19°C , Clear | Kigali-Rwanda
Komiseri Mukuru w'Ikigo k'Igihugu k'imisoro n'Amahoro Tusabe Richard

Haracyagaragara inzitizi ku bicuruzwa byambukiranya imipaka-Tusabe

Yanditswe na SEZIBERA ANSELME

Ku ya 07-05-2018 saa 08:35:26

Komiseri Mukuru w’Ikigo k’Igihugu gishinzwe Imisoro n’Amahoro (RRA), Richard Tusabe, asanga hakiri imbogamizi ibicuruzwa byambukiranya imipaka mu karere ka WCO-ESA n’u Rwanda rurimo bigihura nazo bigatuma bibiviramo kwangirika.

Komiseri Mukuru w’Ikigo k’Igihugu k’imisoro n’Amahoro Tusabe Richard

Tusabe atangaza ko muri izo nzitizi harimo ibicuruzwa bikererezwa gusuzumwa igihe kirekire kuri za gasutamo z’ibindi bihugu ugasanga bimaze nk’iminsi 10 bikaba byanatuma byangirika, kandi na ba nyirabyo bagatakaza umwanya munini bikica ubuhahirane.

Tusabe avuga ko guteza imbere ubucuruzi harimo n’ubwambukiranya imipaka, no kwirinda no gukumira ibicuruzwa bitujuje ubuziranenge, bisaba ko buri gihugu kigira icyo gikora kandi kikanakorana n’ibindi.

Richard Tusabe yagize ati Kugira ngo isoko ry’Afurika rishoboke, ni uko imipaka iba ikora ku rwego rwo hejuru cyane, bumva inyungu dufite nk’akarere mu korohereza ubucuruzi, kugira ngo tuzamure ubucuruzi hagati yacu ndetse no hanze y’Afurika”. Atangaza ko mu bindi bigomba kuzarebwaho bijyanye n’amategeko n’ubundi buryo (tools) bwashyirwaho kugira ngo bashyigikire ikemezo k’isoko rimwe ry’Afurika.

Ikindi ngo ni amategeko ibihugu byemeranyijwe usanga atubahirizwa kimwe, aho ushobora gusanga nk’ibicuruzwa bisuzumwa n’abantu benshi bitari ngombwa. Umuyobozi mukuru wungirije w’umuryango wa za Gasutamo mu bihugu 24 by’Afurika y’Iburasirazuba n’iy’Amajyepfo Dickson Kateshumba, avuga ko muri ako karere hashyizweho uburyo bwiza bwo gucunga imipaka, hubakwa imipaka ihuriweho n’ibihugu (Single Custom bolder Posts) 15 zifasha mu koroshya ubuhahirane bw’ibihugu.

Kateshumba avuga ko hakiri imbogamizi y’ubucuruzi butemewe, n’ubucuruzi budakurikije amategeko (informal trade) bukeneye gufashwa kugira ngo butere imbere.

Ati Ubucuruzi bwambukiranya imipaka nta bwo igihe cyose buba butemewe n’amategeko (illegal), kuko abantu bakeneye kumenyana, ibimenyetso byashyizwe ku mipaka y’ibihugu byatanyije abavandimwe, hari ubwo umwe ashobora kuva Gatuna ajyanye ibintu bye ku muturanyi uri Uganda, ubwo byafatwa nk’ibitemewe? Numva ko atari byo ahubwo abantu bashobora kureba icyakorwa kugira ngo ubwo bucuruzi buto butezwe imbere, na byo turabiganira”.

Inama mpuzamahanga ngarukamwaka ya za gasutamo iheruka mu mwaka wa 2017 ikaba yarabereye mu gihugu cya Uganda kandi ikaba yitezweho kugira uruhare runini mu ishyirwa mu bikorwa ry’isoko rimwe ry’Afurika.

TANGA IGITEKEREZO

Leave a Reply

Be the First to Comment!

avatar