18°C , Partly sunny | Kigali-Rwanda

Hari itandukaniro rinini hagati y’abacuruzi b’ubu n’aba kera bakoze Jenoside-PSF

Yanditswe na MUKAGAHIZI ROSE

Ku ya 11-04-2018 saa 07:25:08

Abikorera bo mu mujyi wa Kigali bahamya ko hari itandukaniro rinini riri hagati y’abacuruzi bubu n’abagize uruhare muri Jenoside yakorewe Abatutsi mu 1994.

Ubwo abikorera bo mu mujyi wa Kigali bagera kuri 300 bakoraga urugendo rwihariye rwo kwibuka bagenzi babo bazize Jenoside yakorewe Abatutsi mu 1994 kugira ngo babasubize agaciro bambuwe mu gihe cya Jenoside, Umuyobozi w’Urugaga rw’Abikorera (PSF) mu Mujyi wa Kigali, Bitwayiki André, yagize ati “Hari abacuruzi bakoze amabi, bishe abantu muri Jenoside yakorewe Abatutsi mu 1994,  batanga intwaro, batanga amafaranga, nabo ubwabo babijyamo bica inzirakarengane ariko ntiwabigereranya n’ubucuruzi bwo muri iyi minsi turimo kuko ni ubucuruzi Leta y’Ubumwe bw’Abanyarwanda idushishikariza ikiza. Ni ubucuruzi twahawe ijambo.”

Robert Bafakulera, Umuyobozi Mukuru wa PSF

Yungamo ati “Kera abayobozi bahamagariraga abikorera kugira ngo barwanye abandi ariko kuri ubu, dukora  ubucuruzi  ubuyobozi buduhamagarira buri gihe guteza imbere igihugu cyacu, kwiteza imbere gukorera hamwe, gukundana kugira ngo u Rwanda rwacu rutere imbere.”

Yakomeje avuga ko urwego rw’abikorera rwahungabanyijwe na Jenoside yakorewe Abatutsi mu 1994 aho abacuruzi bishwe n’abandi bacuruzi bagenzi babo, n’abakiliya babo, avuga ko ari ikintu k’ingenzi kwibuka abakabaye bakorera u Rwanda iyo baba bakiriho.

Umuyobozi Mukuru wa PSF, Bafakulera Robert, yashimye abikorera uburyo bafatanya na Leta mu gufasha abarokotse Jenoside yakorewe Abatutsi batishoboye, asaba abikorera gukomeza gukora cyane, baharanira iterambere.

PSF iravuga ko hatangiye ubushakashatsi handikwa abikorera bazize Jenoside, aho ubu bigeze ku rwego rw’umurenge, handikwa uwishwe n’icyo yakoraga.

Usibye urugendo rwo kwibuka Jenoside yakorewe Abatutsi, abikorera ngo banakora ibindi bikorwa bitandukanye muri iki gihe cyo kwibuka k’iminsi 100 birimo nko kubakira amacumbi abarokotse Jenoside, n’ibindi.

 

TANGA IGITEKEREZO

Leave a Reply

Be the First to Comment!

avatar