Haravugururwa itegeko rigenga amakoperative mu Rwanda

Yanditswe na Mutungirehe Samuel

Ku ya 08-01-2020 saa 14:34:01
Prof. Harerimana Jean Bosco, Umuyobozi Mukuru w'ikigo k'igihugu cy'amakopertive RCA, avuga ko itegeko rigenga amakoperative rizatuma imicungire yayo iba myiza kurushaho (Foto Imvaho Nshya)

Umuyobozi w’Ikigo k’igihugu gishinzwe iterambere ry’amakoperative mu Rwanda RCA, Prof. Harerimana Jean Bosco, yatangaje ko hari gahunda yo kuvugurura itegeko rigenga imikorere y’amakoperative mu Rwanda, rikazakemura ibibazo byinshi amakoperative yahuraga nabyo rigatuma arushaho gutera imbere.

Mu kiganiro n’Imvaho Nshya, Prof. Harerimana yavuze ko itegeko rishya ryemejwe ubu rigeze mu nteko ishinga amategeko y’u Rwanda. Ati “Itegeko ry’amakopertive ubu inama y’abaminisitiri, Cabinet, yararyemeje, ubu rigeze mu Nteko Ishinga Amategeko.”

Yakomeje avuga ko risanzwe ririmo ko umuntu wayobora koperative runaka hari ubumenyi bwabyo yafa afite, ariko harimo n’ibindi byinshi bishya. Ati “Twongeyeho n’ibindi bijyanye n’ibyifuzo n’ibibazo amakoperative yagiye yerekana; ibyo rero byose biri mu itegeko rishya.

Icya mbere ni ukuba uzayobora koperative aba azi gusoma no kwandika, kuba uri inyangamugayo igiye kuyobora abandi, hanyuma kuba utarakatiwe igifungo cy’amezi atandatu, ikindi kuba warakoreye nabi koperative ntabwo ushobora kujya kuba umuyobozi muri koperative.”

Prof. Harerimana yongeyeho ko hari n’ikindi bakoze, kijyanye no guha akazi ababyigiye, buri koperative bitewe n’urwego irimo ikajya igira abayifasha gutera imbere muri urwo rwego.

Ati “Niba ari koperative y’abahinzi bakaba bafite Agronome mu buhinzi kandi bakaba bafite n’icyumba cy’umuyobozi w’icungamutungo. Ibyo rero icyo bizogerera amakoperative, bizatuma imiyoborere y’amakoperative iba myiza hanyuma n’imicungire ikaba myiza kurushaho kubera ko akenshi na kenshi n’ibi twitaga ibihombo wasangaga bituruka ku kutamenya.

Ariko kubera ko tuzaba tuzi ko abantu bafite ubumenyi bizatuma n’abandi banyamuryango ubumenyi bubageraho ku buryo bworoshye.”

Ikigo cy’amakoperative RCA kivuga ko kigitegereje ko iryo tegeko risohoka rigashyirwa mu igazeti ya Leta rigatangira gukurikizwa mu micungire myiza y’amakoperative.

Ku banyamuryango benshi barimo n’abakorera muri koperative zo gutwara abagenzi kuri moto bazwi nk’abamotari kimwe n’abahinzi baryiteguranye amatsiko menshi nka bamwe mu bagiye bagaragariza abayobozi batandukanye ibibazo bagize mu micungire mibi y’amakoperative aho abayayoboraga banyereje amafaranga atari make kubera ububasha bigwizagaho bakaba ari bo bafata ikemezo abanyamuryango batabizi abandi bakikubira umutungo wa koperative bakaburirwa irengero nubwo ikigo RCA kigeze kure kigaruza imwe mu mitungo ya koperative abandi bakaba bari mu nkiko bisobanura.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.