16°C , Partly cloudy | Kigali-Rwanda
Abakinnyi ba Police HBC mu byishimo byo kwegukana igikombe nyuma yo gutsinda APR HBC

Handball: Police HBC yegukanye igikombe cya shampiyona y’umwaka wa 2018

Yanditswe na NKOMEJE GUILLAUME

Ku ya 10-09-2018 saa 07:27:44

Ikipe ya Police HBC yegukanye igikombe cya shampiyona ya Handball y’uyu mwaka wa 2018 nyuma y’uko yitwaye neza igatsinda APR HBC mu mukino wasozaga shampiyona ku manota 36 kuri 29 wabaye ku wa Gatandatu tariki 08 Nzeri 2018.

Abakinnyi ba Police HBC mu byishimo byo kwegukana igikombe nyuma yo gutsinda APR HBC

Police HBC yaherukaga gutwara iki gikombe cya shampiyona mu 2016 yahise iyobora urutonde rwa shampiyona n’amanota 54, irusha APR HBC iyikurikiye amanota 4 kuko ifite amanota 50.

Turatsinze Dismas, umutoza wa Police HBC yishimiye gutwara igikombe cya mbere cya shampiyona nk’umutoza mukuru w’iyi kipe. Avuga ko ari intego bari bihaye kuva iyi shampiyona itangiye, ndetse bari bahize kutongera kubura iki gikombe nk’uko byababayeho mu mwaka ushize.

Yagize ati Yari intego ikomeye kandi kari akazi kavunanye, kuko ubushize bari badutwaye igikombe, twari twarabatsinze mu mukino ubanza, uwo kwishyura baraza baradutsinda intego twari dufite uyu munsi ni uko tutari kongera gukora amakosa nk’ayo twakoze uwo munsi, ni cyo cyatumye ubona ko twahereye ku munota wa mbere tubagenda imbere kugeza ubwo turangije uyu mukino.”

Ku rundi ruhande, Bagirishya Anaclet umutoza wa APR HBC avuga ko kuba batakaje iki gikombe atari ibintu byiza cyane ko baba bamaze igihe kinini bagihatanira gusa yemeza ko Police HBC yari imeze neza muri uyu mukino.

Ati Ni umukino utari woroshye kubera ko Police HBC  ni ikipe nziza navuga ko ifite abakinnyi beza bakomeye ariko uyu munsi nta bwo byadukundiye, ubusatirizi bwacu nta bwo bwagenze neza cyane kugira ngo bubashe gukora ibitego, birangira rero umukino tuwutsinzwe.”

Mu yindi mikino yabaye, GS St Aloys  yatsinze Inyemeramihigo ibitego 43 kuri 35, ES Kigoma itsinda Munyove ibitego 26 kuri 24, ES Kigoma itsinda GS St Aloys ibitego 33 kuri 29 naho ADEGI itsinda Inyemeramihigo ibitego 42 kuri 38.

Mu ishyirahamwe ry’umukino wa Handball mu Rwanda, “FERWAHAND”, baratangaza ko igikombe n’ibindi bihembo bizatangwa ku wa Gatandatu tariki 15 Nzeri 2018, ubwo hazaba hakinwa imikino ihuza amakipe ane ya mbere rizwi nka ya “Carre d’AS”.

Police HBC yasoje shampiyona iyoboye n’amanota 54 ikurikirwa na APR  HBC n’amanota 50, ADEGI HBC ya 3 na 39, ES Kigoma ya 4 na 36, Munyove na 33, Inyemeramihigo na St Aloys zinganya 30, Nyakabanda na 20, ES Urumuri na 16, Inkumburwa na 14, UR- Huye ni iya nyuma (11) n’amanota 5.

 

 

 

TANGA IGITEKEREZO

Leave a Reply

Your email address will not be published. Required fields are marked *