18°C , Partly cloudy | Kigali-Rwanda
Bagirishya Anaclet utoza APR HBC wemeza ko kuba batari bafite abakinnyi bahagije byatumye badatwara igikombe cya shampiyona

Handball: Umutoza wa APR HBC yagaragaje icyatumye bategukana shampiyona

Yanditswe na NKOMEJE GUILLAUME

Ku ya 12-09-2018 saa 08:10:16

Bagirishya Anaclet, umutoza mukuru w’ikipe ya APR HBC avuga ko kuba atari afite abakinnyi bahagije, biri mu mpamvu zatumye batabasha gutwara igikombe cya shampiyona y’uyu mwaka w’imikino wa 2018.

Bagirishya Anaclet utoza APR HBC wemeza ko kuba batari bafite abakinnyi bahagije byatumye badatwara igikombe cya shampiyona

APR HBC yabuze iki gikombe yari yatwaye mu mwaka ushize wa 2017, nyuma y’uko itsinzwe na mukeba wayo w’ibihe byose, Police HBC mu mukino usoza iyi shampiyona ibitego 36 kuri 29 wabaye tariki 08 Nzeri 2018.

Ibi byaje gutuma APR HBC isoreza ku mwanya wa kabiri ku rutonde rwa shampiyona n’amanota 50, irushwa na Police HBC yatwaye iki gikombe amanota 4 kuko yagize 54.

Bagirishya yemeza ko muri uyu mwaka wa 2018 yahuye n’ikibazo cyo kutagira ikipe ikomeye bihagije.  Yagize ati “Nta bwo byoroshye, haba harimo impamvu nyinshi cyane ariko icyatugoye nta bwo twari dufite abakinnyi bahagije.”

Akomeza agira ati “Nta bwo nabeshya mvuge ngo umukinnyi  runaka naramuka agize ikibazo, ese umukinnyi uribuze kumusimbura ari ku rwego rwiza rwo kuba yakora nk’ibyo undi yakoraga?”

Uyu mutoza avuga ko afite ikizere cy’uko ubuyobozi bw’ikipe ya APR HBC buzagira icyo bukora kugira ngo bazabashe kugira ikipe ikomeye ihatanira ibikombe mu marushanwa ari imbere. Ati “Nizera ko hari icyo ubuyobozi bugiye kudufasha kugira ngo tuzagire ikipe ishobora kuzahangana mu irushanwa rizaza mu minsi iri imbere.”

Bagirishya Anaclet atangaza ko bagiye kwitegura imikino y’irushanwa rihuza amakipe ane ya mbere muri shampiyona “Carre d’AS” riteganyijwe kuba kuri uyu wa Gatandatu tariki 15 Nzeri 2018.

APR HBC yegukanye iki gikombe umwaka ushize wa 2017 izahura na ADEGI HBC yabaye iya 3 naho Police HBC  yabaye iya mbere izahure na ES Kigoma HBC ya kane.

 

TANGA IGITEKEREZO

Leave a Reply

Your email address will not be published. Required fields are marked *