19°C , Mostly cloudy | Kigali-Rwanda

Haravugwa abajenosideri bagera ku 100 mu Bufaransa

Yanditswe na Imvaho Nshya

Ku ya 26-07-2020 saa 10:10:26

Umufaransa Alain Gauthier n’umugore we Dafroza Mukarumongi Gauthier, bamenyekanye cyane mu bikorwa byo gukurikirana abakekwaho Jenoside yakorewe Abatutsi bahungiye mu Bufaransa, batangaje ko hakiri abajenosideri bagera ku 100 bihishe mu bice bitandukanye by’icyo Gihugu.

Mu Kiganiro bagiranye na Liberation.fr, bagaragaje ingorabahizi zikigaragara mu gufata no gushyikiriza ubutabera abakekwaho ibyaha bya Jenoside yakorewe Abatutsi bihishe mu Bufaransa.

Icyo kiganiro cyabaye nyuma y’igihe gito Aloys Ntiwiragabo wari waraburiwe irengero, atahuwe mu Mujyi wa Orléans aho amaze igihe yihishe.

Ubushinjacyaha bushinzwe kurwanya ibyaha by’iterabwoba mu Bufaransa bwatangaje ko bwatangiye iperereza ry’ibanze ku byaha byibasiye inyokomuntu Ntiwiragabo akurikiranyweho, nyuma yo gutahurwa n’Ikinyamakuru Mediapart atembera mu Bufaransa.

Ntiwiragabo wabaye Umuyobozi w’ishami ry’ubutasi mu zahoze ari ingabo z’u Rwanda (Ex-FAR) akaba n’umwe mu bashinze inyeshyamba za FDLR muri Repubulika Iharanira Demokarasi ya Congo, yagaragaye mu itangazamakuru nyuma y’amezi agera kuri abiri umuherwe Felicien Kabuga na we atawe muri yombi.

Alain Gauthier n’umugore we Dafroza Mukarumongi, bemeza ko ifatwa rya Kabuga ryabaye intangiriro y’imperuka ku bakurikiranyweho ibyaha bya Jenoside yakorewe Abatutsi bahungiye mu Bufaransa.

Basubije ibibazo bya Liberation.fr, bagaragaza ko hakiri abarenga 100 bakihishe mu Bufaransa, bategereje kugezwa imbere y’ubutabera bakaryozwa amabi bakoze mu gihe cya Jenoside.

Ese itahurwa rya Aloys Ntiwiragabo muri Orléans ryarabatunguye?

Yego, kuko ni umuntu tutari tugifite amakuru y’irengero rye, hashize igihe kinini. Nti twari tuzi ko yaba akiri muzima, nubwo tukizirikana uruhare yagize muri Jenoside, na nyuma yayo ubwo yashingaga umutwe wa FDLR yashinze mu mashyamba ya Zaire (ubu ni RDC). Yari umwe mu bayobozi bawo.

Bigitangira, abenshi mu bajenosideri bisanze muri uwo mutwe wa FDLR washinzwe ugamije kugaba ibitero no gufata u Rwanda; gusa icyo kirego kirihariye nta bwo twagikozeho ubushakashatsi.

Hatangiye iperereza kuri Ntiwiragabo Aloys wagaragaye atembera mu Bufaransa

Kuva mu 2001 mushinga Umuryango ‘Collectif des Parties Civiles pour le Rwanda (CPCR)’, mwagaragaje ibirego birenga 30 by’abakekwaho Jenoside yakorewe Abatutsi baba mu Bufaransa. Ni gute babashije kuguma muri icyo gihugu badakurikiranwa?

Mu myaka ya mbere yakurikiye Jenoside yakorewe Abatutsi, babonye ubwigenge bakeshaga Ubuyobozi bw’u Bufaransa bwabababariye, bukabaha ibyemezo by’ubuhunzi, bamwe bukanabemerera guhindura amazina. Isano ya bugufi u Bufaransa bwari bufitanye n’ubuyobozi bwakoze Jenoside isobanura iby’izo mbabazi bagiriwe. Ibigaragara ni uko Aloys Ntiwiragabo nta byangombwa yagiraga ahubwo umugore we ni we wamufashije gutura mu Bufaransa, ahindura n’izina. Nta gushidikanya ko bakingiwe ikibaba mu buryo bunoze. Birazwi ko abandi barwanyi ba FDLR bakihishe i Rouen. Muri rusange tugereranya ko hakiri abajenosideri bagera ku 100 bari mu Bufaransa.

Mu myaka 20 ishize, ubusabe mwagaragaje mukurikije ubushakashatsi mwakoze mu Rwanda bwatanze umusaruro w’imanza ebyiri zafunzwemo abantu 3. Uko kugenda biguru ntege guterwa n’iki?

Icyo ni cyo kiduca intege. Urubanza rwa mbere rwari urwa Pascal Simbikangwa wari uw’imbere mu buyobozi mu 1994 watahuwe i Mayotte; yakatiwe imyaka 25 y’igifungo. Nyuma y’imyaka ibiri twatahuye ba Burugumesitiri 2, ari bo Octavien Ngenzi na Tito Barahira, bakatiwe igifungo cya burundu. Ku bandi byagenze bite? Turacyategereje. Kugeza mu mwaka wa 2014, nta bwo ubushinjacyaha bwigeze busaba ko hakorwa iperereza. Ni ubusabe bwacu busunikira ubutabera kugira icyo bukora. Ishami ryihariye ku byaha bya Jenoside ryashinzwe mu rukiko rw’i Paris mu 2012, ryari ryitezweho kongera umuvuduko. Gusa abacamanza ntibahagije, usanga bahugiye no ku yandi madosiye, nk’ayo muri Syria na Liberia. Bagenda bahinduka. Uko kugenda biguru ntege  guha urwaho umuco wo kudahana.

Uretse Ntiwiragabo, abandi bakekwa bazwi aho baherereye …

Cyane rwose! Muri bo harimo Agathe Habyarimana, umugore wa Nyakwigendera Perezida Habyarimana Juvénal. Twatanze ikirego kimwerekeye mu 2007. Atuye muri Essonne, aho Perefe aherutse kuvuga ko atahakenewe. Bamwimye sitati y’ubuhunzi, Inama Nkuru ya Leta yagaragaje ko ari mu bakekwaho gutegura Jenoside… igikurikiraho ni iki? Ntacyo, atuye mu Bufaransa mu buryo bunyuranyije n’amategeko ndetse n’amaperereza y’ubutabera ntiyarangiye. Ikindi kirego twavuga ni icya Col. Laurent Serubuga, wari umugaba w’Ingabo wungirije, ukurikiranyweho kuba yari mu b’imbere mu bwicanyi kuva Jenoside igitangira. Twatanze ikirego ubugira kabiri, ubwa kabiri twamwongeye ku bashya batahuwe, iperereze rirakomeje. Tuzi aho atuye, ariko ubu arashaje cyane arengeje imyaka 80. Ese azashyikirizwa ubutabera?

Ni ukuvuga ngo hari izindi manza zigiteganyijwe….

Cyane! Hari urwa Sosthène Munyemana wari umuganga w’abagore mu Majyepfo y’u Rwanda mu 1994. Kuri ubu aba mu Mujyi wa Bordeaux. Hari kandi urwa Laurent Bucyibaruta, wahoze ari Perefe wa Gikongoro mu burengerazuba bw’amagepfo y’u Rwanda, agace kabereyemo ubwicanyi ndengakamere. Twamutanzeho ikirego cya mbere mu 2000! Kuri ubu aba ahitwa Saint-André-les-Vergers hafi na Perefegitura ya Troyes muri Aube.

Munyemana na Bucyibaruta boherejwe mu rukiko rw’ibanze. Barajuriye, ubujurire bwabo buteshwa agaciro, bakomeza gusaba baburanira mu rukiko rw’ubujurire. Haciye igihe kinini, abatangabuhamya bagenda babura, bamwe ntibakibuka, abandi ntibagishaka no kuvuga…

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.