16°C , Partly cloudy | Kigali-Rwanda
Turatsinze Dismas, umutoza wa Police HBC utangaza ko ashimira abakinnyi kuba barabashije gutwara igikombe cya shampiyona ya 2018

Handball: Turatsinze yashimiye abakinnyi bitanze bagatwara igikombe cya shampiyona

Yanditswe na NKOMEJE GUILLAUME

Ku ya 11-09-2018 saa 07:33:43

Umutoza wa Police HBC, Turatsinze Dismas yashimiye abakinnyi be kuba barakoze ibishoboka byose bakegukana igikombe cya shampiyona y’igihugu y’umukino wa Handball y’uyu mwaka wa 2018.

Turatsinze Dismas, umutoza wa Police HBC utangaza ko ashimira abakinnyi kuba barabashije gutwara igikombe cya shampiyona ya 2018

Ibi yabitangaje nyuma y’umukino usoza iyi shampiyona wabereye Kimisagara, ku wa Gatandatu tariki 8 Nzeri 2018, Police HBC yashimangiye gutwara iki gikombe itsinze APR HBC ibitego 36 kuri 29.

Uyu mutoza avuga ko ashimira abakinnyi babashije kumva ibyo yabasabye bakegukana iki gikombe kuko yari intego bari barihaye kuva batangiye iyi shampiyona.

Ati Iki gikombe kiradushimishije cyane, twaragiharaniye kandi twaragikoreye, Imana yatubaye hafi, ubuyobozi bwatubaye hafi, abakinnyi na bo bamba hafi kuko ibyo nabasabye gukora kuva tugirangira shampiyona turabikoze.”

Turatsinze uheruka gukora amahugurwa y’ubutoza mu rwego “C” atangaza ko yakiriye neza gutwara igikombe cya mbere cya shampiyona nk’umutoza mukuru w’iyi kipe.

Ati Biranshimishije cyane, ni igikombe cya mbere cya shampiyona, nubwo nagiye ntwara n’ibindi iki ni cyo k’ibanze kuko ni cyo kiba kiyoboye ibindi, numvaga bitari kunezeza cyane, iyo nza kuba naratwaye igikombe k’Intwari mu kwa kabiri n’icyo kwibuka mu kwa gatandatu nkaza kubura igikombe cya shampiyona.”

Yemeza ko kuba barabashije kwitabira imikino y’amarushanwa ahuza Abapolisi bo mu karere “EAPCCO Games” yabereye muri Tanzania biri mu byabafashije kwigaranzura APR HBC yari yatwaye shampiyona iheruka mu 2017.

Ati Kuyigaranzura cyane hari ugushyira hamwe, hari no kuba twaragize n’andi mahirwe yo kujya mu mahanga mu mikino ya Gipolisi mu karere, dukora imyitozo ihagije, guhura n’amakipe akomeye biduha imbaraga no kongera gukora dushyize hamwe.”

Police HBC yaje kwegukana iri rushanwa ryabereye muri Tanzania kuva tariki 6 kugeza 12 Kanama 2018.

Police HBC yabaye iya mbere n’amanota 54, APR HBC n’amanota 50, ADEGI HBC ya 3 na 39 na ES Kigoma ya 4 na 36, zizahurira mu irushanwa rya “Carre d’AS” ku wa Gatandatu tariki 15 Nzeri 2018.

 

 

 

 

 

 

 

 

 

 

 

TANGA IGITEKEREZO

Leave a Reply

Your email address will not be published. Required fields are marked *