27°C , Mostly cloudy | Kigali-Rwanda

Hari inyungu nyinshi mu kwishyura ingendo hakoreshejwe ikarita-RURA

Yanditswe na Tumukunde Georgine

Ku ya Mar 5, 2018 saa 1:11

Nyuma y’aho imodoka nini zitwara abagenzi mu Mujyi wa Kigali zishyizwemo ikoranabuhanga   ryifashishwa mu kwishyura ingendo hakoreshejwe ikarita (Tap & Go), ubu hashyizweho n’uburyo bwo kwishyura  ingendo zo kuri moto  (Tap & Pay), mu rwego rwo kunoza no kwihutisha serivisi zo gutwara abantu n’ibintu.

Imashini umumotari akoresha yishyuza umugenzi

Ni uburyo bwo gufasha abantu kujya bahererekanya amafaranga bakoresheje ikoranabuhanga kuko bituma babasha kwiteganyiriza amafaranga y’urugendo. Ku ruhande rw’abatwara abagenzi na ho hari inyungu nyinshi kuko babasha gucunga neza umushinga bashoyemo imari.

Katabarwa Asaba Emmanuel Umuyobozi ushinzwe ishami ryo gutwara abantu n’ibintu mu Rwego rw’Igihugu rushinzwe kugenzura imirimo imwe n’imwe ifitiye Igihugu akamaro  ( RURA),  avuga ko  abantu bakwiye kumva  ko ikoranabuhanga bivuze iterambere,  utarikoresheje iterambere rirmuvuna.

Aramara impungenge abantu ko gahunda zishyirwaho  ziba zigamije kubateza imbere kandi zigenzurwa kugira ngo hatagira uruhande rubangamirwa rwaba urw’abagenzi cyangwa urw’abashinzwe kubatwara.

Ati: “ Turi hano kugira ngo turinde inyungu z’abaturage, iz’abagenzi n’iz’abashoramari. Ikoranabuhanga riri mu bintu dushyira imbere mu mikorere yacu  mu Rwanda,  kugira ngo twihutishe imitangire ya serivisi kandi serivisi itangwa ikaba ibereye uyihabwa, ni muri urwo rwego no mu bijyanye no gutwara abantu n’ibintu twashyizemo ikoranabuhanga.”

 

INYUNGU ZO GUKORESHA UBURYO BWA “TAP & PAY”

Ku bijyanye n’uburyo bwo kwishyura ingendo kuri moto (Tap & Pay)  bwashyizweho n’Ikigo Yego Innovision ltd muri gahunda yiswe YegoMoto, umugenzi yishyura yifashishije  telefoni igendanwa agakoresha “Mobile Money”, kandi akishyura amafaranga ajyanye n’urugendo yakoze, kuko imashini akozaho ikarita  ibigaragaza.

Ikarita yo kwishyura moto yomekwa kuri Telefoni

Ikarita ikoreshwa mu kwishyura itangwa na  Yego Innovision Ltd ku buntu, yomekwa  kuri telefoni   y’ umugenzi,  akazajya ayikoza ku mashini  hakavaho amafaranga y’urugendo yakoze.

Katabarwa Asaba Emmanuel,  avuga ko iri koranabuhanga rishyirwa kuri moto rizakemura ibibazo byinshi haba ku ruhande rw’abagenzi no ku ruhande rw’abamotari.

Yagize ati: “ Abamotari na bo ni abantu batwara abantu benshi,  cyane cyane mu mugi, na bo ntitwabasiga inyuma mu ikoranabuhanga.  Iyi gahunda izakemura ibibazo byinshi;  kuko hari ubwo abamotari bahenda abagenzi cyangwa se abagenzi bagatanga amafaranga make bitewe n’uko babona abamotari ari benshi baribubarwanire,  umumotari wishyuwe make  akora ibishoboka byose agatwara umugenzi yihuta cyane,  akamutwara nabi kugira ngo amugeze iyo ajya agaruke atware undi,  ashakisha uko yagwiza amafaranga vuba vuba, ibi rero bishobora gukurura impanuka.”

Imashini yifashishwa kuri moto ntibara  ibilometero gusa,  ifite n’ubushobozi  bwo   kwerekana ahantu moto iherereye (GPS) ku buryo iramutse yibwe cyangwa se umumotari akaba yagiye kuyikoresha mu bindi bikorwa bihungabanya umutekano  byakoroha kumenya aho iri hakoreshejwe  mudasobwa.

Katabarwa ati: “Iyi mashini irafasha cyane kuko yaba ari umumotari,  yaba ari umugenzi wagize ikibazo ashobora gutabarwa ku buryo bwihuse. Iki ni igikorwa kigiye guhindura byinshi mu mitangire ya serivisi. Ubu harimo gukorwa ubukangurambaga kugira ngo nibura uku kwezi kwa Werurwe  kuzarangire abamotari  bose bamaze kubyumva, nyuma yaho utabikurikije akaba yahanwa hakurikijwe amategeko.”

Iyi gahunda izagera no mu bindi bice by’Igihugu.

Uburyo bwa   “Tap & Pay” bufasha  abamotari kubona inguzanyo

Abamotari barasabwa kumva inyungu ziri mu gukoresha ikoranabuhanga rya  “Tap & Pay”; nko kuba babasha  kumenya amafaranga bakoreye  kuko ajya kuri konti yabo ya  “Mobile Money”, bakaba banakwizerwa na   banki zikabaha  inguzanyo kuko bashobora kwerekana uburyo binjiza.

Harimo no kwigwa uburyo abamotari bajya babona izindi serivisi bifashishije iri koranabuhanga, nko kwishyura  umusoro biboroheye; Ikigo k’Imisoro n’Amahoro  (RRA)  cyajya gihita gikura umusoro kuri konti y’umumotari atiriwe ajya gushakisha ubundi buryo bwo kuwishyura.

Umugenzi udakoresha ikarita hari amafaranga azajya ahomba

Kugira ngo abantu bashishikarire gukoresha ikoranabuhanga mu kwishyura ingendo kuri moto, hari gahunda y’uko abadakoresha amakarita bazajya bagira amafaranga barenzaho ugereranyije n’abakoresha ikarita.

Katabarwa ati: “  Hari igihe ushobora gusanga amafaranga wakoresheje ku rugendo ari nka  575,  iyo ukoresha ikoranabuhanga ni yo wishyura, ni yo imashini ihita ikura kuri konti, ariko uwishyuye  mu ntoki azajya yishyura 600 yuzuye,  mu kwirinda ko umumotari ajya gushakisha ibiceri byo kugarura,  usange biranabuze. Ni no kugira ngo abantu bitabire gukoresha iri koranabuhanga.”

Ubuhamya bw’abatangiye gukoresha “Tap & Pay”

Habiyaremye Juvenal ni umumotari ukorera mu Mujyi wa Kigali, avuga ko n’ubwo imashini ayimaranye igihe kitari kinini amaze kubona ibyiza byo kuyikoresha. Ati: “Maze amezi ane nyikoresha, ariko nabonye ko ifite akamaro koko, singisesagura amafaranga ninjije kuko ahita ajya kuri konti yange, kandi menya ayo ninjije buri munsi, biramfasha cyane.”

Avuga ko ariko ubukangurambaga bukwiye gukomeza gukorwa kugira ngo abagenzi basobanukirwe iri koranabuhanga kuko batararyitabira.

Abandi bamotari batangiye gukoresha   “Tap & Pay” bavuga ko izabafasha gutera imbere kuko ituma bizigamira buri munsi kandi bizeye ko nibakenera inguzanyo ya banki bazayibona dore  ko hari n’abahisemo ko amafaranga binjije yajya ahita ajya kuri konti ya banki.

Kugeza ubu  moto  600 ni zo zimaze guhabwa imashini yifashishwa mu kwishyura, kandi abamotari bazihabwa nta kiguzi batanze, kereka umumotari  agize uburangare akayica cyangwa akayibura icyo gihe arayishyura,  uretse igihe bigaragaye ko yapfuye  atabigizemo uruhare.

Kugeza ubu MTN Mobile Money  n’ikarita ya YegoMoto ni byo birimo kwifashishwa mu kwishyura ingendo za moto, ariko harakorwa ibiganiro ku buryo hanakoreshwa Airtel Money.

Harigwa uko  hahuzwa amakarita akoreshwa mu kwishyura ingendo mu modoka no kuri moto ku buryo umuntu yagira ikarita imwe akayikoresha hombi.

INYUNGU ZO GUKORESHA UBURYO BWA “TAP & GO”

Urwego rw’Igihugu rushinzwe kugenzura imirimo imwe n’imwe ifitiye Igihugu akamaro          (RURA) ruratangaza ko uburyo bwo kwishyura ingendo mu modoka hakoreshejwe amakarita bugenda neza kandi Abaturarwanda bamaze kubwitabira.

Imashini ikuraho amafaranga y’urugendo

Ibi bishimangirwa n’uko uru rwego nta bibazo byinshi rucyakira bijyanye no gukoresha iri koranabuhanga ugereranyije n’uko byari bimeze rigitangira.

Uburyo bw’ikoranabuhanga bwitwa “Tap & Go”,  bukoreshwa hifashishijwe imashini umugenzi akozaho ikarita amafaranga ajyanye n’urugendo agiye gukora akavaho.

Mukamurera Vénérande ushinzwe ishami rirengera abafatabuguzi  muri RURA avuga ko iri  koranabuhanga rimaze  kumenyerwa ku buryo n’imbogamizi abagenzi bagaragazaga ubu zakemutse.

Ati: “Nta bibazo byinshi tucyakira, ubu ibyo turimo gukorera ubuvugizi ni ibijyanye  n’uko hari  abagenzi bavuga ko batanga amafaranga ashyirwa ku ikarita ariko ntibahabwe  resi (reçu)  bagera aho bagomba kwishyurira bagasanga babashyiriyeho make ku yo batanze.  Byabaye ngombwa ko tubigenzura, abashinzwe gushyira amafaranga ku makarita batubwiye ko hari ubwo bibeshya bagashyiraho amafaranga make  bitewe no kwakira abakiliya benshi, cyangwa se abagenzi bakaba ari bo bibeshya ntibamenye uko bakoresheje amafaranga bashyizeho.”

Ku kijyanye na resi, abashinzwe gushyira amafaranga ku makarita bagaragaje ko hari imashini zitayitanga. Iki kibazo na cyo RURA ikaba  irimo kugikorera ubuvugizi kugira ngo gikemuke.

Katabarwa Asaba Emmanuel Umuyobozi ushinzwe ishami ryo gutwara abantu n’ibintu muri RURA, ashimangira ko iri koranabuhanga hari ibibazo byinshi ryakemuye,  nk’ikijyanye n’abagenzi bamaraga umwanya munini  ku mirongo  bagatinzwa no kwishyura.

Ati: “Iyo ufite amafaranga mu ntoki kuyakwiba biroroha, ariko ikarita n’iyo bayibye, uzi nomero yayo ugana ikigo kibishinzwe AC Groupe  bakaguha indi bagushyiriyeho n’amafaranga yari ariho.”

Abashoramari babasha kugenzura iterambere ry’umushinga wabo

Ku bashoramari;  ba nyiri imodoka na bo birabafasha kuko bamenya amafaranga umushoferi yinjije, mu gihe mbere yashoboraga kutagaragaza neza ayo yakoreye, amwe akayitwarira, umukoresha ntashobore kubikurikirana, kandi    aba agomba kunguka nk’umuntu washoye imari.

Ikindi ni uko ubu buryo bw’ikoranabuhanga butuma banki zigirira ikizere  ba nyiri imodoka bagahabwa inguzanyo  kuko amafaranga binjije  ahita ajya  kuri konti zabo,  bikerekana ko bagurijwe babasha kwishyura neza.  Ni n’uburyo bufasha mu kubungabunga  ubukungu bw’Igihugu.

Katabarwa asaba abemerewe  gushyira mu bikorwa ikoranabuhanga ryo kwishyura ingendo, kwibuka ko iyo  bahawe uruhushya rwo kubikora baba bahawe uburenganzira n’inshingano,  ku buryo abatabikora neza ngo bubahirize za nshingano hari ibihano bahabwa.

Imashini yifashishwa mu gushyira amafaranga ku ikarita

Icyo abagenzi bavuga kuri “Tap & Go”

Nyirahabimana Immaculée ni umwe mu bakoresha ikarita bishyura ingendo zo mu modoka, yagize ati: “ Ubu buryo bwaje tutabwumva neza ariko tumaze kubona akamaro kabwo, mbere wasanganga tuvugana nabi n’abakomvuwayeri batinze kutugarurira cyangwa banatugarurira ugasanga baduhaye atuzuye tukajya mu byo kuburana,  ariko ubu ukoza ikarita ku mashini ugahita wicara mu modoka.”

Kugeza ubu imodoka nini zose zikorera mu Mujyi wa Kigali zamaze gushyirwamo ubu buryo bw’ikoranabuhanga,  kandi ni gahunda ikomeje kuko buri gihe haba hari izindi modoka nshya zitwara abagenzi zinjira mu muhanda, mbere y’uko zijya ku murongo zigomba kuba zifite iri  koranabuhanga.