye ubuzima bw’abantu 774 ku Isi, ngo cyasigiye u Bushinwa n’ibindi bihugu ku buryo byakirinda kurya inyama za bene utwo dukoko duteza akaga. Ati «Mu mwaka wa 2003, u Bushinwa bwari bwarabujije kugurisha no kurya udukoko twanduza abantu indwara zo mu buhumekero none dore bwararangaye Coronavirus irimbuye indi mbaga y’abatuye Isi».

Muri icyo kiganiro cyabereye muri sitidiyo za RFI, Impuguke  mu mateka y’ubuvuzi bw’indwara zandura Frédéric Vagneron yagize ati «Leta z’ibihugu zigomba gusobanukirwa ko hari indwara abantu banduzanya n’inyamaswa kuko bifite aho bihurira byanze bikunze. Ni yo mpamvu Guverinoma zigomba gushora ingufu mu gukangurira abantu kwirinda kurya inyama z’udukoko tuzwiho ubwo bwandu». Yatanze urugero rw’indwara y’ibicurane (grippe) bikomoka ku nyoni yamenyekanye mu kinyejana cya 20. Kubera ko abantu bakimenye kimaze guhitanamo abatari bake, ubu biririndwa ariko bikanavurwa kuko hari imiti yakozwe ijyanye n’ubwoko bw’iyo virusi.

Abo bahanga bemeza ko impamvu coronavirus 2019-nCoV  yakwirakwijwe byihuse mu Bushinwa no mu bihugu byo ku yindi migabane y’Isi, ni uko amakuru yatanzwe bwa mbere mu ntangiriro z’Ukuboza n’abaganga 8 bo mu Bushinwa bavuga ko ari icyorezo gikomeye yateshejwe agaciro, ndetse Igihugu cyabo kibafata nk’abagambanyi bityo ntihashyirwa imbaraga mu kwihutira gushakishwa uburyo icyo cyorezo cyakirindwa vuba bishoboka.

Umunyamakuru ukorera RFI mu Bushinwa Hermine Roumilhac, yemeza ko koko abaganga umunani batanze impuruza mu bitaro bitandukanye ko abantu baba maso kuko hateye icyorezo kigiye kumera nka Sras, ariko Abayobozi ba Guverinoma babitesha agaciro bagira ngo barengere inyungu za poritiki bikarangira Igihugu kisanga cyaguye mu kibazo kitagifite igaruriro. Ati «Abo baganga uko ari umunani batangaje bwa mbere ko coronavirus ifite ubukana bukabije, polisi yarabashakishije ijya kuganira na bo basangira icyayi hanyuma ibasaba kutongera kuvuga izo nkuru z’incamugongo, hanyuma ibasaba gusubira mu kazi kabo».

Iyo nkuru y’icyo cyorezo ngo yongeye kuvugwa ku mugaragaro ku wa 23 Mutarama, mu mujyi wa Wuhan hamaze kwandura abantu benshi abandi bamaze gupfa, ari na bwo uyu mugi wahise ushyirwa mu kato. Meya wa Wuhan icyo gihe yatangaje ko kuva umunsi abo baganga bamenyesha ko Coronavirus yadutse kugeza ku munsi Leta yayivuze ku mugaragaro, nibura ngo abantu batari munsi ya miriyoni 5 bari bamaze kuwusohokamo ku buryo byanze bikunze harimo n’abari bamaze kwandura baba ari bo bagiye banduza abantu bo mu yindi migi y’u Bushinwa cyangwa abo mu bihugu bindi batembereyemo.

Coronavirus ya 2019 yagaragaye bwa mbere muri uriya mujyi wo mu Bushinwa, bikaba bikekwa ko ikomoka mu nyamanswa nto zikunze kuribwa n’Abashinwa. Ifata mu myanya y’ubuhumekero, ikaba ngo yandura byihuse kandi igahitana n’ubuzima bw’abantu benshi mu gihe gito, nkuko byemejwe n’impuguke zitandukanye zaganiriye byimbitse na Radio Mpuzamahanga y’u Bufaransa mu mpera z’icyumweru gishize.

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.